ವಿಶೇಷ ದಿನಗಳಲ್ಲಿ ಭಕ್ತರಿಗೆ ದೇವರ ದರ್ಶನ ಸುಲಭವಾಗಲಿ

ಶನಿವಾರ ನಗರದ ಶ್ರೀಕಂಠೇಶ್ವರ ದೇವಾಲಯದ ದಾಸೂಹ ಸಭಾಂಗಣದಲ್ಲಿ ಇತ್ತೀಚೆಗೆ ರಚನೆಯಾದ ವ್ಯವಸ್ಥಾಪನ ಪದಾಧಿಕಾರಿಗಳು ಮತ್ತು ಕಾರ್ಯನಿರ್ವಾಹಕ ಅಧಿಕಾರಿಗಳ ಸಭೆ ನಡೆಸಿದರು. ಕಳೆದ ಸಭೆಯ ಅನುಪಾಲನ ವರದಿ ವಿಚಾರ ಚರ್ಚಿಸಲಾಯಿತು.

ದೇವಾಲಯದಲ್ಲಿ ಅಗಮಿಕರನ್ನು ಒಳಗೊಂಡಂತೆ ನೌಕರರ ಸಂಖ್ಯೆ, ದೇವಾಲಯದ ಆವರಣದಲ್ಲಿ ಪೂಜಾ ಸಮಯ, ಪೂಜೆಗೆ ತಗಲುವ ವೆಚ್ಚ, ಕೊಠಡಿಗಳ ವಿವರ ಮತ್ತು ದರಗಳ ಪ್ರತ್ಯೇಕ ನಾಮಫಲಕ ಅಳವಡಿಕೆ, ವಿಶೇಷ ದಿನಗಳಾದ ಹುಣ್ಣಿಮೆ, ಭಾನುವಾರ, ಶಿವರಾತ್ರಿ ದಿನಗಳಲ್ಲಿ ಬಾಡಿಗೆ ಶಾಮಿಯಾನ ಹಾಕುವ ಬದಲು ದೇವಾಲಯಕ್ಕೆ ಸ್ವಂತ ಶಾಮಿಯಾನ ಕೊಳ್ಳುವ ಬಗ್ಗೆ ಚಿರ್ಚಿಸಿದರು.

ಇತ್ತೀಚಿನ ದಿನಗಳಲ್ಲಿ ಪ್ರಸಾದದ ಗುಣಮಟ್ಟ, ಪ್ರಮಾಣ ಕಡಿಮೆಯಾಗುತ್ತಿರುವ ಬಗ್ಗೆ, ಭಕ್ತರಿಗೆ ಅನುಕೂಲವಾಗುವಂತೆ ದೇವಾಲಯದ ಆವರಣದಲ್ಲಿ ಎಟಿಎಂ ಸ್ಥಾಪನೆ, ಮಿನಿ ಕೆಎಸ್‌ಆರ್‌ಟಿಸಿ ಬಸ್ ನಿಲ್ದಾಣ, ಸ್ನಾನ ಘಟಕದಲ್ಲಿ ಮಹಿಳೆಯರಿಗೆ ವಸ್ತ್ರ ಬದಲಿಸುವ ಕೊಠಡಿಗಳು ಹಾಗೂ ಬಿಸಿ ನೀರಿನ ವ್ಯವಸ್ಥೆ, ದಾಸೋಹದಲ್ಲಿ ಊಟದ ಜತೆಯಲ್ಲಿ ಪಲ್ಯ ಸೇರಿಸುವ ಕುರಿತು ಸುದೀರ್ಘವಾಗಿ ಚರ್ಚೆ ನಡೆಸಲಾಯಿತು.

ನಂತರ ಮಾಧ್ಯಮದವರ ಜತೆ ಮಾತನಾಡಿದ ಶಾಸಕ ದರ್ಶನ್ ಧ್ರುವನಾರಾಯಣ್, ಸರ್ಕಾರದ ವತಿಯಿಂದ ದೇವಾಲಯಕ್ಕೆ ವ್ಯವಸ್ಥಾಪನ ಸಮಿತಿ ರಚನೆ ಮಾಡಲಾಗಿದೆ. ಅಧ್ಯಕ್ಷರಿಗೆ ಮತ್ತು ಸಮಿತಿ ಸದಸ್ಯರಿಗೆ ಸಂಪೂರ್ಣ ಜವಾಬ್ದಾರಿ ನೀಡಲಾಗಿದೆ. ಶಾಸಕರು, ಸಂಸದರಿಗೆ ಸಮಯದ ಅಭಾವ ಇರುವುದರಿಂದ ಅಧಿಕಾರ ವರ್ಗೀಕರಣಗೊಳಿಸಿ ಅಧಿಕಾರ ನೀಡಲಾಗಿದೆ ಎಂದರು.

ಹಬ್ಬ-ಹರಿದಿನ ಮತ್ತು ವಿಶೇಷ ದಿನಗಳಲ್ಲಿ ಭಕ್ತರಿಗೆ ಅನಾನುಕೂಲವಾಗದಂತೆ ದರ್ಶನದ ವ್ಯವಸ್ಥೆ, ಕುಡಿಯುವ ನೀರು, ಶೌಚಗೃಹ ಇತರ ಮೂಲ ಸೌಕರ್ಯಗಳನ್ನು ನೋಡಿಕೊಳ್ಳಬೇಕು. ವಾರದ ಏಳು ದಿನವೂ ಮುಂಜಾನೆ ಉಪಾಹಾರ, ಮಧ್ಯಾಹ್ನ ಹಾಗೂ ಸಂಜೆ ಪ್ರಸಾದದಲ್ಲಿ ವಿವಿಧ ಬಗೆಯ ಪಲ್ಯ ಸೇರಿಸಬೇಕು. ಕೆಲವೇ ದಿನಗಳಲ್ಲಿ ದೇವಾಲಯದ ಆವರಣದಲ್ಲಿ ಮಿನಿ ಬಸ್ ನಿಲ್ದಾಣ, ಸ್ನಾನಘಟ್ಟದಲ್ಲಿ ಮಹಿಳೆಯರಿಗೆ ಸುಸಜ್ಜಿತವಾದ ಕೊಠಡಿ ಮತ್ತು ಸೋಲಾರ್‌ನಿಂದ ಬಿಸಿ ನೀರಿನ ವ್ಯವಸ್ಥೆ ಮಾಡಲಾಗುವುದು ಎಂದು ಹೇಳಿದರು.

ಎರಡು ವರ್ಷಕ್ಕಿಂತ ಹೆಚ್ಚಿನ ಅವಧಿಯಲ್ಲಿ ನಂಜನಗೂಡಿನಲ್ಲಿ ಸೇವೆ ಸಲ್ಲಿಸಿದ ಅಧಿಕಾರಿಗಳ ವರ್ಗಾವಣೆಗೆ ಶಿಫಾರಸು ಮಾಡಲಾಗುವುದು. ಆನೆ ಗೌರಿ ಆರೋಗ್ಯವಾಗಿದ್ದು ಅರಣ್ಯ ಸಚಿವರ ಜತೆ ಪತ್ರ ವ್ಯವಹಾರ ಮುಂದುವರಿದಿದೆ. ಇದರ ಬಗ್ಗೆ ಮತ್ತೊಮ್ಮೆ ಅಧಿಕಾರಿಗಳ ಜತೆ ಚರ್ಚಿಸಿ ಆನೆಯನ್ನು ನಂಜನಗೂಡಿಗೆ ತರಲು ಪ್ರಯತ್ನಿಸುತ್ತೇನೆ ಎಂದರು.

ದೇವಸ್ಥಾನ ಕಾರ್ಯನಿರ್ವಾಹಕ ಅಧಿಕಾರಿ ಕೃಷ್ಣ, ದೇವಸ್ಥಾನ ವ್ಯವಸ್ಥಾನ ಸಮಿತಿ ಅಧ್ಯಕ್ಷ ಬಸವೇಗೌಡ, ನಗರಸಭಾ ಪೌರಯುಕ್ತರಾದ ಬಸವರಾಜ್, ಗೋವಿಂದ ರಾಜ್, ಗೋಪಾಲಕೃಷ್ಣ, ಶ್ರೀಧರ್, ಗೋಪಾಲ್, ಎ.ಆರ್. ಮಹೇಶ್, ಮಹದೇವಮ್ಮ, ನಂಜಮಣಿ ಮತ್ತಿತರ ಅಧಿಕಾರಿಗಳು ಹಾಜರಿದ್ದರು.