ಶ್ರೀಕಂಠೇಶ್ವರನಿಗೆ ಲಕ್ಷ ಬಿಲ್ವಾರ್ಚನೆ ಸೇವೆ

ಶ್ರಾವಣ ಮಾಸದ ವಿಶೇಷ ಪೂಜೆಗಳಲ್ಲೊಂದಾದ ಲಕ್ಷ ಬಿಲ್ವಾರ್ಚನೆ ಸೇವೆಯನ್ನು ಪ್ರತಿ ಬಾರಿಯೂ ಮೂರನೇ ಸೋಮವಾರ ನಡೆಸಲಾಗುತ್ತಿತ್ತು. ಆದರೆ ಕಾರಣಾಂತರಗಳಿಂದ ನಾಲ್ಕನೇ ಹಾಗೂ ಶ್ರಾವಣ ಮಾಸದ ಕೊನೆಯ ಸೋಮವಾರದಂದು ಲಕ್ಷ ಬಿಲ್ವಾರ್ಚನೆ ಸೇವೆಯನ್ನು ನಡೆಸಲಾಯಿತು.

ಸ್ವಾಮಿಗೆ ಪ್ರಧಾನ ಅರ್ಚಕರಾದ ನಾಗಚಂದ್ರ ದೀಕ್ಷಿತ್ ಅವರ ಮಾರ್ಗದರ್ಶನದಲ್ಲಿ ಮುಂಜಾನೆ 6 ಗಂಟೆಯಿಂದಲೇ ಮಹಾ ರುದ್ರಾಭಿಷೇಕ ಪೂರ್ವ, ಉಷಾ ಕಾಲ, ಮಾಧ್ಯಮ ಕಾಲ, ಸಂಗಮಕಾಲ ಹಾಗೂ ಸಂಧ್ಯಾ ಕಾಲದ ಅಭಿಷೇಕಗಳನ್ನು ನೆರವೇರಿಸಲಾಯಿತು. ಸ್ವಾಮಿಗೆ ವಿಷೇಶವಾಗಿ ಬೆಳ್ಳಿಯ ಕೊಳಗ ತೊಡಿಸಿ, ವಿವಿಧ ಬಗೆಯ ಪುಷ್ಪಗಳಿಂದ ಅಲಂಕರಿಸಲಾಗಿತ್ತು.

ಸ್ವಾಮಿಯ ಎಡ, ಬಲ ಭಾಗದಲ್ಲಿ ಬೆಳ್ಳಿಯ ವಿಘ್ನೇಶ್ವರನನ್ನು ಪ್ರತಿಷ್ಠಾಪಿಸಲಾಗಿತ್ತು. ಸಂಜೆ 6.30ರ ಸುಮಾರಿಗೆ ಪಾರ್ವತಿ ಸಮೇತ ಶ್ರೀಕಂಠೇಶ್ವರ ಸ್ವಾಮಿಗೆ ಮಹಾ ಮಂಗಳಾರತಿ ನೆರವೇರಿಸಲಾಯಿತು.

ಶ್ರಾವಣ ಮಾಸದ ನಾಲ್ಕನೇ ಸೋಮವಾರದಂದು ನಡೆಯುವ ಈ ಲಕ್ಷ ಬಿಲ್ವಾರ್ಚನೆ ಸೇವೆ ಮತ್ತು ಸ್ವಾಮಿಯ ಅಲಂಕಾರವನ್ನು ನೋಡಲು ವಿವಿಧೆಡೆಯಿಂದ ಸಹಸ್ರಾರು ಸಂಖ್ಯೆಯಲ್ಲಿ ಭಕ್ತರು ಆಗಮಿಸಿದ್ದರು.