ಮೈಸೂರು

ರಸಗೊಬ್ಬರ ಸಮರ್ಪಕ ನಿರ್ವಹಣೆಯಿಂದ ಉತ್ತಮ ಇಳುವರಿ

ಹುಣಸೂರು ನಗರದಲ್ಲಿ ಆಯೋಜಿಸಿದ್ದ ತಂಬಾಕು ಕೃಷಿ ಕುರಿತ ಅರಿವು ಕಾರ್ಯಕ್ರಮದಲ್ಲಿ ಪ್ರಗತಿಪರ ರೈತರನ್ನು ಅಭಿನಂದಿಸಿ ಗೌರವಿಸಲಾಯಿತು. ಡಾ.ಎಸ್.ರಾಮಕೃಷ್ಣನ್, ಡಾ.ಮಹದೇವಸ್ವಾಮಿ, ಉಂಡುವಾಡಿ ಸಿ.ಚಂದ್ರೇಗೌಡ ಇತರರು ಇದ್ದರು.
ಹುಣಸೂರು ನಗರದಲ್ಲಿ ಆಯೋಜಿಸಿದ್ದ ತಂಬಾಕು ಕೃಷಿ ಕುರಿತ ಅರಿವು ಕಾರ್ಯಕ್ರಮದಲ್ಲಿ ಪ್ರಗತಿಪರ ರೈತರನ್ನು ಅಭಿನಂದಿಸಿ ಗೌರವಿಸಲಾಯಿತು. ಡಾ.ಎಸ್.ರಾಮಕೃಷ್ಣನ್, ಡಾ.ಮಹದೇವಸ್ವಾಮಿ, ಉಂಡುವಾಡಿ ಸಿ.ಚಂದ್ರೇಗೌಡ ಇತರರು ಇದ್ದರು.
ನಾಗೇಶ ಎಸ್
Published on: 
ಹುಣಸೂರು: ತಂಬಾಕು ಕೃಷಿಯಲ್ಲಿ ರಸಗೊಬ್ಬರಗಳ ಸಮರ್ಪಕ ನಿರ್ವಹಣೆಯಿಂದ ಹೆಚ್ಚಿನ ಇಳುವರಿ ಗಳಿಸಲು ಸಾಧ್ಯವೆಂದು ರಾಷ್ಟ್ರೀಯ ವಾಣಿಜ್ಯ ಕೃಷಿ ಸಂಶೋಧನಾ ಸಂಸ್ಥೆ(ಎನ್‌ಐಆರ್‌ಸಿಎ) ಮುಖ್ಯಸ್ಥ ಡಾ.ಎಸ್.ರಾಮಕೃಷ್ಣನ್ ಅಭಿಪ್ರಾಯಪಟ್ಟರು.
ನಗರದ ಕನಕ ಭವನದಲ್ಲಿ ತಂಬಾಕು ಮಂಡಳಿ ಮತ್ತು ಎನ್‌ಐಆರ್‌ಸಿಎ ಸಹಯೋಗದಲ್ಲಿ ತಂಬಾಕು ಬೆಳೆಗಾರರಿಗೆ ಇತ್ತೀಚೆಗೆ ಆಯೋಜಿಸಿದ್ದ ತಂಬಾಕು ಕೃಷಿಯಲ್ಲಿ ರಸಗೊಬ್ಬರಗಳ ನಿರ್ವಹಣೆ ಕುರಿತಾದ ಅರಿವು ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದರು.
ತಂಬಾಕು ಕೃಷಿಯಲ್ಲಿ ರೈತರು ಬಳಸುವ ರಸಗೊಬ್ಬರಗಳನ್ನು ನಿಗದಿತ ಕಾಲಕ್ಕೆ ಮತ್ತು ನಿಗದಿತ ಪ್ರಮಾಣದಲ್ಲಿ ಮಾತ್ರ ಬಳಸಬೇಕು. ನಾಟಿ ಮಾಡಿದ ನಂತರದ ತಿಂಗಳ ಅವಧಿಯಲ್ಲಿ ನೀಡಬೇಕಾದ ರಸಗೊಬ್ಬರಗಳು, ಪ್ರಮಾಣ ಎಲ್ಲವೂ ಹೊಗೆಸೊಪ್ಪು ಗಿಡದ ಬೆಳವಣಿಗೆ ಮೇಲೆ ಪರಿಣಾಮ ಬೀರುತ್ತದೆ. ರೋಗಬಾಧೆ ತಗುಲಿದ ಗಿಡಕ್ಕೆ ರಸಗೊಬ್ಬರದ ನಿರ್ವಹಣೆ ಕುರಿತು ಸಂಸ್ಥೆಯು ಹೆಚ್ಚಿನ ಅರಿವು ಮೂಡಿಸುವ ಕಾರ್ಯ ನಡೆಸಿದೆ. ಆದರೂ ರೈತರು ಗಮನಿಸುತ್ತಿಲ್ಲ. ಕೃಷಿಯಲ್ಲಿನ ಬದಲಾದ ಪದ್ಧತಿಗಳು, ಪರಿಸರ, ಆಧುನಿಕ ಚಿಂತನೆಗಳನ್ನು ರೈತರು ಅಳವಡಿಸಿಕೊಂಡಲ್ಲಿ ಸುಸ್ಥಿರತೆ ಕಾಯ್ದುಕೊಳ್ಳಲು ಸಾಧ್ಯ. ತಂಬಾಕು ಮಂಡಳಿ ನಿರ್ದೇಶನದಂತೆ ಟ್ರಾನ್ಸ್‌ವರ್ಲ್ಡ್ ಫರ್ಟಿಕೆಮ್ ಕಂಪನಿ ಪೂರೈಸುತ್ತಿರುವ ರಸಗೊಬ್ಬರ ಬಳಕೆ ವೈಜ್ಞಾನಿಕವಾಗಿ ಆಗಲಿ ಎಂದು ಸಲಹೆ ನೀಡಿದರು.
ವಿಜ್ಞಾನಿ ಡಾ.ಮಹದೇವಸ್ವಾಮಿ ಮಾತನಾಡಿ, ತಂಬಾಕು ಕೃಷಿಯಲ್ಲಿ ಪೋಷಕಾಂಶಗಳ ನಿರ್ವಹಣೆ, ರಸಗೊಬ್ಬರಗಳ ಬಳಕೆ ಅತ್ಯಂತ ಪ್ರಮುಖವಾಗಿದೆ. ಎನ್‌ಐಆರ್‌ಸಿಎ ಕೇಂದ್ರದ ವತಿಯಿಂದ ನಿರ್ದೇಶಿಸುವ ವಿಧಾನದಲ್ಲಿ ರೈತರು ರಸಗೊಬ್ಬರವನ್ನು ಬಳಸಿದಲ್ಲಿ ಎಕರೆಗೆ ಒಂದು ಲಕ್ಷ ರೂ.ಗೂ ಹೆಚ್ಚಿನ ಲಾಭ ಗಳಿಸಬಹುದಾಗಿದೆ ಎಂದು ತಿಳಿಸಿದರು.
ಕಾರ್ಯಕ್ರಮದಲ್ಲಿ ಪ್ರಗತಿಪರ ರೈತ ಕಟ್ಟೆಮಳಲವಾಡಿ ಕಿರಣ್‌ಕುಮಾರ್, ತಂಬಾಕು ಬೆಳೆಗಾರರ ಕ್ಷೇಮಾಭಿವೃದ್ಧಿ ಸಂಘದ ಗೌರವಾಧ್ಯಕ್ಷ ಉಂಡುವಾಡಿ ಸಿ.ಚಂದ್ರೇಗೌಡ, ಅಗ್ರಹಾರ ರಾಮೇಗೌಡ, ಅಧಿಕಾರಿಗಳಾದ ಯೋಗೇಶ್ ಚಂದ್ರ, ಮನೀಸ್ ಸಿಂಗ್, ತಿಪ್ಪೇಸ್ವಾಮಿ, ಟಾನ್ಸ್‌ವರ್ಲ್ಡ್ ಫರ್ಟಿಕೆಮ್ ಕಂಪನಿ ಅಧಿಕಾರಿಗಳು ಮತ್ತು ತಂಬಾಕು ಬೆಳೆಗಾರರು ಹಾಜರಿದ್ದರು. ಪ್ರಗತಿಪರ ರೈತರನ್ನು ಅಭಿನಂದಿಸಲಾಯಿತು.
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net