ಮೈವಿವಿ 106ನೇ ಘಟಿಕೋತ್ಸವ: 30,966 ಅಭ್ಯರ್ಥಿಗಳಿಗೆ ಪದವಿ ಪ್ರದಾನ

ವಿವಿ ಕಾರ್ಯಸೌಧವಾಗಿರುವ ಕ್ರಾಫರ್ಡ್ ಭವನದಲ್ಲಿ ನಡೆಯುವ ಕಾರ್ಯಕ್ರಮದಲ್ಲಿ ಕುಲಾಧಿಪತಿಯೂ ಆಗಿರುವ ರಾಜ್ಯಪಾಲ ಥಾವರ್‌ಚಂದ ಗೆಹಲೋತ್ ಅವರು ವಿವಿಧ ಪದವಿ ಪ್ರದಾನ ಮಾಡಲಿದೆ.

ಕನ್ನಡ ಚಲನಚಿತ್ರ ನಿರ್ದೇಶಕ, ನಿರ್ಮಾಪಕ ಎಸ್.ವಿ.ರಾಜೇಂದ್ರ ಸಿಂಗ್ ಬಾಬು, ನಿವೃತ್ತ ಐಎಎಸ್ ಅಧಿಕಾರಿ, ಕರ್ನಾಟಕ ರಾಜ್ಯ ಮಾನವ ಹಕ್ಕುಗಳ ಆಯೋಗದ ಅಧ್ಯಕ್ಷ ಡಾ.ಟಿ.ಶ್ಯಾಮ್ ಭಟ್ ಮತ್ತು ನಗರದ ಗ್ಲೋಬಲ್ ಏಜುಕೇಷನ್ ಟ್ರಸ್ಟ್‌ನ ಅಧ್ಯಕ್ಷ ಪಿ.ಜಯಚಂದ್ರ ರಾಜು ಅವರಿಗೆ ಗೌರವ ಡಾಕ್ಟರೇಟ್ ಪದವಿಯನ್ನೂ ನೀಡಲಾಗುತ್ತದೆ. 

ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯ ವಿಶ್ರಾಂತ ಅಧ್ಯಕ್ಷ ಡಾ.ಎಸ್.ಸೋಮನಾಥ್ ಘಟಿಕೋತ್ಸವ ಭಾಷಣ ಮಾಡಲಿದ್ದಾರೆ. 

ಉನ್ನತ ಶಿಕ್ಷಣ ಸಚಿವ ಡಾ.ಎಂ.ಸಿ.ಸುಧಾಕರ್ ಪಾಲ್ಗೊಳ್ಳಲಿದ್ದಾರೆ ಎಂದು ಕುಲಪತಿ ಪ್ರೊ.ಎನ್.ಕೆ.ಲೋಕನಾಥ್ ಶನಿವಾರ ಸಂಜೆ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದರು. ಪರೀಕ್ಷಾಂಗ ಕುಲಸಚಿ ಪ್ರೊ.ಎನ್.ನಾಗರಾಜ ಇದ್ದರು.

ವಿವಿಧ ವಿಷಯಗಳಲ್ಲಿ 449 ಸಂಶೋಧಕರು ಪಿಎಚ್.ಡಿ ಪದವಿ ಭಾಜನರಾಗಲಿದ್ದು, ಇದರಲ್ಲಿ 211 ಮಹಿಳೆಯರು(ಶೇ.46.99), 238 ಪುರುಷರು(ಶೇ.53) ಇದ್ದಾರೆ. 442 ಪದಕಗಳು, 197 ಬಹುಮಾನಗಳನ್ನು 213 ಅಭ್ಯರ್ಥಿಗಳು ಸ್ವೀಕರಿಸಲಿದ್ದಾರೆ.

 ಇವರಲ್ಲಿ 158 ಮಹಿಳೆಯರು ಎಂಬುದು ವಿಶೇಷ. 5,796 ಅಭ್ಯರ್ಥಿಗಳಿಗೆ ಸ್ನಾತಕೋತ್ತರ ಪದವಿ ನೀಡುತ್ತಿದ್ದು, ಅವರಲ್ಲಿ ಶೇ.61.26ರಷ್ಟು ಮಹಿಳೆಯರು(3551) ಇದ್ದಾರೆ. ಅಂತೆಯೇ 24,721 ಅಭ್ಯರ್ಥಿಗಳಿಗೆ ಸ್ನಾತಕ ಪದವಿಯನ್ನು ಕೊಡಲಾಗುತ್ತದೆ. ಇಲ್ಲಿಯೂ ಮಹಿಳೆಯರ (14,850)ಪ್ರಮಾಣ ಶೇ.60.07ರಷ್ಟಿದೆ.

ಎಂ.ಎಸ್ಸಿ ರಸಾಯನಶಾಸ್ತ್ರ ವಿಷಯದಲ್ಲಿ ಎನ್.ಅದಿತಿ 24 ಪದಕ, 8 ನಗದು ಬಹುಮಾನ ಗಿಟ್ಟಿಕೊಟ್ಟಿದ್ದಾರೆ. ಎಂ.ಎಸ್ಸಿ ಗಣಿತದಲ್ಲಿ ಆರ್.ಪುನೀತ್ 6 ಪದಕ, 2 ನಗದು ಬಹುಮಾನ, ಬಿ.ಎಸ್ಸಿಯಲ್ಲಿ ಟಿ.ಹರ್ಮೈನ್ 6 ಪದಕ, 5 ನಗದು ಬಹುಮಾನ, ಬಿಎ-ಎಲ್‌ಎಲ್‌ಬಿಯಲ್ಲಿ ನಯನಾ ಪಾಂಡೆ 1 ಪದಕ, ಎಲ್‌ಎಲ್‌ಎಂನಲ್ಲಿ ಕೆ.ಶ್ರುತಿ 4 ಪದಕ, 3 ನಗದು ಬಹುಮಾನ ಸ್ವೀಕರಿಸಲಿದ್ದಾರೆ.

ವಾಣಿಜ್ಯ ವಿಭಾಗ: ಬಿ.ಕಾಂ.ನಲ್ಲಿ ಬುಷರ್ ಕೌಸರ್ 3 ಪದಕ, 3 ನಗದು ಬಹುಮಾನ, ಎಂ.ಕಾ.ನಲ್ಲಿ ಎಂ.ಸುಮಲತಾ 7 ಪದಕ, 2 ನಗದು ಬಹುಮಾನ ಪಡೆದುಕೊಳ್ಳಲಿದ್ದಾರೆ. 

ಶಿಕ್ಷಣ ವಿಭಾಗ: ಬಿಪಿ.ಇಡಿನಲ್ಲಿ ಎನ್.ಅವಿನಾಶ್ 5 ಪದಕ, 1 ನಗದು ಬಹುಮಾನ, ಎಂ.ಇಡಿನಲ್ಲಿ ಎಚ್.ಪಿ.ದೇವಕರ್ 5 ಪದಕ, 3 ನಗದು ಬಹುಮಾನ ಸ್ವೀಕರಿಸುವರು.