ಮೈವಿವಿಯಿಂದ ಬಾಬೂಜೀ ಕುರಿತ ಏಳು ಕೃತಿ ಸಂಪುಟ ಸಿದ್ಧ

ಮೈವಿವಿ ಡಾ.ಬಾಬು ಜಗಜೀವನರಾಮ್ ಅಧ್ಯಯನ, ಸಂಶೋದನೆ ಮತ್ತು ವಿಸ್ತರಣ ಕೇಂದ್ರದಲ್ಲಿ ಶನಿವಾರ ಆಯೋಜಿಸಿದ್ದ ಭಾರತದ ಸಂವಿಧಾನ ಮತ್ತು ಸಾಮಾಜಿಕ ನ್ಯಾಯ ಕುರಿತು ವಿಚಾರ ಸಂಕಿರಣದಲ್ಲಿ ಮಾತನಾಡಿದರು.

ದಲಿತ ಹಕ್ಕುಗಳಿಗೆ ಹೋರಾಟ ನಡೆಸಿದ ಮಾಜಿ ಉಪಪ್ರಧಾನಿ ಬಾಬೂಜೀ ಕುರಿತು ಸಾಹಿತ್ಯ ಇರಲಿಲ್ಲ. ಈ ಕೊರತೆ ನೀಗಿಸಲು ನಮ್ಮ ಕೇಂದ್ರದಿಂದ ಈಗಾಗಲೇ 8 ಪ್ರಕಟಣೆಗಳು ಹೊರಬಂದಿವೆ. ಶೀಘ್ರದಲ್ಲೇ 7 ಸಂಪುಟಗಳು ಹೊರಬರಲಿವೆ. ಇದರಿಂದ ಬಾಬೂಜಿ ಕುರಿತು ಅಧ್ಯಯನ, ಸಂಶೋಧನೆಗೆ ಆಕರಗಳು ದೊರೆಯಲಿವೆ ಎಂದರು. 

ನಮ್ಮ ಕೇಂದ್ರದಿಂದ ಸಾಮಾಜಿಕ ನ್ಯಾಯ ಮತ್ತು ಸಬಲೀಕರಣ ವಿಷಯದಲ್ಲಿ ಎಂ.ಎ.ಕೋರ್ಸ್ ಶುರು ಮಾಡಿದ್ದು, ಪ್ರಸ್ತಕ ಸಾಲಿನಲ್ಲಿ 21 ವಿದ್ಯಾರ್ಥಿಗಳಲ್ಲಿ 17 ಜನರು ಪರೀಕ್ಷೆಗೆ ಹಾಜರಾಗಿದ್ದಾರೆ. ಈ ಕೋರ್ಸ್‌ಗೆ ದಾಖಲಾಗಲು ವಿದ್ಯಾರ್ಥಿಗಳು ಮುಂದೆ ಬರಬೇಕು. ಜತೆಗೆ ಬಿ.ಎ.ಹಂತದಲ್ಲೂ ಈ ಕೋರ್ಸ್ ಸೇರ್ಪಡೆ ಮೈವಿವಿಗೆ ಪ್ರಸ್ತಾವನೆ ಸಲ್ಲಿಸಲಾಗಿದೆ.

 ಹೀಗಾದರೆ, ಸ್ನಾತಕದಲ್ಲಿ ಕಲಿತವರು ಸ್ನಾತಕೋತ್ತರ ಪದವಿಯಲ್ಲೂ ಇದೇ ವಿಷಯವನ್ನು ಓದುವ ಅವಕಾಶ ಸಿಗಲಿದೆ ಎಂದರು. 

ನಮ್ಮ ಕೇಂದ್ರಕ್ಕೆ ಪಿಎಚ್.ಡಿ ಮಾರ್ಗದರ್ಶಕರು ಮಂಜೂರಾಗಿದ್ದು, ಇನ್ಮುಂದೆ, ಸಂಶೋಧನಾ ಚಟುವಟಿಕೆಗಳು ಆರಂಭವಾಗಲಿವೆ ಎಂದರು.

14-15ನೇ ಶತಮಾನದ ಸಮಾಜ ಸುಧಾರಕ ಸಂತ ರವಿದಾಸ್ ಕುರಿತು ಫೆಬ್ರುವರಿ 2ನೇ ವಾರದಲ್ಲಿ ವಿಚಾರ ಸಂಕಿರಣ ಆಯೋಜಿಸಲು ಉದ್ದೇಶಿಸಲಾಗಿದೆ. ದೇಶ-ವಿದೇಶದಲ್ಲಿ 20 ಕೋಟಿ ಅನುಯಾಯಿಗಳಿರುವ ಈ ಸಂತರ ಕುರಿತು ಚರ್ಚೆ, ಸಮಾಲೋಚನೆಯಾಗಬೇಕಿದೆ. ಅದಕ್ಕಾಗಿ ಈ ಕಾರ್ಯಕ್ರಮ ಏರ್ಪಡಿಸಲಾಗುತ್ತಿದೆ ಎಂದು ತಿಳಿಸಿದರು. 

ದಲಿತರ ಸಬಲೀಕರಣಕ್ಕಾಗಿ ರೂಪಗೊಂಡ ‘ಆದಿ ಚಳವಳಿ’ ರೂವಾರಿ, ಉತ್ತರ ಪ್ರದೇಶದಲ್ಲಿ ದಲಿತ ಚಳವಳಿಯ ಮೂಲ ಪುರುಷ ಎಂದು ಗುರುತಿಸಿರುವ ಸ್ವಾಮಿ ಅಚ್ಚುತಾನಂದರ ಕುರಿತು ವಿಚಾರ ಸಂಕಿರಣ ಹಮ್ಮಿಕೊಳ್ಳಲಾಗುವುದು. ರವಿದಾಸ್, ಅಚ್ಚುತಾನಂದ ಕುರಿತು ಸಾಹಿತ್ಯ ಕೃತಿಗಳಿಲ್ಲ. ಹೀಗಾಗಿ, ವಿಚಾರ ಸಂಕಿರಣ ಬೇರೆ ಕಡೆಗಳಿಂದ ಸಂಪನ್ಮೂಲ ವ್ಯಕ್ತಿಗಳನ್ನು ಕರೆಸುವ ಮೂಲಕ ಇದನ್ನು ಸಕಾರಾಗೊಳಿಸಲಾಗುವುದು ಎಂದು ತಿಳಿಸಿದರು.

ವಕೀಲ ಎಂ.ಶಿವಪ್ರಸಾದ್ ಮಾತನಾಡಿ, ಸಾಮಾಜಿಕ ನ್ಯಾಯ ಪರಿಣಮಕಾರಿ ಜಾರಿಯಿಂದ ಡಾ.ಅಂಬೇಡ್ಕರ್ ಕನಸು ಸಹಕಾರಗೊಳ್ಳಲಿದೆ ಎಂದರು.

ಸಮ ಸಮಾನತೆಯ ಮನಸ್ಥಿತಿಯೇ ಸಾಮಾಜಿಕ ನ್ಯಾಯ. 12ನೇ ಶತಮಾನದಲ್ಲೇ ಬಸವಣ್ಣನವರ ಅನುಭವ ಮಂಟಪದಲ್ಲಿ ಕಾರ್ಯರೂಪಕ್ಕೆ ತಂದಿದ್ದರು. ಆದರೀಗ, ದುರ್ಬಲಗೊಂಡಿರುವ ಇದನ್ನು ಈಗಲಾದರೂ ಜಾರಿಗೆ ತರದಿದ್ದರೆ ಸಮಾಜ ಪ್ರಗತಿ ಕಷ್ಟಕರ ಎಂದರು.

ಸಂವಿಧಾನವನ್ನು ಪ್ರತಿಯೊಬ್ಬರು ಓದಬೇಕು. ಈ ಕುರಿತು ಅರಿವು ಮೂಡಿಸುವಲ್ಲಿ ವ್ಯವಸ್ಥೆಯೇ ವಿಫಲವಾಗಿದೆ. ಸಂವಿಧಾನವನ್ನು ಅರ್ಥ ಮಾಡಿಕೊಳ್ಳದಿದ್ದರೆ ಸಾಮಾಜಿ ನ್ಯಾಯದ ಕುರಿತು ಮಾತನಾಡುವ ನೈತಿಕತೆ ಇರಲ್ಲ. ಜಾತಿ, ಧರ್ಮ ಕಾರಣಕ್ಕಾಗಿ ಹಲ್ಲೆ, ದೌರ್ಜನ್ಯ, ಕೊಲೆಗಳು ನಡೆಯುತ್ತಿರುವುದು ಸಮಾಜ ತಲೆತಗ್ಗಿಸುವಂತಹ ಸಂಗತಿಯಾಗಿದೆ ಎಂದರು.

ಉತ್ತರಪ್ರದೇಶದ ಅಲಹಾಬಾದ್ ವಿಶ್ವವಿದ್ಯಾಲಯದ ಜಿ.ಬಿ.ಪಂತ್ ಸಮಾಜ ವಿಜ್ಞಾನ ಸಂಸ್ಥೆ ಪ್ರಾಧ್ಯಾಪಕ ಡಾ.ಚಂದ್ರಯ್ಯ ಗೋಪಾನಿ, ಮೈವಿವಿ ಕಾನೂನು ಶಾಲೆಯ ಉಪನ್ಯಾಸಕಿ ಎ.ಅನನ್ಯಾ, ಜೆಎಸ್‌ಎಸ್ ಕಾನೂನು ಕಾಲೇಜಿನ ಸಹಾಯಕ ಪ್ರಾಧ್ಯಾಪಕರಾದ ಡಾ.ಎ.ಟಿ.ಜಗದೀಶ್, ಎಸ್.ನರೇಂದ್ರ, ಮುಕ್ತ ವಿವಿ ರಾಜ್ಯಶಾಸ್ತ್ರದ ಸಹಪ್ರಾಧ್ಯಾಪಕಿ ಡಾ.ಎಸ್.ಎಸ್.ಜಾಹ್ನವಿ ಇತರರು ಇದ್ದರು.