ಜಪಾನ್‌ನ ‘ಸಕುರಾ ಸೈನ್ಸ್ ಎಕ್ಸ್‌ಚೇಂಜ್’ ಮೈಸೂರಿನ ಕೆ.ಮೋನಿಷಾ ಆಯ್ಕೆ

ಮೈಸೂರು: ಜೆಎಸ್‌ಎಸ್ ಕಲಾ, ವಾಣಿಜ್ಯ ಮತ್ತು ವಿಜ್ಞಾನ ಕಾಲೇಜಿನಲ್ಲಿ ಸ್ನಾತಕೋತ್ತರ ರಸಾಯನಶಾಸ್ತ್ರ ವಿಷಯ ಅಧ್ಯಯನ ಮಾಡುತ್ತಿರುವ ವಿದ್ಯಾರ್ಥಿನಿ ಕೆ.ಮೋನಿಷಾ ಜಪಾನ್‌ನ ‘ಸಕುರಾ ಸೈನ್ಸ್ ಎಕ್ಸ್‌ಚೇಂಜ್’ ಕಾರ್ಯಕ್ರಮಕ್ಕೆ ಆಯ್ಕೆಯಾಗಿದ್ದಾರೆ.

ಶೈಕ್ಷಣಿಕ, ಸಂಶೋಧನೆ, ವಿವಿಧ ವಿಷಯ ಜ್ಞಾನ ಹಾಗೂ ಕೌಶಲ ಸಂಬಂಧಿತ ಚಟುವಟಿಕೆಗಳಿಗೆ ಅನುಕೂಲವಾಗುವಂತೆ ಜಪಾನ್‌ನ  ಹೊಕೈಡೊ ವಿಶ್ವವಿದ್ಯಾಲಯದೊಂದಿಗೆ ನಗರದ ಊಟಿ ರಸ್ತೆಯಲ್ಲಿರುವ ಜೆಎಸ್‌ಎಸ್ ಕಲಾ, ವಾಣಿಜ್ಯ ಮತ್ತು ವಿಜ್ಞ್ಞಾನ ಕಾಲೇಜು ಒಡಂಬಡಿಕೆ ಮಾಡಿಕೊಂಡಿದೆ. 

ಈ ಒಡಂಬಡಿಕೆಯಡಿ ಮಾ.2ರಿಂದ 8ರವರೆವಿಗೆ ಜಪಾನ್‌ನ ಸೈನ್ಸ್ ಆ್ಯಂಡ್‌ಟೆಕ್ನಾಲಜಿ ಏಜೆನ್ಸಿ ಪ್ರಾಯೋಜಿತ ಸಕುರಾ ಸೈನ್ಸ್ ಎಕ್ಸ್‌ಚೇಂಜ್ ಕಾರ್ಯಕ್ರಮದ ವಿವಿಧ ಶೈಕ್ಷಣಿಕ ಚಟುವಟಿಕೆಯಲ್ಲಿ ಭಾಗವಹಿಸಲು ಆಯ್ಕೆಯಾಗಿರುವ ಮೋನಿಷಾ ಜಪಾನ್ ಪ್ರವಾಸ ಕೈಗೊಳ್ಳುತ್ತಿದ್ದಾರೆ ಎಂದು  ಕಾಲೇಜಿನ ಮುಖ್ಯ ಕಾರ್ಯನಿರ್ವಾಹಕ ಪ್ರೊ.ಬಿ.ವಿ.ಸಾಂಬಶಿವಯ್ಯ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.