ಪ್ರಿಯಾಂಕ್ ಖರ್ಗೆ ಆರ್‌ಎಸ್‌ಎಸ್ ಪೂರ್ಣಾವಧಿ ಪ್ರಚಾರಕ : ಜಯರಾಮ್ ಬೊಳ್ಳಾಜೆ ವ್ಯಂಗ್ಯ

ರಾಷ್ಟ್ರೀಯ ಸ್ವಯಂ ಸೇವಕ ಸಂಘದ ವತಿಯಿಂದ ಕೃಷ್ಣಮೂರ್ತಿಪುರಂನ ಬಿಎಸ್‌ಎಸ್ ವಿದ್ಯೋದಯ ವಿದ್ಯಾಸಂಸ್ಥೆಯ ಸಭಾಂಗಣದಲ್ಲಿ ಶನಿವಾರ ಆಯೋಜಿಸಿದ್ದ ಪ್ರಮುಖ ನಾಗರಿಕ ಗೋಷ್ಠಿಯಲ್ಲಿ ಮಾತನಾಡಿ, ಪ್ರಿಯಾಂಕ್ ಖರ್ಗೆ ಅವರು ನಿರಂತರವಾಗಿ ಸಂಘದ ಕುರಿತು ಪ್ರಚಾರ ಮಾಡುತ್ತಿದ್ದಾರೆ. ಅವರು ಏನೇ ಟೀಕೆ ಮಾಡಿದರೂ ಸಂಘದ ಕುರಿತು ಜನ ಹಾಗೂ ಸಮಾಜ ಅಂತಿಮವಾಗಿ ತೀರ್ಮಾನ ಮಾಡುತ್ತದೆ ಎಂದರು.

ಸರ್ಕಾರ ನಿಮ್ಮ ಬಳಿಯಲ್ಲಿಯೇ ಇದ್ದು, ಮಧ್ಯರಾತ್ರಿ ಬೇಕಾದರೂ ಸಂಘದ ಮೇಲೆ ದಾಳಿ ನಡೆಸಬಹುದು, ನಿಮಗೆ ಯಾರು ಬೇಡ ಅನ್ನುತ್ತಾರೆ. ಆದರೆ, ನಿಮಗೆ ಆ ವಿಚಾರ ಬೇಕಾಗಿಲ್ಲ, ರಾಜಕೀಯವಾಗಿ ಆರ್‌ಎಸ್‌ಎಸ್ ಮೇಲೆ ಗೂಬೆ ಕೂರಿಸುವುದಷ್ಟೇ ನಿಮ್ಮ ಉದ್ದೇಶ. ಆ ಕೆಲಸವನ್ನು ಪ್ರಿಯಾಂಕ್ ಖರ್ಗೆ ಮಾಡುತ್ತಿದ್ದಾರೆ. ಅವರು ಆ ಕೆಲಸವನ್ನು ಮುಂದುವರೆಸಲಿ. ಅವರ ಹಿರಿಯರು ಕೂಡ ಇದನ್ನೇ ಮಾಡಿಕೊಂಡು ಬಂದರು. ರಾಜಕೀಯ ದೃಷ್ಟಿಕೋನದಿಂದ ಮಾತ್ರ ರಾಷ್ಟ್ರೀಯ ಸ್ವಯಂ ಸೇವಕ ಸಂಘವನ್ನು ವಿರೋಧಿಸಲಾಗುತ್ತಿದೆ. ಸಂಘ ಬೆಳೆದರೆ ನಮಗೆ ತೊಂದರೆ ಆಗುತ್ತದೆ ಎಂಬ ಭಯವೇ ಇದಕ್ಕೆ ಕಾರಣ ಎಂದರು.

ಆರ್‌ಎಸ್‌ಎಸ್ ಎಂಬ ಮೂರು ಅಕ್ಷರದ ಮೋಡಿ ಪ್ರಸ್ತುತ ಜಗತ್ತಿಗೆ ಹರಡಿದೆ. ಕೇಶವ ಬಲಿರಾಮ್ ಹೆಡ್ಗೆವಾರ್ ಸ್ವಾತಂತ್ರೃ ಚಳುವಳಿ ಯಲ್ಲಿ ಸಕ್ರಿಯರಾಗಿದ್ದರು. ಸಂಘಟನೆಯ ಕೊರತೆಯಿಂದಲೇ ದೇಶ ಸ್ವಾತಂತ್ರೃವನ್ನು ಕಳೆದುಕೊಂಡಿತು ಎಂದು ಅರಿತ ಹೆಡ್ಗೆವಾರ್ ಹಿಂದುಗಳನ್ನು ಒಗ್ಗೂಡಿಸಲು ಆರ್‌ಎಸ್‌ಎಸ್‌ಅನ್ನು ಪ್ರಾರಂಭಿಸಿದರು. ನಂತರ ಹೆಡ್ಗೆವಾರ್ ಪ್ರಾರಂಭಿಸಿದ ಸಂಘವು ಹಿಂದೂ ಸಮಾಜದ ಸತ್ವ ಜಾಗೃತಗೊಳಿಸಲು ಕಾರ್ಯವನ್ನು ನಿರಂತರವಾಗಿ ಮಾಡುತ್ತಿದೆ. ಸಂಘ ನೂರು ವರ್ಷಗಳಲ್ಲಿ ಹಲವು ಮೈಲಿಗಲ್ಲನ್ನು ಸಾಧಿಸಿವೆ. ಹಿಂದು ನಾವೆಲ್ಲ ಒಂದು ಎಂಬ ಭಾವ ಜಾಗೃತಿಗೊಳಿಸುವ ಕಾರ್ಯವನ್ನು ಸಂಘ ಯಶಸ್ವಿಯಾಗಿ ಮಾಡಿದೆ ಎಂದು ಹೇಳಿದರು.

ಸಂಘದ ಮಹಾನಗರ ಸಂಘ ಚಾಲಕ್ ಆರ್.ವಾಸುದೇವ ಭಟ್ ಇದ್ದರು.