ಅಕ್ರಮವಾಗಿ ಸಂಗ್ರಹಿಸಿದ್ದ ಯೂರಿಯಾ ವಶ

ಹುಣಸೂರು-ಮಡಿಕೇರಿ ಹೆದ್ದಾರಿಯ ಕಲ್‌ಬೆಟ್ಟ ಟಿಂಬರ್ ಡಿಪೋ ಬಳಿಯಲ್ಲಿ ನಿರ್ಮಿಸಿದ್ದ ಸಾಲಿಗ್ರಾಮದ ಏಜಾಜ್ ಅಹಮದ್ ಎಂಬುವರಿಗೆ ಸೇರಿದೆ ಎಂದು ಹೇಳಲಾದ ಗುಜರಿ ಗೋಡೌನ್‌ನಲ್ಲಿ ಕೇರಳಕ್ಕೆ ಸಾಗಿಸಲೆಂದು ದಾಸ್ತಾನು ಮಾಡಿದ್ದ ಯೂರಿಯಾ (ಚೀಲಗಳನ್ನು ಸಾರ್ವಜನಿಕರಿಂದ 112ಕ್ಕೆ ಬಂದ ಖಚಿತ ಮಾಹಿತಿ ಮೇರೆಗೆ ಡಿವೈಎಸ್‌ಪಿ ಮತ್ತು ಕೃಷಿ ಇಲಾಖೆ ಅಧಿಕಾರಿಗಳ ತಂಡ ದಾಳಿ ನಡೆಸಿ ವಶಕ್ಕೆ ಪಡೆದಿದೆ.

ದಾಳಿ ವೇಳೆ ಲಾರಿಗಳಿಗೆ ಲೋಡ್ ಮಾಡುತ್ತಿದ್ದ 8-10 ಕಾರ್ಮಿಕರು ಸ್ಥಳದಿಂದ ಕತ್ತಲಿನಲ್ಲಿ ಪರಾರಿಯಾಗಿದ್ದಾರೆ. ರಸಗೊಬ್ಬರದ ಮಾಲೀಕ ಯಾರೆಂಬುದು ತಿಳಿದಿಲ್ಲ. ಆದರೆ ಸ್ಥಳದಲ್ಲಿದ್ದ ಲಾರಿಗಳು ಕೇರಳ ನೋಂದಣಿ ಹೊಂದಿದ್ದರಿಂದ ಯೂರಿಯಾವನ್ನು ಕೇರಳಕ್ಕೆ ಸಾಗಿಸುತ್ತಿರಬಹುದೆಂದು ಶಂಕಿಸಲಾಗಿದೆ. ಇದೀಗ ರಸಗೊಬ್ಬರವನ್ನು ಕೃಷಿ ಇಲಾಖೆಗೆ ಹಸ್ತಾಂತರಿಸಲಾಗಿದೆ. ಹೆದ್ದಾರಿಯ ಕಾಲುವೆ ಪಕ್ಕದಲ್ಲೇ ಮತ್ತೊಂದು ಕೇರಳ ನೋಂದಣಿಯ ಯೂರಿಯಾ ಮೂಟೆ ತುಂಬಿದ್ದ ಗೂಡ್ಸ್ ವಾಹನ ಸಹ ಪತ್ತೆಯಾಗಿದ್ದು, ಈ ವಾಹನವನ್ನು ವಶಕ್ಕೆ ಪಡೆಯಲಾಗಿದೆ.

ಸಬ್ಸಿಡಿ ಗೊಬ್ಬರ ಕೃಷಿಯೇತರ ಬಳಕೆಗೆ:

ಪ್ರತಿ ಯೂರಿಯಾ ಚೀಲದ ಮೂಲ ಬೆಲೆ 2229 ರೂ. ಆಗಿದ್ದು, ಸರ್ಕಾರ ರೈತರ ಅನುಕೂಲಕ್ಕಾಗಿ ಸಬ್ಸಿಡಿ 1962ರೂ.ಗಳಿದ್ದು, ರೈತರಿಗೆ ಪ್ರತಿ 45 ಕೆ.ಜಿ.ಚೀಲಕ್ಕೆ ಕೇವಲ 266.50 ರೂ.ನಂತೆ ಬೆಲೆ ನಿಗದಿಗೊಳಿಸಿದೆ. ಸರ್ಕಾರದ ಅಧಿಕೃತ ಕಂಪನಿಗಳಾದ ಆರ್‌ಸಿಎಫ್, ಪಿಪಿಎಲ್, ಎಂಎಫ್‌ಎಲ್ ಮುಂತಾದ ಕಂಪನಿಗಳ ಹೆಸರನ್ನು ಹೊಂದಿದ ಚೀಲಗಳಿಂದ ಕೃಷಿಯೇತರ ಕೈಗಾರಿಕಾ ಬಳಕೆಗಾಗಿ ಎಂದು ಕೆಂಪು ಅಕ್ಷರದಲ್ಲಿ ಮುದ್ರಿಸಿರುವ ಬ್ಯಾಗ್‌ಗೆ ತುಂಬಿಸಿ ಕೇರಳಕ್ಕೆ ಸಾಗಿಸಲಾಗುತ್ತದೆ. ರಸಗೊಬ್ಬರದ ಅಂಗಡಿಗಳಲ್ಲಿ ಯೂರಿಯಾ ಖರೀದಿಸಿ, ಹೀಗೆ ಚೀಲ ಬದಲಾಯಿಸಿ ಕಳ್ಳ ಮಾರ್ಗದಲ್ಲಿ ಕೇರಳಕ್ಕೆ ಸಾಗಿಸಿ ಹೆಚ್ಚಿನ ಬೆಲೆಗೆ ಫ್ಲೈವುಡ್ ಮತ್ತಿತರ ಕಾರ್ಖಾನೆಗಳಿಗೆ ಮಾರಾಟ ಮಾಡಲಾಗುತ್ತದೆ ಎನ್ನಲಾಗಿದೆ.

ದಾಳಿ ವೇಳೆ ಕೃಷಿ ಇಲಾಖೆ ಸಹಾಯಕ ನಿರ್ದೇಶಕ ಜಾರಿ ದಳದ ಆರ್.ಸತೀಶ್, ಕೃಷಿ ಇಲಾಖೆ ಸಹಾಯಕ ನಿರ್ದೇಶಕ ಅನಿಲ್‌ಕುಮಾರ್, ಕೃಷಿ ಅಧಿಕಾರಿ ಜಯಕುಮಾರ್, ಕೃಷಿ ಅಧಿಕಾರಿ ವೆಂಕಟಾಚಲಪತಿ, ಪೊಲೀಸ್ ಸಿಬ್ಬಂದಿ ಹಾಜರಿದ್ದರು.