ಬಜೆಟ್ ಚರ್ಚೆಯಲ್ಲೇ ವಿಪಕ್ಷ ವಿಫಲ: ಕೆಪಿಸಿಸಿ ವಕ್ತಾರ ಎಚ್.ಎ. ವೆಂಕಟೇಶ್ ಟೀಕೆ

ಸದನದ ಅಷ್ಟೂ ಸಮಯ, ವಿಪಕ್ಷ ನಾಯಕರು ತಾಳಮೇಳ ಹೊಂದಾಣಿಕೆ ಇಲ್ಲದ ಹೇಳಿಕೆ ನೀಡಿ ಅನಗತ್ಯ ವಿಚಾರ ಮುಂದಿಟ್ಟು ಕಾಲ ಕಳೆದಿದ್ದಾರಷ್ಟೆ. ಈ ಎಲ್ಲ ಬೆಳವಣಿಗೆ ಬಜೆಟ್‌ನಲ್ಲಿ ಯಾವುದೇ ಹುಳುಕಿಲ್ಲ. ಇದು ಶೇ.ನೂರರಷ್ಟು ಜನಪರವಾದುದು ಎಂಬುದನ್ನು ಮತ್ತೊಮ್ಮೆ ಸಾಬೀತು ಮಾಡಿದೆ ಎಂದು ಪ್ರಕಟಣೆಯಲ್ಲಿ ಹೇಳಿದ್ದಾರೆ. 

17 ಬಾರಿ ಬಜೆಟ್ ಮಂಡಿಸಿ, ರಾಜ್ಯದ ಮುಖ್ಯಮಂತ್ರಿಯಾಗಿ ಗುರುತಿಸಿಕೊಂಡಿರುವ ಸಿದ್ದರಾಮಯ್ಯ ಆಡಳಿತದಲ್ಲಿ ಯಾವುದೇ ಲೋಪ ಇಲ್ಲ ಎನ್ನುವುದನ್ನು ವಿಪಕ್ಷ ನಾಯಕರು ಈ ಸುಗಮ ಬಜೆಟ್ ಅಧಿವೇಶನದ ಮೂಲಕ ಪರೋಕ್ಷವಾಗಿ ಒಪ್ಪಿಕೊಂಡಿದ್ದಾರೆ. 

ಸಿದ್ದರಾಮಯ್ಯ, ಡಿಸಿಎಂ ಡಿಕೆ ಶಿವಕುಮಾರ್, ಗೃಹ ಸಚಿವ ಡಾ.ಜಿ.ಪರಮೇಶ್ವರ ಇನ್ನಿತರ ಹಿರಿಯರ ನೇತೃತ್ವದಲ್ಲಿ ರಾಜ್ಯದ ಕಾಂಗ್ರೆಸ್ ಸರ್ಕಾರ, ಸಮರ್ಥ ಆಡಳಿತ ನೀಡುತ್ತಿದೆ. ಈ ಸರ್ಕಾರ ಬಜೆಟ್‌ನಲ್ಲಿ ಮತ್ತು ಅಧಿವೇಶನದ ವೇದಿಕೆಯಲ್ಲೂ  ಸಹ ಪಂಚ ಗ್ಯಾರಂಟಿ ಯೋಜನೆಗಳ ಪರಿಣಾಮಕಾರಿ ಜಾರಿಯ ಬದ್ಧತೆ  ಜನರ ಮುಂದಿಟ್ಟಿದೆ ಎಂದು ತಿಳಿಸಿದ್ದಾರೆ.

 ಅಧಿವೇಶನದಲ್ಲಿ ರಾಜ್ಯ ಸರ್ಕಾರ ಜನೋಪಯೋಗಿ ಹಾಗೂ ಸಾಮಾಜಿಕ ಸಮಾನತೆ, ದೌರ್ಜನ್ಯ ನಿರ್ಮೂಲನೆ ಸೇರಿದಂತೆ ಹಲವು ಪ್ರಗತಿಪರ ಅಂಶಗಳಿಗೆ ಒತ್ತು ಕೊಡುವ, ಪಾರದರ್ಶಕ ಆಡಳಿತಕ್ಕೆ ಪೂರಕವಾದ ಮಸೂದೆ ಮಂಡಿಸಿ ಒಪ್ಪಿಗೆ ಪಡೆದಿದೆ. 11ಕ್ಕೂ ಹೆಚ್ಚು ವಿಧೇಯಕಗಳಿಗೆ ಮಾನ್ಯತೆ ನೀಡಲಾಗಿದೆ ಎಂದು ಹೇಳಿದ್ದಾರೆ.