ಹೊಸ ಸಂಶೋಧನೆಯಿಂದ ಹಳೇ ತಂತ್ರಜ್ಞಾನ ಉಳಿದಿಲ್ಲ: ತಾಂತ್ರಿಕ ವಿವಿ ಕುಲಪತಿ ಡಾ.ಎಸ್.ವಿದ್ಯಾಶಂಕರ್

ಸರ್ಕಾರಿ ಆಯುರ್ವೇದ ಸಂಶೋಧನಾ ಕೇಂದ್ರದಿಂದ ವಿದ್ಯಾವರ್ಧಕ ಇಂಜಿನಿಯರಿಂಗ್ ಕಾಲೇಜಿನಲ್ಲಿ 10ನೇ ಆಯುರ್ವೇದ ದಿನಾಚರಣೆ ಅಂಗವಾಗಿ ಆಯೋಜಿಸಿದ್ದ ಟೆಕ್ನೋ ಆಯುರ್ವೇದ ವಿಚಾರಸಂಕಿರಣದಲ್ಲಿ ಆನ್‌ಲೈನ್ ಮೂಲಕ ದಿಕ್ಸೂಚಿ ಭಾಷಣ ಮಾಡಿದರು.

ಹೊಸ ಹೊಸ ಸಂಶೋಧನೆಯಿಂದ ಹಳೆಯ ತಂತ್ರಜ್ಞಾನಗಳು ಯಾವುದೂ ಶಾಶ್ವತವಾಗಿ ಉಳಿದಿಲ್ಲ. ಆದರೆ ಆಯುರ್ವೇದವು ಶಾಶ್ವತವಾಗಿ ಉಳಿಯಲು ಕಾರಣವೇನೆಂದರೆ ಅದು ಪ್ರಕೃತಿಯೊಡನೆ ಅವಿನಾಭಾವ ಸಂಬಂಧವನ್ನು ಹೊಂದಿದೆ ಎಂದರು.

ಆಯುರ್ವೇದ ಮತ್ತು ತಂತ್ರಜ್ಙಾನ ಒಂದು ನಾಣ್ಯದ ಮುಖವಿದ್ದಂತೆ, ದೇಶದ ಸರ್ವತೋಮುಖ ಅಭಿವೃದ್ಧಿಗೆ ಮತ್ತು ಸುಸ್ಥಿರ ಆರೋಗ್ಯದ ಪರಿಕಲ್ಪನೆಗೆ ತಂತ್ರಜ್ಞಾನವು ಆಯುರ್ವೇದದೊಂದಿಗೆ ಸೇರಿಕೊಂಡರೆ, ಆರೋಗ್ಯ ಕ್ಷೇತ್ರದಲ್ಲಿ ಕ್ರಾಂತಿ ಉಂಟಾಗುತ್ತದೆ. ಈ ಕ್ರಾಂತಿಗೆ ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾನಿಲಯವು ಎಲ್ಲ ತಾಂತ್ರಿಕ ಸಹಾಯವನ್ನು ನೀಡಲು ಸಿದ್ಧ ಎಂದು ತಿಳಿಸಿದರು.

ಆಯುಷ್ 4 ಯು ಕನ್ನಡ ಆವೃತ್ತಿಯನ್ನು ಬಿಡುಗಡೆಗೊಳಿಸಿದ ಕುವೆಂಪು ವಿಶ್ವವಿದ್ಯಾಲಯದ ವಿಶ್ರಾಂತ ಕುಲಪತಿ ಡಾ.ಕೆ. ಚಿದಾನಂದಗೌಡ ಮಾತನಾಡಿ. ಟೆಕ್ನೋ ಆಯುರ್ವೇದ ಕಾರ್ಯಾಗಾರವು ಒಂದು ಪರಂಪರೆಯನ್ನು ಸೃಷ್ಟಿಸುತ್ತದೆ ಮತ್ತು ಈ ಪರಂಪರೆಗೆ ಪುನರ್ಜೀವವನ್ನು ನೀಡುವುದರ ಮೂಲಕ ಈ ಪರಂಪರೆಯನ್ನು ಸಮಾಜಕ್ಕೆ ಅರ್ಪಿಸುವ ಹಿರಿದಾಸೆಯನ್ನು ಈ ಕಾರ್ಯಾಗಾರ ಹೊಂದಿದೆ ಎಂದು ಪ್ರಶಂಸಿಸಿದರು.

 ಟೆಕ್ನೋ ಆಯುರ್ವೇದವು ಯುವಶಕ್ತಿಗೆ ಒಂದು ಪ್ರೇರಣೆ ಅವರ ಬುದ್ಧಿಮತ್ತೆಗೆ ಒಂದು ಸವಾಲು ಸಹ ಆಗಿದೆ ಎಂದು ಮಾರ್ಮಿಕವಾಗಿ ತಿಳಿಸುತ್ತಾ ಈ ಸಂಶೋಧನೆಗಳು ಸಮಾಜಮುಖಿಯಾಗಿ ಪರಿವರ್ತನೆಯಾಗುವುದು ಒಂದು ಒಳ್ಳೆಯ ಅಂಶ ಎಂದು ತಿಳಿಸಿದರು.

ಕೇಂದ್ರ ಸರ್ಕಾರದ ಆಯುಷ್ ಸಲಹೆಗಾರ ಡಾ.ರಘು, ಕೇಂದ್ರೀಯ ಆಯುಷ್ ಸಂಶೋಧನಾ ಕೇಂದ್ರದ ಉಪ ನಿರ್ದೇಶಕ ಡಾ. ಶ್ರೀಕಾಂತ್, ತೆಲಂಗಾಣದ ಆಯುಷ್ ನಿರ್ದೇಶಕ ಡಾ.ಶ್ರೀಕಾಂತ್‌ಬಾಬು, ವಿದ್ಯಾವರ್ಧಕ ಕಾಲೇಜಿನ ಅಧ್ಯಕ್ಷ ಗುಂಡಪ್ಪಗೌಡ, ಗೌರವ ಕಾರ್ಯದರ್ಶಿ ಪಿ.ವಿಶ್ವನಾಥ್, ಕಾಲೇಜಿನ ಪ್ರಾಂಶುಪಾಲ ಡಾ.ಬಿ.ಸದಾಶಿವೇಗೌಡ, ಸರ್ಕಾರಿ ಆಯುರ್ವೇದ ಸಂಶೋಧನಾ ಕೇಂದ್ರದ ಸಹಾಯಕ ನಿರ್ದೇಶಕ ಡಾ.ಲಕ್ಷ್ಮೀ ನಾರಾಯಣ ಶೆಣೈ, ಹಿರಿಯ ಪತ್ರಕರ್ತ ಅಂಶಿ ಪ್ರಸನ್ನಕುಮಾರ್ ಇತರರು ಇದ್ದರು. 

 ಕಾರ್ಯಾಗಾರದಲ್ಲಿ ರಾಜ್ಯದ 10 ತಾಂತ್ರಿಕ ಕಾಲೇಜುಗಳ 150ಕ್ಕಿಂತ ಹೆಚ್ಚು ತಾಂತ್ರಿಕ ವಿದ್ಯಾರ್ಥಿಗಳು ಭಾಗವಹಿಸಿದ್ದರು. ಆಯುರ್ವೇದ ವೈದ್ಯಕೀಯ ವಿಜ್ಞಾನಕ್ಕೆ ಬೇಕಾದ ಯಂತ್ರಗಳು, ಉಪಕರಣಗಳು, ರೋಬಾಟ್‌ಗಳು, ಕೃತಕ ಬುದ್ಧಿಮತ್ತೆಯ ತಂತ್ರಜ್ಞಾನಗಳ ಬಗ್ಗೆ ವಿವಿಧ ಚರ್ಚೆ ನಡೆದವು.