ಮಿಶ್ರ ಬೆಳೆಯಲ್ಲಿ ಬಿ.ಜಿ.ಪ್ರಸನ್ನಕುಮಾರ್ ಸಾಧನೆ

ಸಾಲಿಗ್ರಾಮ: ಸಾಲಿಗ್ರಾಮ ತಾಲೂಕಿನ ಬೆಣಗನಹಳ್ಳಿ ಗ್ರಾಮದ ಗೋವಿಂದೇಗೌಡ ಮತ್ತು ಜಯಮ್ಮ ಅವರ ಪುತ್ರ ಪ್ರಸನ್ನಕುಮಾರ್ ಬಿ.ಎಸ್ಸಿ., ಬಿಇಡಿ ಪದವೀಧರ. ಕೃಷಿಯಲ್ಲಿ ಮೊದಲಿನಿಂದಲೂ ಆಸಕ್ತಿ. ಕೃಷಿಯನ್ನೇ ಉಸಿರಾಗಿ ಸ್ವೀಕಾರ ಮಾಡಿದವರು. ನಿತ್ಯ ಹತ್ತಾರು ಜನಕ್ಕೆ ಉದ್ಯೋಗ ನೀಡಿದ ಹಿರಿಮೆಗೆ ಪಾತ್ರರಾದವರು.

ಚುಂಚನಕಟ್ಟೆ ಹೋಬಳಿಗೆ ಸೇರುವ ಬೆಣಗನಹಳ್ಳಿ ಗ್ರಾಮದಲ್ಲಿ ತಮಗಿರುವ 15 ಎಕರೆ ಮಳೆ ಆಶ್ರಿತ ಭೂಮಿಯಲ್ಲಿ ಕೃಷಿಯನ್ನೇ ಉದ್ಯೋಗವನ್ನಾಗಿ ಮಾಡಿಕೊಂಡಿದ್ದಾರೆ. ಅಡಿಕೆ, ತೆಂಗು, ಬಾಳೆ, ಮೆಣಸು, ಶುಂಠಿ ಇತ್ಯಾದಿಗಳನ್ನು ಬೆಳೆಯುವ ಮೂಲಕ ವರ್ಷಕ್ಕೆ ಸುಮಾರು 30 ಲಕ್ಷ ರೂ.ಗೂ ಹೆಚ್ಚು ಆದಾಯ ಪಡೆಯುತ್ತಿದ್ದಾರೆ. ತೋಟ, ಗದ್ದೆಯಲ್ಲಿ ದಿನನಿತ್ಯ 15 ಜನಕ್ಕೆ ಉದ್ಯೋಗ ನೀಡಿ, ಯುವ ಜನರನ್ನು ಕೃಷಿ ರಂಗದಲ್ಲಿ ತೊಡಗಿಸಿದ ತೃಪ್ತಿಯನ್ನು ಹೊಂದಿದ್ದಾರೆ. ಯುವಜನರು ಕೃಷಿ ರಂಗದಲ್ಲೇ ಸ್ವಾವಲಂಬಿ ಆಗಬೇಕು ಎಂಬುದು ಇವರ ಆಶಯ.

* ಸಮೃದ್ಧ ಆದಾಯ ನೀಡುವ ಬೆಳೆಗಳು: ಬಿ.ಜಿ.ಪ್ರಸನ್ನಕುಮಾರ್ ಅವರಿಗೆ ಇರುವ ಒಟ್ಟು 15 ಎಕರೆ ಜಮೀನೂ ಮಳೆ ಆಶ್ರಿತವಾಗಿದೆ. ಸುತ್ತಮುತ್ತ ಯಾವ ನದಿ, ಕೆರೆಗಳೂ ಇಲ್ಲ. ಬೆಳೆಗಳಿಗೆ 3 ಬೋರ್‌ವೆಲ್‌ಗಳೇ ಆಧಾರವಾಗಿವೆ. ಪ್ರಸನ್ನಕುಮಾರ್ ಅವರು 6 ಎಕರೆಯಲ್ಲಿ ತೆಂಗು 350, ಅಡಿಕೆ 700, ಮೆಣಸು 200 ಬಳ್ಳಿ, ಬಾಳೆ 1.500 ಗಿಡಗಳನ್ನು ಬೆಳೆಸಿದ್ದಾರೆ . ಇವೆಲ್ಲವೂ ಸಮೃದ್ಧ ಫಸಲು ನೀಡುತ್ತಿವೆ. ವಾರ್ಷಿಕವಾಗಿ ತೇಗ 100, ಶ್ರೀಗಂಧ 50, ಮಾಧವಿ 100, ಬೀಟೆ 50, ಸಿಲ್ವರ್ 100 ಮರಗಳನ್ನು ಬೆಳೆಸಿದ್ದಾರೆ. 20 ವರ್ಷದಿಂದಲೂ ಇವುಗಳಿಂದ ಆದಾಯ ಬರುತ್ತಿದೆ. ಒಂದೊಂದು ಮರಕ್ಕೂ ಒಂದೊಂದು ಲಕ್ಷ ರೂ. ಪಡೆಯುತ್ತಿದ್ದು, ಇವರ ಕೃಷಿ ಬದುಕು ಸಂತೃಪ್ತವಾಗಿದೆ.

25 ವರ್ಷಗಳ ಹಿಂದೆ ಬಿ.ಜಿ.ಪ್ರಸನ್ನಕುಮಾರ್ ಅವರು ಉದ್ಯೋಗಕ್ಕಾಗಿ ಸಾಕಷ್ಟು ಸಾಹಸ ಮಾಡಿದರು. ಮಾಹಿತಿ ಸಿಂಧು ಯೋಜನೆ ಅಡಿ ಕಂಪ್ಯೂಟರ್ ಅಪರೇಟರ್ ಆಗಿ ಕೆಲ ಸಮಯ ಕೆಲಸ ಮಾಡಿದರು. ನಂತರ ಖಾಸಗಿ ಶಾಲೆಯಲ್ಲಿ ಶಿಕ್ಷಕರಾಗಿ ಸೇವೆ ಸಲ್ಲಿಸಿದರು. ಆದರೂ ಇನ್ನೊಬ್ಬರ ಕೈ ಕೆಳಗೆ ಮಾಡುವ ಈ ವೃತ್ತಿಗಳು ಅಷ್ಟಾಗಿ ಖುಷಿ ಕೊಡಲಿಲ್ಲ. ಬದುಕು ಏಕೋ ಸಂಕಷ್ಟ ಎನಿಸಿತು. ಅಷ್ಟರಲ್ಲಿ ತಂದೆ ಗೋವಿಂದೇಗೌಡರಿಗೆ ಆರೋಗ್ಯ ವ್ಯತ್ಯಾಸ ಆಯಿತು. ಈ ಸಂದರ್ಭ ಅವರು ಸಂಪೂರ್ಣವಾಗಿ ಕೃಷಿಯನ್ನೇ ಅವಲಂಬಿಸಿದರು. ಕೋಟಿ ವಿದ್ಯೆಗಳಲ್ಲಿ ಮೇಟಿ ವಿದ್ಯೆಯೇ ಮೇಲು ಎಂದು ಬಲವಾಗಿ ನಂಬಿದರು. ನಂತರ ಸಾಧನಾ ಪಥದಲ್ಲೇ ಸಾಗಿದರು. ಎಂದಿಗೂ ಹಿಂದಿರುಗಿ ನೋಡಲೇ ಇಲ್ಲ.

ಬರಡು ಭೂಮಿ ಹಸಿರಾಯಿತು:

ಪದವೀಧರ ಪ್ರಸನ್ನ ಅವರು ಹೊಸ ಹೊಸ ತಂತ್ರಜ್ಞಾನ ಬಳಸಿ ಕೃಷಿ ಮಾಡಲು ಆರಂಭಿಸಿದರು. ಇದರಿಂದ ಹೆಚ್ಚು ಆದಾಯ ಗಳಿಕೆ ಆಯಿತು. ನೀರೇ ಇಲ್ಲದ ಜಮೀನಿನಲ್ಲಿ ಕೃಷಿ ಸಾಧನೆ ಮಾಡುವುದು ಇವರಿಗೆ ದೊಡ್ಡ ಸವಾಲು ಕೂಡ ಆಗಿತ್ತು. ಆದರೂ ಹೆದರದೇ ಬೋರ್‌ವೆಲ್ ತೆಗೆಸಿದರು. ಅಲ್ಲಿ ಉತ್ತಮ ನೀರು ಬಂತು. ಬರಡು ಭೂಮಿಯು ಹಸಿರು ಬೆಳೆಯುವ ಕ್ಷೇತ್ರವಾಯಿತು. ಹತ್ತಾರು ಜನಕ್ಕೆ ಉದ್ಯೋಗವೂ ದೊರಕಿತು. ಇವರ ಕೃಷಿ ಬದುಕು ಹಲವರಿಗೆ ಮಾದರಿಯಾಗಿದೆ.

*

ಕುಟುಂಬದ ಬೆಂಬಲ:

ಒಂದೇ ಪ್ರದೇಶದಲ್ಲಿರುವ ಜಮೀನಿನಲ್ಲಿ ಪ್ರಸನ್ನ ಅವರು ತೆಂಗು, ಅಡಕೆ, ಬಾಳೆ, ಶುಂಠಿ,

ಹಲಸು, ಮಾವು, ಮಹಾಘನಿ ಸೇರಿದಂತೆ ವಾಣಿಜ್ಯ ಬೆಳೆಗಳನ್ನೂ ಬೆಳೆದಿದ್ದಾರೆ.

ಮಾವು, ನಿಂಬೆ, ಪಪ್ಪಾಯ, ಸೀಬೆಗಳು ಅವರಿಗೆ ಉಪ ಆದಾಯವನ್ನೂ ತಂದು ಕೊಟ್ಟಿವೆ.

ಆಡು ಮುಟ್ಟದ ಸೊಪ್ಪಿಲ್ಲ ಎನ್ನುವಂತೆ ಪ್ರಸನ್ನ ಕುಮಾರ್ ಬೆಳೆಯದ ಬೆಳೆಗಳೇ ಇಲ್ಲ.

ಒಂದೇ ಭೂಮಿಯಲ್ಲಿ ಹತ್ತಾರು ಫಸಲು ಪಡೆಯುವ ಅವರು, ಮಿಶ್ರ ಬೇಸಾಯಕ್ಕೆ

ಮಾದರಿ ಎನಿಸಿದ್ದಾರೆ. ಕುಟುಂಬದಲ್ಲಿ ಎಲ್ಲರೂ ಅಕ್ಷರ ಜ್ಞಾನ ಉಳ್ಳವರಾಗಿರುವುದರಿಂದ

ಕೃಷಿ ಸಾಧನೆಗೂ ಸಹಕಾರ ನೀಡಿ, ಹೆಚ್ಚು ಲಾಭ ಪಡೆಯಲು ನೆರವಾಗಿದ್ದಾರೆ.

*

ಹೊಗೆಸೊಪ್ಪು ಬೆಳೆಯಲ್ಲಿ ದಾಖಲೆ: ತಾಲೂಕಿನಲ್ಲಿ ಅತಿ ಹೆಚ್ಚು ಹೊಗೆಸೊಪ್ಪು ಬೆಳೆಯುವ ಕೃಷಿಕರಾಗಿರುವ ಪ್ರಸನ್ನ, 9 ಎಕರೆ ಪ್ರದೇಶವನ್ನು ಇದಕ್ಕಾಗಿ ಮೀಸಲು ಇರಿಸಿದ್ದಾರೆ. ಪ್ರತಿವರ್ಷ ಸುಮಾರು 8 ಸಾವಿರ ಕೆಜಿ ಹೊಗೆಸೊಪ್ಪು ಬೆಳೆಯುವ ಕೀರ್ತಿಗೆ ಭಾಜನರಾಗಿದ್ದಾರೆ. ಇದಕ್ಕಾಗಿ 20 ಜನ ಕೆಲಸಗಾರರನ್ನು ಇರಿಸಿಕೊಂಡಿದ್ದಾರೆ. ತಂಬಾಕು ಮಂಡಳಿ ಮತ್ತು ಕೃಷಿ ಇಲಾಖೆ ನೀಡುವ ಎಲ್ಲ ಸಲಹೆ, ಸೂಚನೆ ಪಾಲಿಸಿ ಸಾಧನೆ ಮಾಡಿದ್ದಾರೆ.

ಹೈನುಗಾರಿಕೆ: ತೆಂಗಿನ ಮರದಿಂದ ಎಳನೀರು ಫಸಲನ್ನು ವರ್ಷಕ್ಕೆ 5 ಬಾರಿ ಕಟಾವು ಮಾಡುತ್ತಾರೆ. ಹಸುಗಳನ್ನೂ ಪಾಲನೆ ಮಾಡಿರುವ ಇವರು ಪ್ರತಿದಿನ ಬೆಳಗ್ಗೆ ಮತ್ತು ಸಂಜೆ 30 ಲೀಟರ್ ಹಾಲು ಮಾರಾಟ ಮಾಡುತ್ತಾರೆ. ಮೇಕೆ ಮತ್ತು ಕೋಳಿಗಳನ್ನೂ ಸಾಕಿದ್ದಾರೆ. ಇವೆಲ್ಲವೂ ಆದಾಯ ಬರುವ ಮೂಲಗಳಾಗಿವೆ.

* ನೆಮ್ಮದಿಯ ಬದುಕು ನಮ್ಮದು: ಕೃಷಿಯನ್ನು ನಂಬಿದ ನಮ್ಮ ಕುಟುಂಬ ನೆಮ್ಮದಿಯಿಂದ ಜೀವನ ಮಾಡುತ್ತಿದೆ ಎನ್ನುತ್ತಾರೆ ಪ್ರಸನ್ನ ಅವರ ಪತ್ನಿ ಬಿ.ಎನ್.ಪುನೀತಾ. ನನ್ನ ಪತಿಗೆ ಸರ್ಕಾರಿ ಹುದ್ದೆ ಸಿಗುತ್ತದೆ ಎಂಬ ನಿರೀಕ್ಷೆ ಇತ್ತು. ಆದರೆ ಈಗ ಅದಕ್ಕಿಂತಲೂ ಹೆಚ್ಚಾದ ಕೃಷಿಯನ್ನು ನಂಬಿ ಆರಾಮಾಗಿ ಇದ್ದೇವೆ. ಹೈನುಗಾರಿಕೆಯೂ ನಮಗೆ ಆಧಾರವಾಗಿದೆ. ನಾವೇ ಹತ್ತಾರು ಜನಕ್ಕೆ ಉದ್ಯೋಗ ನೀಡಿದ ತೃಪ್ತಿಯೂ ಇದೆ ಎನ್ನ್ನುತ್ತಾರೆ ಅವರು.

*

ಕೋಟ್)

ಉದ್ಯೋಗಕ್ಕಾಗಿ ವಿದ್ಯಾವಂತರು ಅಲೆಯಬಾರದು. ನಮಗೆ ಇರುವ ಭೂಮಿಯಲ್ಲೇ ಕೃಷಿ ಮಾಡಬೇಕು. ಅಲ್ಲಿ ಎಷ್ಟೇ ಕಷ್ಟವಿದ್ದರೂ ಅದಕ್ಕೆ ಪರಿಹಾರ ಕಂಡುಕೊಳ್ಳಬೇಕು. ಎಲ್ಲೋ ಹಣವನ್ನು ವ್ಯಯ ಮಾಡುವ ಬದಲು ಅದನ್ನು ಜಮೀನಿನ ಮೇಲೆ ಹಾಕಿ ಅಭಿವೃದ್ಧಿ ಮಾಡಬೇಕು. ಮಿಶ್ರ ಕೃಷಿ ಎಂದಿಗೂ ಲಾಭದಾಯಕವಾಗಿದೆ. ಇದರೊಂದಿಗೆ ವಾಣಿಜ್ಯ ಬೆಳೆಗಳೂ ನನಗೆ ಆದಾಯದ ಮೂಲವಾಗಿವೆ. ರೈತನೇ ಈ ದೇಶದ ಬೆನ್ನೆಲುಬು. ಆದ್ದರಿಂದ ಕೃಷಿಯನ್ನು ನಂಬಿ ಬದುಕುವುದೇ ನನ್ನ ಧ್ಯೇಯವಾಗಿದೆ.

ಬಿ.ಜಿ.ಪ್ರಸನ್ನಕುಮಾರ್

ಬಿ.ಜಿ.ಪ್ರಸನ್ನಕುಮಾರ್