ಗೋದಾಮಿನಲ್ಲಿ ಹೊಸಹಳ್ಳಿ ಸಂಘದ ಕಚೇರಿ

ತಾಲೂಕಿನ ಹೊಸಹಳ್ಳಿ ಕೃಷಿಪತ್ತಿನ ಸಹಕಾರ ಸಂಘದ ಆಡಳಿತ ಕಚೇರಿ ಇರುವ ಡೋರ‌್ನಹಳ್ಳಿ ಗ್ರಾಮಕ್ಕೆ ಭೇಟಿ ನೀಡಿ ಗೋದಾಮ ವೀಕ್ಷಿಸಿದ ನಂತರ ನಡೆದ ಸನ್ಮಾನ ಸಮಾರಂಭದಲ್ಲಿ ಮಾತನಾಡಿದರು. ಈ ಗೋದಾಮು ನವೀಕರಿಸಿ ನೂತನ ಆಡಳಿತ ಮಂಡಳಿ ಕಚೇರಿ ಮಾಡಲು ಅಗತ್ಯವಿರುವ ಅನುದಾನವನ್ನು ಡಿಸಿಸಿ ಬ್ಯಾಂಕ್ ವತಿಯಿಂದ ಕೋಡಿಸುತ್ತೇವೆ ಎಂದರು.

ಸಂಘಕ್ಕೆ ಕೆಲವು ಗ್ರಾಮಗಳಲ್ಲಿ ಆಸ್ತಿ ಇದ್ದು, ಅದನ್ನು ಹಸ್ತಾಂತರಿಸಲು ಸಂಬಂಧಪಟ್ಟ ಗ್ರಾಮ ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿಗಳಿಗೆ ಡಿಸಿಸಿ ಬ್ಯಾಂಕ್ ವತಿಯಿಂದ ಪತ್ರ ರವಾನೆ ಮಾಡುವಂತೆ ಸೂಚನೆ ನೀಡುತ್ತೇನೆ ಎಂದ ಹೇಳಿದ ಅವರು, 6 ತಿಂಗಳೊಳಗೆ ಈಗಿರುವ ಆಡಳಿತ ಕಚೇರಿ ನವೀಕರಣ ಕಾಮಗಾರಿ ಆರಂಭಗೊಳ್ಳಲು ಸಂಘದ ಆಡಳಿತ ಮಂಡಳಿಯವರು ಶ್ರಮಿಸಬೇಕೆಂದು ಸಲಹೆ ನೀಡಿದರು.

ಸಂಘಕ್ಕೆ 23 ಗ್ರಾಮಗಳು ಸೇರಿದ್ದು, ಆದರೂ 700 ಮಂದಿ ಸಾಲಗಾರ ಕ್ಷೇತ್ರ, 86 ಮಂದಿ ಸಾಲಗಾರರಲ್ಲದ ಮತದಾರರು ಷೇರುದಾರರಾಗಿರುವುದು ಬೇಸರ ತಂದಿದೆ. 23 ಗ್ರಾಮಗಳು ಒಳಪಟ್ಟಿರುವ ಸಂಘಕ್ಕೆ ಕನಿಷ್ಠ 4 ಸಾವಿರ ಷೇರುದಾರ ಸದಸ್ಯರು ಇರಬೇಕು. ಇದಕ್ಕೆ ಜಿಲ್ಲಾ ಬ್ಯಾಂಕ್ ಪ್ರತಿನಿಧಿ ಮತ್ತು ಸಂಘದ ಆಡಳಿತ ಮಂಡಳಿ ಸದಸ್ಯರು ಗ್ರಾಮಗಳಿಗೆ ತೆರಳಿ ರೈತರನ್ನು ಷೇರುದಾರ ಸದಸ್ಯರನ್ನಾಗಿ ಮಾಡಬೇಕೆಂದು ಸೂಚಿಸಿದರು.

ಡಿಸಿಸಿ ಬ್ಯಾಂಕ್‌ಗಳಲ್ಲಿ ಶೇ.1ರಷ್ಟು ಹೆಚ್ಚು ಬಡ್ಡಿದರವನ್ನು ಠೇವಣಿದಾರರಿಗೆ ನೀಡುವುದರಿಂದ ಈ ಭಾಗದ ರೈತಮುಖಂಡರು ಹಾಗೂ ಉಳ್ಳುವರನ್ನು ಮನವೊಲಿಸಿ ಜಿಲ್ಲಾ ಕೇಂದ್ರ ಬ್ಯಾಂಕಿನಲ್ಲಿ ಠೇವಣಿ ಇರಿಸಲು ಮುಂದಾಗಬೇಕೆಂದು ಮನವಿ ಮಾಡಿದ ಅವರು, ಈ ಸಂಘಕ್ಕೆ ಆರ್ಥಿಕವಾಗಿ ಲಾಭ ತಂದುಕೊಡಲು ಪಡಿತರ ವಿತರಣೆ ಮಾಡುವ ಅವಕಾಶ ಕಲ್ಪಿಸಲಾಗುತ್ತದೆ. ಇದರ ಜತೆಗೆ ಆಡಳಿತ ಮಂಡಳಿಯವರು ರಸಗೊಬ್ಬರ ಮತ್ತು ರೈತರ ಕೃಷಿ ಚಟುವಟಿಕೆಗೆ ಬೇಕಾಗುವ ಉಪಕರಣಗಳ ಮಾರಾಟ ಮಾಡಲು ಮುಂದಾಗಬೇಕು. ಇದರಿಂದ ಸಂಘಕ್ಕೆ ಹೆಚ್ಚು ಲಾಭ ಬರಲಿದೆ ಎಂದು ತಿಳಿಸಿದರು.

ಸಹಕಾರ ಸಂಘಗಳಲ್ಲಿ ಶೂನ್ಯ ಬಡ್ಡಿದರದಲ್ಲಿ ಸಾಲ ಪಡೆಯುವ ರೈತರು ಯಾವುದೇ ಕಾರಣಕ್ಕೂ ರಾಷ್ಟ್ರೀಕೃತ ಬ್ಯಾಂಕ್‌ಗಳಲ್ಲಿ ಹಣಕಾಸಿನ ವ್ಯವಹಾರ ಮಾಡಬಾರದು. ಜಿಲ್ಲಾ ಸಹಕಾರ ಬ್ಯಾಂಕಿನಲ್ಲಿ ಉಳಿತಾಯ ಖಾತೆ ತೆರೆದು ತಮ್ಮ ಆರ್ಥಿಕ ವ್ಯವಹಾರಗಳನ್ನು ಮಾಡಬೇಕೆಂದು ಮನವಿ ಮಾಡಿದ ಡಿಸಿಸಿ ಬ್ಯಾಂಕ್ ಅಧ್ಯಕ್ಷರು, ಇದರಿಂದ ಸಹಕಾರ ಸಂಘಗಳು ಆರ್ಥಿಕವಾಗಿ ವೃದ್ಧಿಯಾಗಲಿವೆ ಎಂದು ಅಭಿಪ್ರಾಯಪಟ್ಟರು.

ಹೊಸಹಳ್ಳಿ ಕೃಷಿಪತ್ತಿನ ಸಹಕಾರ ಸಂಘದ ಅಧ್ಯಕ್ಷ ವಿಜಯಕುಮಾರ ಮಾತನಾಡಿ, ಸಂಘದ ಎಲ್ಲ ಅಭಿವೃದ್ಧಿ ಕೆಲಸಗಳಿಗೆ ಎಂಸಿಡಿಸಿಸಿ ಬ್ಯಾಂಕಿನ ಅಧ್ಯಕ್ಷರಾದ ದೊಡ್ಡಸ್ವಾಮೇಗೌಡರು ಸಹಕಾರ ನೀಡಬೇಕೆಂದು ಮನವಿ ಮಾಡಿದರು.

ಉಪಾಧ್ಯಕ್ಷ ರಾಜನಾಯಕ, ನಿರ್ದೇಶಕರಾದ ರಮೇಶ್, ಸುರೇಶ್, ಲಕ್ಷ್ಮಣ್, ವೆಂಕಟೇಗೌಡ, ಹೊಸಹಳ್ಳಿ ರಮೇಶ್, ಜಿಲ್ಲಾ ಬ್ಯಾಂಕ್ ಪ್ರತಿನಿಧಿಗಳಾದ ಟಿ.ಉಮೇಶ್, ಎನ್.ದಿನೇಶ್, ಡಿಸಿಸಿ ಬ್ಯಾಂಕ್ ಸಿಬ್ಬಂದಿ ಎಂ.ಕೆ.ಕಿರಣ್, ಸಂಘದ ಸಿಇಒ ಎಂ.ಜಿ.ಸಂತೋಷ್, ಕಾಂಗ್ರೆಸ್ ಮುಖಂಡರಾದ ಮಾರ್ಚಹಳ್ಳಿ ಶಿವರಾಂ, ಎಲ್.ಪಿ.ರವಿಕುಮಾರ್, ಲೋಕೇಶ್‌ಗುಡ್ಡಪ್ಪ, ಶಿವಯ್ಯ, ಮಹದೇವ್, ಚೌಡಪ್ಪ ಪ್ರಕಾಶ್, ಬಿ.ಎಂ.ಗಿರೀಶ್, ಕೆ.ಎಸ್.ಸುಮನ್, ಹೊಸಹಳ್ಳಿಮಂಜು ಮತ್ತಿತರರು ಇದ್ದರು.