ಮೈಸೂರು 18ನೇ ಸ್ಥಾನಕ್ಕೆ ಕುಸಿತ

ಕಳೆದ ಬಾರಿ ಒಟ್ಟಾರೆ ಶೇ.74.30ರಷ್ಟು ಫಲಿತಾಂಶ ಪಡೆದು 12 ಸ್ಥಾನ ಪಡೆದಿತ್ತು. ಈ ಬಾರಿ ಶೇ.10.30ರಷ್ಟು ಹೆಚ್ಚಿನ ಫಲಿತಾಂಶ ಪಡೆದರೂ ರಾಜ್ಯದ ಒಟ್ಟಾರೆ ಜಿಲ್ಲೆಗಳ ಫಲಿತಾಂಶದಲ್ಲಿ ಕಳೆದ ಬಾರಿಗಿಂತಲೂ 6 ಸ್ಥಾನ ಕುಸಿತ ಕಂಡಿದೆ.

ಈ ಬಾರಿ ಟಾಪ್ 10ರ ಒಳಗೆ ಜಿಲ್ಲೆಯನ್ನು ತರಲು ಸವಾಲಾಗಿ ಸ್ವೀಕರಿಸಿದ ಜಿಲ್ಲೆಯ ಪದವಿ ಪೂರ್ವ ಶಿಕ್ಷಣ ಇಲಾಖೆಯ ಅಧಿಕಾರಿಗಳು, ಫಲಿತಾಂಶ ಉತ್ತಮಪಡಿಸಲು ಹಲವು ಕಾರ್ಯಕ್ರಮ ರೂಪಿಸಿತ್ತು. ಅದರಂತೆ ಈ ಬಾರಿ ಜಿಲ್ಲೆಯ ಒಟ್ಟಾರೆ ಫಲಿಶಾಂತ ಏರಿಕೆಯಾದರೂ, ರಾಜ್ಯ ಮಟ್ಟದಲ್ಲಿ ಜಿಲ್ಲೆಯ ರ‌್ಯಾಂಕ್ ಮಾತ್ರ ಇಳಿಕೆ ಕಂಡಿದೆ. ಈ ಬಾರಿ ಫಲಿತಾಂಶ ಹೆಚ್ಚಳಕ್ಕಾಗಿ ಮೇಲಿಂದ ಮೇಲೆ ಎಲ್ಲ ಕಾಲೇಜಿನ ಪ್ರಾಂಶುಪಾಲ ಸಭೆ ನಡೆಸಿದಲ್ಲದೆ, ವಿಶೇಷ ತರಗತಿಗಳೊಂದಿಗೆ ಶೈಕ್ಷಣಿಕ ಚಟುವಟಿಕೆಗಳ ಪೂರಕ ಯೋಜನೆಗಳನ್ನು ರೂಪಿಸಲಾಗಿದ್ದರೂ ಜಿಲ್ಲೆಯನ್ನು ಟಾಪ್ 10 ಒಳಗೆ ತರುವಲ್ಲಿ ವಿಫಲವಾಗಿದೆ.

ಈ ಬಾರಿ ಒಟ್ಟು 35,265 ವಿದ್ಯಾರ್ಥಿಗಳು ಪರೀಕ್ಷೆ ಎದುರಿಸಿದ್ದು, ಇದರಲ್ಲಿ 28,390 ವಿದ್ಯಾರ್ಥಿಗಳು ತೇರ್ಗಡೆಯಾಗಿದ್ದಾರೆ. ಈ ಪೈಕಿ ಹೊಸದಾಗಿ 32,374 ವಿದ್ಯಾರ್ಥಿಗಳು, 2,199 ಪುನರಾವರ್ತಿತ, ಖಾಸಗಿಯಾಗಿ 692 ವಿದ್ಯಾರ್ಥಿಗಳು ಪರೀಕ್ಷೆ ಬರೆದಿದ್ದರು. ಈ ಪೈಕಿ ಹೊಸದಾಗಿ ಪರೀಕ್ಷೆ ಬರೆದಿದ್ದ 32,374 ವಿದ್ಯಾರ್ಥಿಗಳಲ್ಲಿ 27,454 ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದು, ಶೇ.80.8ರಷ್ಟು ಫಲಿತಾಂಶ ಬಂದಿದೆ. ಪರೀಕ್ಷೆ ಬರೆದ 2,199 ಪುನರಾವರ್ತಿತ ವಿದ್ಯಾರ್ಥಿಗಳ ಪೈಕಿ 590 ವಿದ್ಯಾರ್ಥಿಗಳು ಪಾಸಾಗಿದ್ದು, ಕೇವಲ ಶೇ.26.83 ಫಲಿತಾಂಶ ಬಂದಿದೆ. 692 ಖಾಸಗಿಯಾಗಿ ವಿದ್ಯಾರ್ಥಿಗಳ ಪೈಕಿ 346 ವಿದ್ಯಾರ್ಥಿಗಳು ತೇರ್ಗಡೆಯಾಗಿದ್ದು, ಶೇ.50 ಫಲಿತಾಂಶ ಬಂದಿದೆ.

ಹೆಣ್ಣು ಮಕ್ಕಳೇ ಮೇಲುಗೈ:

ಈ ಬಾರಿಯೂ ಜಿಲ್ಲೆಯಲ್ಲಿ ಹೆಣ್ಣು ಮಕ್ಕಳೇ ಮೇಲುಗೈ ಸಾಧಿಸಿದ್ದಾರೆ. ಪರೀಕ್ಷೆ ಬರೆದ 19,846 ವಿದ್ಯಾರ್ಥಿನಿಯರ ಪೈಕಿ 17,028 ವಿದ್ಯಾರ್ಥಿನಿಯರು ಪಾಸಾಗಿದ್ದು, ಶೇ. 85.8 ಫಲಿತಾಂಶ ಬಂದಿದೆ. ಪರೀಕ್ಷೆ ಬರೆದ 15,419 ವಿದ್ಯಾರ್ಥಿಗಳ ಪೈಕಿ 11,362 ವಿದ್ಯಾರ್ಥಿಗಳು ತೇರ್ಗಡೆಗೊಂಡಿದ್ದು, ಶೇ.73.69 ಫಲಿತಾಂಶ ದೊರೆತಿದೆ.

ನಗರದ ನಾರಾಯಣ ಶಾಸಿ ರಸ್ತೆಯ ಸದ್ವಿದ್ಯಾ ಕಾಲೇಜಿನ ಕೆ.ಚಿತ್ರಾ ಸ್ಫೂರ್ತಿ ವಾಣಿಜ್ಯ ವಿಷಯದಲ್ಲಿ 597 (ಶೇ.99.50) ಅಂಕ ಪಡೆದು ರಾಜ್ಯಕ್ಕೆ ನಾಲ್ಕನೇ ರ‌್ಯಾಂಕ್ ಪಡೆಯುವ ಜತೆಗೆ ಜಿಲ್ಲೆಗೆ ಟಾಪರ್ ಆಗಿದ್ದಾಳೆ.

ವಿಜಯನಗರದ ಎರಡನೇ ಹಂತದ ಸದ್ವಿದ್ಯಾ ಸೆಮಿ ರೆಸಿಡೆನ್ಸಿಯಲ್ ಪಿಯು ಕಾಲೇಜಿನ ಡಿ.ಎಸ್.ಧನ್ವಿ ವಿಜ್ಞಾನ ವಿಷಯದಲ್ಲಿ 597 ಅಂಕ ಪಡೆದು ರಾಜ್ಯಕ್ಕೆ ಮೂರನೇ ರ‌್ಯಾಂಕ್ ಪಡೆಯುವ ಜತೆಗೆ ಜಿಲ್ಲೆಗೆ ಟಾಪರ್ ಆಗಿದ್ದಾಳೆ.

ನಗರದ ಮರಿಮಲ್ಲಪ್ಪ ಪದವಿ ಪೂರ್ವ ಕಾಲೇಜಿನ ವಿದ್ಯಾರ್ಥಿನಿ ಹೀರಾ ಎಂ.ಕಂಬಲಿ ಕಲಾ ವಿಷಯದಲ್ಲಿ 590 (ಶೇ.98.33)ಅಂಕ ಪಡೆದು ಜಿಲ್ಲೆಗೆ ಪ್ರಥಮ ಸ್ಥಾನ ಪಡೆದಿದ್ದಾಳೆ.