ಚಿರತೆ ಹಾವಳಿಯಿಂದ ಜನರು ಕಂಗಾಲು

ಕಾಡಂಚಿನಲ್ಲಿ ಕಾಣಿಸಿಕೊಳ್ಳುತ್ತಿದ್ದ ಮಾನವ-ವನ್ಯಜೀವಿ ಸಂಘರ್ಷ ಇದೀಗ ಹಿಂದುಳಿದ ತಾಲೂಕೆಂಬ ಹಣೆಪಟ್ಟಿ ಹೊತ್ತಿರುವ ತಿ.ನರಸೀಪುರ ತಾಲೂಕಿಗೂ ವ್ಯಾಪಿಸಿದೆ. ತಾಲೂಕಿನ ಪ್ರತಿ ಹಳ್ಳಿಯಲ್ಲೂ ಚಿರತೆ ಕಾಣಿಸಿಕೊಂಡು ಜನರನ್ನು ಭಯಗೊಳಿಸುತ್ತಿರುವುದು ಒಂದೆಡೆಯಾದರೆ, ಇತ್ತೀಚೆಗೆ ಒಂಟಿ ಆನೆಯೊಂದು ಕೂಲಿ ಕಾರ್ಮಿಕರನೊಬ್ಬನನ್ನು ಬಲಿಪಡೆದಿದ್ದು, ರೈತರು ಮತ್ತು ಕೂಲಿ ಕಾರ್ಮಿಕರನ್ನು ಹೊಲ ಗದ್ದೆಗಳಿಗೆ ಹೋಗಿ ಕಾಲಿಡದಂತೆ ಮಾಡಿದೆ.

ದಟ್ಟ ಕಾಡಿನ ಅರಣ್ಯ ಪ್ರದೇಶ ಇಲ್ಲದ ತಾಲೂಕಿನಲ್ಲಿ ಐದಾರು ವರ್ಷಗಳ ಹಿಂದೆ ಅಲ್ಲೊಂದು, ಇಲ್ಲೊಂದು ಎಂಬಂತೆ ಕಾಣಿಸಿಕೊಳ್ಳುತ್ತಿದ್ದ ಚಿರತೆ ಸಮಸ್ಯೆಯೇ ಆಗಿರಲಿಲ್ಲ. ಆದರೆ ತಾಲೂಕಿನ ಎಂ.ಎಲ್. ಹುಂಡಿ ಬೆಟ್ಟದ ಬಳಿ ಯುವಕನೊಬ್ಬನನ್ನು ಚಿರತೆ ಮೊದಲು ಬಲಿ ಪಡೆದ ದಿನದಿಂದ ಜನರಲ್ಲಿ ಭಯ ಆರಂಭವಾಗಿದೆ. ಅಂತೆಯೇ ಎಸ್.ಕೆಬ್ಬೆಹುಂಡಿಯಲ್ಲಿ ಯುವತಿ, ಕನ್ನಾಯಕನಹಳ್ಳಿಯಲ್ಲಿ ಮಹಿಳೆ, ಹೊರಳಹಳ್ಳಿಯಲ್ಲಿ ಬಾಲಕ ಚಿರತೆಗೆ ಆಹುತಿಯಾದರೆ, ಪರಿಣಾಮಿಪುರದ ಜಮೀನಿನಲ್ಲಿ ಒಂಟಿಆನೆ ದಾಳಿ ಮಾಡಿ ಕೃಷಿ ಕಾರ್ಮಿಕರೊಬ್ಬನನ್ನು ಕೊಂದ ಘಟನೆ ಜನಮಾನಸದಲ್ಲಿ ವನ್ಯಮೃಗಗಳ ಮೇಲಿನ ಭಯವನ್ನು ಮತ್ತಷ್ಟು ಹೆಚ್ಚು ಮಾಡಿದೆ.

ಪ್ರತಿ ಹಳ್ಳಿಯಲ್ಲಿ ಅದರಲ್ಲೂ ಮುಖ್ಯ ರಸ್ತೆಯ ಬದಿಯಲ್ಲಿ ಚಿರತೆಗಳು ಓಡಾಡುತ್ತಿರುವುದು ಆತಂಕ ತಂದಿದೆ. ಇದಕ್ಕೆ ಅರಣ್ಯ ಇಲಾಖೆ ನಿರ್ಲಕ್ಷ್ಯ ಕಾರಣವೆಂಬ ಗಂಭೀರ ಆರೋಪವೂ ಸಾರ್ವಜನಿಕರಿಂದ ಕೇಳಿಬರುತ್ತಿವೆ. ಚಿರತೆ ಕಂಡೊಡನೆ ಕರೆ ಮಾಡಿ ಮಾಹಿತಿ ನೀಡಿದರೂ ಅಧಿಕಾರಿಗಳಾಗಲಿ ಅಥವಾ ಸಿಬ್ಬಂದಿಯಾಗಲಿ ತಕ್ಷಣ ಧಾವಿಸುವುದಿಲ್ಲ. ಜಾನುವಾರುಗಳನ್ನು ತಿಂದು ಬಿಟ್ಟು ಹೋದ ಮೇಲೆ ಸ್ಥಳಕ್ಕೆ ಬಂದು ಪರಿಶೀಲನೆ ಮಾಡುತ್ತಾರೆ. ತಾಲೂಕಿನಲ್ಲಿ ಕಾಡುಪ್ರಾಣಿಗಳ ದಾಳಿಗೆ ಐವರು ಬಲಿಯಾಗಿದ್ದರೂ ಚಿರತೆಗಳ ಹಾವಳಿ ನಿಯಂತ್ರಣಕ್ಕೆ ಯಾವುದೇ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಂಡಿಲ್ಲ.

ಚಿರತೆಗಳ ಅಡಗುತಾಣ ಶ್ರೀ ಮಲ್ಲಿಕಾರ್ಜುನಸ್ವಾಮಿ ಬೆಟ್ಟದ ತಪ್ಪಲಿನಲ್ಲಿರುವ ಉಕ್ಕಲಗೆರೆ, ಎಂಎಲ್ ಹುಂಡಿ ಗ್ರಾಮಗಳ ಜನರು ಹಾಗೂ ಜಾನುವಾರುಗಳು ತೀರಾ ಅಪಾಯದಲ್ಲಿವೆ. ಸಂಜೆ 4 ರಿಂದ 5 ಗಂಟೆ ಆಗುತ್ತಿದ್ದಂತೆ ಚಿರತೆಗಳು ಬಯಲಿಗೆ ಬಂದು ಬಿಡುತ್ತವೆ. ಅದಕ್ಕೂ ಮೊದಲು ಜನರು ಜಾನುವಾರುಗಳನ್ನು ಮನೆ ಸೇರಿಸುವ ಪರಿಸ್ಥಿತಿ ಬಂದೊದಗಿದೆ. ತಾಲೂಕಿನ ಗಡಿ ಗ್ರಾಮಗಳಾದ ಹ್ಯಾಕನೂರು, ಕಾಳಿಹುಂಡಿ, ಕೆಂಪಯ್ಯನಹುಂಡಿ ಹಾಗೂ ಮನ್ನೇಹುಂಡಿಯಲ್ಲಿ ಇತ್ತೀಚೆಗಂತೂ ಚಿರತೆ ಹಾವಳಿ ಹೆಚ್ಚಾಗಿದೆ.

ಚಿರತೆಗಳ ನಿಯಂತ್ರಣಕ್ಕೆ ಹಾಗೂ ಸೆರೆ ಹಿಡಿಯಲು ಪ್ರಾದೇಶಿಕ ಅರಣ್ಯ ಇಲಾಖೆ ಐವರ ಚಿರತೆ ಕಾರ್ಯಪಡೆ ರಚಿಸಿದೆ. ಈ ತಂಡ ದಿನದ 24 ತಾಸು ಕಾರ್ಯನಿರ್ವಹಿಸಲಿದೆ. ಚಿರತೆ ಕಾಣಿಸಿಕೊಂಡ ದೂರು ಬಂದ ಕೂಡಲೇ ಅಲ್ಲಿಗೆ ತೆರಳಿ, ಬಲಿಯಾದ ಜಾನುವಾರುಗಳ ಪರಿಶೀಲಿಸಿ, ಹೆಜ್ಜೆ ಗುರುತು ಗಮನಿಸಿ ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಳ್ಳಲು ಸ್ಥಳೀಯರಿಗೆ ಮಾಹಿತಿ ನೀಡುವುದು ಜತೆಗೆ ಚಿರತೆಗೆ ಸೆರೆಗೆ ಬೋನು ಇಡುತ್ತಾರೆ.

ತಾಲೂಕಿನಲ್ಲಿ ಈವರೆಗೂ 50ಕ್ಕೂ ಹೆಚ್ಚೂ ಚಿರತೆಗಳು ಅರಣ್ಯ ಇಲಾಖೆ ಬೋನಿಗೆ ಬಿದ್ದಿವೆ. 13 ಕಡೆ ಚಿರತೆಗಳು ಕಾಣಿಸಿಕೊಂಡಿವೆ. 12 ಬೋನುಗಳನ್ನು ಇರಿಸಲಾಗಿದೆ. ಐದಾರು ವರ್ಷಗಳ ಅವಧಿಯಲ್ಲಿ ಐವರು ಮೃತಪಟ್ಟಿದ್ದರೆ, ನೂರಾರು ಜಾನುವಾರುಗಳು ಬಲಿಯಾಗಿವೆ ಎಂದು ಅರಣ್ಯಾಧಿಕಾರಿಗಳು ಮಾಹಿತಿ ನೀಡಿದ್ದಾರೆ. ರೈತರು ಹಾಗೂ ಕೃಷಿ ಕಾರ್ಮಿಕರು ಮುಂಜಾನೆ 7ರ ನಂತರ ಹೊಲ ಗದ್ದೆಗಳಿಗೆ ತೆರಳಿ, ಸಂಜೆ 5 ರೊಳಗೆ ವಾಪಸ್ ಆಗಬೇಕು. ಚಿರತೆ ಕಾಣಿಸಿಕೊಂಡ ಆಸುಪಾಸಿನಲ್ಲಿ ಒಬ್ಬಂಟಿಯಾಗಿ ಯಾರೂ ಸಂಚರಿಸಬಾರದೆಂದು ಕೋರಿದ್ದಾರೆ.