ಪತ್ನಿ ಸಾವಿಗೆ ಕಾರಣನಾದ ಪತಿ, ಅತ್ತೆಗೆ 10 ವರ್ಷ ಕಠಿಣ ಶಿಕ್ಷೆ

ಕುವೆಂಪುನಗರದ ಎನ್.ನವೀನ್‌ಕುಮಾರ್ ಹಾಗೂ ರಾಣಿ ಶಿಕ್ಷೆಗೆ ಗುರಿಯಾದ ಅಪರಾಧಿಗಳು.

2017ರಲ್ಲಿ ಎನ್.ನವೀನ್‌ಕುಮಾರ್ ಮತ್ತು ತೇಜಮಣಿ ಮದುವೆಯಾಗಿದ್ದು, 60 ಗ್ರಾಂ ಚಿನ್ನ, ಬಟ್ಟೆ ಇತರ ವಸ್ತುಗಳನ್ನು ನೀಡಿ ಒಟ್ಟು 8ಲಕ್ಷ ರೂ.ವೆಚ್ಚದಲ್ಲಿ ಮದುವೆ ಮಾಡಿಕೊಡಲಾಗಿತ್ತು. ಆದರೆ ಕೆಲವೇ ತಿಂಗಳಲ್ಲಿ ತವರು ಮನೆಯಿಂದ 10 ಲಕ್ಷ ರೂ.ವರದಕ್ಷಿಣೆ ತರುವಂತೆ ಮಾನಸಿಕ ಕಿರುಕುಳ ನೀಡಲಾರಂಭಿಸಿದ್ದಾರೆ. ಅಲ್ಲದೆ ತೇಜಮಣಿಗೆ ಬರುತ್ತಿದ್ದ ಸಂಬಳವನ್ನು ತಮಗೆ ನೀಡಬೇಕು ಎಂದು ಒತ್ತಾಯ ಮಾಡುತ್ತಿದ್ದರೆನ್ನಲಾಗಿದೆ.

ಇವರ ಕಿರುಕುಳದಿಂದ ತೇಜಮಣಿ ತವರು ಮನೆ ಸೇರಿದ್ದರೂ ಅಲ್ಲಿಗೂ ಇಬ್ಬರೂ ಹೋಗಿ ಗಲಾಟೆ ಮಾಡಿ ಹಲ್ಲೆ ನಡೆಸಿದ್ದರೆನ್ನಲಾಗಿದೆ. ಇದರಿಂದ ಬೇಸತ್ತು 2018ರ ಆಗಸ್ಟ್ 7ರಂದು ಅತಿಯಾದ ನಿದ್ರೆ ಮಾತ್ರೆ ನುಂಗಿ ಆಸ್ಪತ್ರೆ ಸೇರಿದ್ದು, ಚಿಕಿತ್ಸೆಗೆ ಸ್ಪಂದಿಸದೆ ಮೃತಪಟ್ಟಿದ್ದರು.

ಈ ಸಂಬಂಧ ಮರಣಪೂರ್ವ ಹೇಳಿಕೆ, ಕುಟುಂಬದವರು ನೀಡಿದ ದೂರಿನ ಮೇರೆಗೆ ವಿಚಾರಣೆ ನಡೆಸಿದ ಎನ್.ಆರ್.ವಿಭಾಗದ ಸಹಾಯಕ ಪೊಲೀಸ್ ಆಯುಕ್ತ ಸಿ.ಗೋಪಾಲ್ ದೋಷಾರೋಪಣಾ ಪಟ್ಟಿ ಸಲ್ಲಿಸಿದ್ದರು.  

 ವಿಚಾರಣೆ ನಡೆಸಿದ 5ನೇ ಅಧಿಕ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯದ ನ್ಯಾಯಾಧೀಶರಾದ ಕೆ.ಎನ್.ರೂಪಾ ಅವರು ವಿವಿಧ ಕಾಲಂ ಅಡಿ ಶಿಕ್ಷೆ ವಿಧಿ ತೀರ್ಪು ನೀಡಿದ್ದಾರೆ. 

ಸರ್ಕಾರದ ಪರ ಅಭಿಯೋಜಕ ಬಿ.ಈ.ಯೋಗೇಶ್ವರ ಅವರು ವಾದ ಮಂಡಿಸಿದ್ದರು.