ಸಲಿಂಗಕಾಮದಿಂದ ಎಚ್‌ಐವಿ ಸೋಂಕು ಹೆಚ್ಚಳ: ಸಚಿವ ದಿನೇಶ್ ಗುಂಡೂರಾವ್

ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ, ಕರ್ನಾಟಕ ರಾಜ್ಯ ಏಡ್ಸ್ ಪ್ರಿವೆನ್ಷನ್ ಸೊಸೈಟಿ ಸಹಯೋಗದಲ್ಲಿ ನಗರದ ಜೆ.ಕೆ. ಮೈದಾನದ ಅಮೃತ ಮಹೋತ್ಸವ ಸಭಾಂಗಣದಲ್ಲಿ ಸೋಮವಾರ ಆಯೋಜಿಸಿದ್ದ ರಾಜ್ಯ ಮಟ್ಟದ ವಿಶ್ವ ಏಡ್ಸ್ ದಿನಾಚರಣೆ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದರು.

ಸಲಿಂಗ ಕಾಮದಿಂದ ಎಚ್‌ಐವಿ ಸೋಂಕು ಹೆಚ್ಚು ಹರಡುವಿಕೆ ಕಂಡುಬರುತ್ತಿದೆ. ಡೇಟಿಂಗ್ ಆ್ಯಪ್ ಹಾವಳಿ, ಹಾಸ್ಟೆಲ್‌ಗಳಲ್ಲಿ ಯುವಕರು ಒಂದೆಡೆ ಇರುವುದರಿಂದ ಅಸುರಕ್ಷಿತ ಲೈಂಗಿಕ ಸಂಪರ್ಕಕ್ಕೆ ಒಳಗಾಗುತ್ತಿದ್ದಾರೆ. ಸಲಿಂಗಕಾಮ ಅಪರಾಧ ಚಟುವಟಿಕೆಯಲ್ಲ ಎಂದು ಸುಪ್ರಿಂಕೋರ್ಟ್ ಘೋಷಿಸಿದೆ. ಹಾಗಾಗಿ, ಸುರಕ್ಷಿತ ಲೈಂಗಿಕ ಸಂಪರ್ಕದ ಕುರಿತು ಯುವಜನರಲ್ಲಿ ಅರಿವು ಮೂಡಿಸಬೇಕಿದೆ ಎಂದರು.

ವಲಸೆ, ನಿರಂತರ ಓಡಾಟ, ಸಾರಿಗೆ ವಾಹನಗಳ ಚಾಲಕರಿಂದ ರಾಜ್ಯದಲ್ಲಿ ಎಚ್‌ಐವಿ ಸೋಂಕಿತರ ಸಂಖ್ಯೆ ಅಧಿಕವಾಗಲು ಮುಖ್ಯ ಕಾರಣವಾಗಿದೆ. ರಾಜ್ಯ ‘ಬಿ’ ಜಿಲ್ಲೆಗಳಲ್ಲೇ ಇದು ಹೆಚ್ಚು ಹರಡುತ್ತಿದೆ. ಬೆಳಗಾವಿ, ವಿಜಯಪುರ, ಬಾಗಲಕೋಟೆ, ಬೆಂಗಳೂರು ಗ್ರಾಮಾಂತರ, ಬೆಂಗಳೂರು ನಗರ ಜಿಲ್ಲೆಗಳಲ್ಲಿ ಸೋಂಕಿತರ ಸಂಖ್ಯೆ ಅಧಿಕವಾಗಿದ್ದು, ಅಗ್ರ 15 ಪಟ್ಟಿ ಒಳಗೆ ಮೈಸೂರು ಜಿಲ್ಲೆಯೂ ಸ್ಥಾನ ಪಡೆದುಕೊಂಡಿದೆ ಎಂದು ಮಾಹಿತಿ ನೀಡಿದರು.

ರಾಜ್ಯದಲ್ಲಿ 2030ರ ಹೊತ್ತಿಗೆ ಎಚ್‌ಐವಿ ಪ್ರಕರಣಗಳನ್ನು ಶೂನ್ಯಕ್ಕೆ ಇಳಿಸುವ ಗುರಿ ಹಾಕಿಕೊಳ್ಳಲಾಗಿದೆ. ಅದಕ್ಕಾಗಿ ಸೋಂಕು ತಡೆಗೆ ಕ್ರಮ, ಏಡ್ಸ್‌ಪೀಡಿತರ ಸಾವಿನ ನಿಯಂತ್ರಣ, ಸೋಂಕಿತರ ಕುರಿತು ತಾರತಮ್ಯ, ಅವರಿಗೆ ಉಂಟಾಗುತ್ತಿರುವ ಕಳಂಕ ಮತ್ತು ಮುಜುಗರ ಹೋಗಲಾಡಿಸಲೂ ಕ್ರಮ ವಹಿಸಲಾಗುತ್ತಿದೆ ಎಂದು ತಿಳಿಸಿದರು.

ಜಗತ್ತಿನಲ್ಲಿ 1981ರಲ್ಲಿ ಪ್ರಥಮ ಎಚ್‌ಐವಿ ಪ್ರಕರಣ ಪತ್ತೆಯಾಯಿತು. ಬಳಿಕ ಭಾರತದಲ್ಲಿ 1986ರಲ್ಲಿ ಮೊದಲ ಕೇಸು ಕಾಣಿಸಿಕೊಂಡಿತು. ಆಗ ಇದು ಭಯ, ಭೀತಿಯನ್ನೇ ಸೃಷ್ಟಿಸಿತ್ತು. ಔಷಧ, ಚಿಕಿತ್ಸೆ ಇರಲಿಲ್ಲ. ಅದು ಹೇಗೆ ಹರಡುತ್ತದೆಂಬುದೂ ತಿಳಿದಿರಲಿಲ್ಲ. 

ಇದರಿಂದ ಲಕ್ಷಾಂತರ ಜನರು ಬಲಿಯಾದರು. ರಾಜ್ಯದಲ್ಲಿ 2004ರಿಂದ ಈವರೆಗೆ 1.16 ಲಕ್ಷ ಜನರು ಮೃತಪಟ್ಟಿದ್ದಾರೆ. ಅಮೆರಿಕ, ಯುರೋಪ್‌ನಲ್ಲಿ ಈ ಸಂಖ್ಯೆ ಇನ್ನೂ ಅಧಿಕವಾಗಿದೆ. ಇದೀಗ ಆ ಪರಿಸ್ಥಿತಿ ಇಲ್ಲ ಎಂದರು.

ಎಚ್‌ಐವಿ/ಏಡ್ಸ್ ರೋಗ ಸಹ ರಕ್ತದೊತ್ತಡ, ಮಧುಮೇಹದಂತೆ ಸಾಮಾನ್ಯ ಕಾಯಿಲೆಯಷ್ಟೇ. ಎಚ್‌ಐವಿ ಸೋಂಕಿತರಿಗೆ ಎಆರ್‌ಟಿ(ಆಂಟಿರೆಟ್ರೊವೈರಲ್ ಥೆರಪಿ) ಚಿಕಿತ್ಸೆ ನೀಡಲಾಗುತ್ತಿದ್ದು, ಇದು ವೈರಸ್‌ನ ಬೆಳವಣಿಗೆ ಮತ್ತು ರೋಗನಿರೋಧಕ ಶಕ್ತಿ ಕ್ಷೀಣಿಸುವುದನ್ನು ತಡೆಯುತ್ತದೆ. 

ಇದರಿಂದ ಸೋಂಕಿತ ವ್ಯಕ್ತಿಗಳು ಆರೋಗ್ಯಕರ, ಸುದೀರ್ಘ ಜೀವನ ನಡೆಸಬಹುದು. ಸಾಮಾನ್ಯ ಬದುಕಿಗೂ ಯಾವುದೇ ತೊಂದರೆ ಇಲ್ಲ. ನಿರಂತರವಾಗಿ ಔಷಧ ತೆಗೆದುಕೊಳ್ಳುವುದರೊಂದಿಗೆ ಎಲ್ಲರಂತೆ ಸಹಜೀವನ ಮುನ್ನಡೆಸಬಹುದಾಗಿದೆ ಎಂದರು.

ಸೋಂಕು ಹರಡುವ ಸಾಧ್ಯತೆ ಹೆಚ್ಚಿರುವ ಲೈಂಗಿಕ ಕಾರ್ಯಕರ್ತರು, ತೃತೀಯ ಲಿಂಗಿಗಳನ್ನು ನಿರಂತರ ತಪಾಸಣೆ ಮಾಡಿ ಜಾಗೃತಿ ಮೂಡಿಸಲಾಗುತ್ತಿದೆ. ಸೋಂಕಿತ ತಾಯಿಯಿಂದ ಮಗುವಿಗೆ ಹರಡದಂತೆ 6 ರಿಂದ 18 ವಾರಗಳ ವೈದ್ಯಕೀಯ ಉಪಚಾರ ಮಾಡಲಾಗುತ್ತಿದೆ ಎಂದು ತಿಳಿಸಿದರು.

ಶಾಸಕ ಕೆ.ಹರೀಶ್‌ಗೌಡ, ಎಂಎಲ್‌ಸಿ ಸಿ.ಎನ್.ಮಂಜೇಗೌಡ, ಕನ್ನಡ ಪುಸ್ತಕ ಪ್ರಾಧಿಕಾರದ ಮಾನಸ, ಡಿಎಚ್‌ಒ ಡಾ.ಕುಮಾರಸ್ವಾಮಿ, ಮೈಸೂರು ವೈದ್ಯಕೀಯ ಮಹಾವಿದ್ಯಾಲಯ ಮತ್ತು ಸಂಶೋಧನಾ ಸಂಸ್ಥೆಯ ನಿರ್ದೇಶಕಿ ಡಾ.ದಾಕ್ಷಾಯಣಿ ಇನ್ನಿತರರಿದ್ದರು.