ದೋಷಗಳ ನಿವಾರಕ ಗುಂಜಾನರಸಿಂಹ ಸ್ವಾಮಿ

ಪಟ್ಟಣಕ್ಕೆ ಕಳಸಪ್ರಾಯದಂತಿರುವ ಶ್ರೀ ಗುಂಜಾನರಸಿಂಹಸ್ವಾಮಿ ದೇವಾಲಯ ನರಸೀಪುರದ ಧಾರ್ಮಿಕ ಹಿರಿಮೆಯನ್ನೂ ಹೆಚ್ಚಿಸಿದೆ. ನಾಡಿನ ಜೀವ ನದಿಗಳಾದ ಕಾವೇರಿ, ಕಪಿಲೆ ಸಂಗಮಗೊಳ್ಳುವ ತ್ರಿವೇಣಿ ಸಂಗಮದ ತೀರದಲ್ಲಿ ಶ್ರೀ ಮಹಾಲಕ್ಷ್ಮೀ ಸಮೇತ ಗುಂಜಾನರಸಿಂಹ ಸ್ವಾಮಿ ಉದ್ಭವ ಮೂರ್ತಿಯಾಗಿ ಉತ್ತರ ದಿಕ್ಕಿಗೆ ಮುಖ ಮಾಡಿ ನೆಲೆಗೊಂಡಿದ್ದಾರೆ.

ಸಾವಿರಾರು ವರ್ಷಗಳ ಪೌರಾಣಿಕ ಇತಿಹಾಸವಿರುವ ದೇವಾಲಯ ಪುರಾತತ್ತ್ವ ವಸ್ತುಸಂಗ್ರಹಾಲಯ ಮತ್ತು ಪರಂಪರೆ ಇಲಾಖೆ ನಿಯಂತ್ರಣದಲ್ಲಿದ್ದು, ಧಾರ್ಮಿಕ ಮತ್ತು ದತ್ತಿ ಇಲಾಖೆ ಇದರ ನಿರ್ವಹಣೆ ಹೊಣೆ ಹೊತ್ತಿದೆ. ಪ್ರತಿ ವರ್ಷವೂ ಯುಗಾದಿಯ ದಿನದಂದು ತ್ರಿವೇಣಿ ಸಂಗಮದಲ್ಲಿ ಪುಣ್ಯ ಸ್ನಾನ ಮಾಡಿ ದೇವರ ದರ್ಶನ ಮಾಡುವುದು, ವಿವಿಧ ದೇವರುಗಳ ವಿಗ್ರಹ, ಹುಲಿ ವಾಹನ, ಕೂಟಗಳನ್ನು ಶುದ್ಧೀಕರಿಸಿ ಪೂಜಿಸಿ ಮೆರವಣಿಗೆಯಲ್ಲಿ ಕೊಂಡೊಯ್ಯಲಾಗುತ್ತದೆ.

ಬೆಳಗ್ಗೆ 6.30ರಿಂದ 2.30, ಸಂಜೆ 5 ರಿಂದ ರಾತ್ರಿ 8.30ರವರೆಗೆ ದರ್ಶನಕ್ಕೆ ಅವಕಾಶವನ್ನು ಕಲ್ಪಿಸಲಾಗಿದೆ. ಶ್ರೀ ಮಹಾಲಕ್ಷ್ಮೀ ಅಮ್ಮನವರ ಸಮೇತ ವಿರಾಜಮಾನರಾಗಿರುವ ಗುಂಜಾನರಸಿಂಹ ಸ್ವಾಮಿಗೆ ನಿತ್ಯ ಪೂಜೆ ನಡೆಯಲಿದ್ದು, ಪ್ರತಿ ಮಂಗಳವಾರ ಪಂಚಾಮೃತ ಅಭಿಷೇಕ, ಪ್ರತಿ ಶುಕ್ರವಾರ ಅಮ್ಮನವರಿಗೆ ಅಭಿಷೇಕ ನಡೆಯಲಿದೆ. ಪ್ರತಿ ಹುಣ್ಣಿಮೆಯ ದಿನ ಉತ್ಸವ ಮೂರ್ತಿಯ ಮೆರವಣಿಗೆ ನಡೆಯಲಿದೆ. ನಿತ್ಯವೂ ದೇವಾಲಯಕ್ಕೆ ಬರುವ ಭಕ್ತರು ದೇವರ ದರ್ಶನ ಪಡೆದು, ಪೂಜೆ ಸಲ್ಲಿಸಿ ಪ್ರದಕ್ಷಿಣೆ ಹಾಕಿದ ಬಳಿಕ ಪ್ರವೇಶ ದ್ವಾರದ ಬಳಿ ಮೇಲ್ಬಾಗದಲ್ಲಿರುವ ಹಲ್ಲಿಯನ್ನು ಸ್ಪರ್ಶಿಸಿ ನಿರ್ಗಮಿಸುತ್ತಾರೆ. ಮನೆಯಲ್ಲಿ ಮೈ ಮೇಲೆ ಹಲ್ಲಿ ಬಿದ್ದ ದೋಷಕ್ಕೆ ಇದುವೇ ಪರಿಹಾರ ಎನ್ನಲಾಗಿದೆ.

ಪ್ರತಿ ಮೂರು ವರ್ಷಗಳಿಗೊಮ್ಮೆ ತ್ರಿವೇಣಿ ಸಂಗಮದಲ್ಲಿ ದಕ್ಷಿಣ ಭಾರತದ ಕುಂಭಮೇಳ ನಡೆಯುವ ಹಿನ್ನೆಲೆಯಲ್ಲಿ ನದಿ ತೀರವನ್ನು ಆಧುನೀಕರಣಗೊಳಿಸಲಾಗಿದೆ. ಇತ್ತೀಚೆಗೆ 14 ಲಕ್ಷ ರೂ.ವೆಚ್ಚದಲ್ಲಿ ಕುಡಿಯುವ ನೀರು ಮತ್ತು ವಸ್ತ್ರ ಬದಲಿಸುವ ಕೊಠಡಿಗಳನ್ನು ನಿರ್ಮಿಸುವ ಕಾರ್ಯವನ್ನೂ ಕೈಗೆತ್ತಿಕೊಳ್ಳಲಾಗಿದೆ.

ದೇವಾಲಯ ಹಿನ್ನೆಲೆ

ನದಿಯಲ್ಲಿ ಮಡಿ ಬಟ್ಟೆಗಳನ್ನು ಒಗೆಯುತ್ತಿದ್ದ ಅಗಸನ ಕನಸಿನಲ್ಲಿ ಪ್ರತ್ಯಕ್ಷರಾಗುವ ಶ್ರೀ ಗುಂಜಾನರಸಿಂಹ ಸ್ವಾಮಿ ತನ್ನ ಇರುವಿಕೆಯನ್ನು ಆಜ್ಞಾಪಿಸಿ, ಅದರಂತೆ ಹುತ್ತವನ್ನು ಅಗೆದಾಗ ಶಿಲೆಯ ರೂಪದಲ್ಲಿ ಉದ್ಭವವಾಗುತ್ತಾರೆ. ಗುಡಿ ಕಟ್ಟಲು ತನ್ನ ಬಳಿ ಅಷ್ಟೊಂದು ಹಣವಿಲ್ಲ ವೆಂದು ನಿವೇದಿಸಿಕೊಂಡ ಅಗಸನಿಗೆ ದೇವರೇ ನೀನು ಬಟ್ಟೆ ಒಗೆಯುವ ಕಲ್ಲಿನ ಕೆಳಗೆ ನಿಧಿಯಿದೆ ಎಂದು ಆತನಿಗೆ ಸೂಚಿಸಲಾಗಿ ನದಿ ತೀರದಲ್ಲಿ ಗುಂಜಾ ನರಸಿಂಹಸ್ವಾಮಿಗೆ ಗುಡಿ ಕಟ್ಟಿದ. ಸುತ್ತ ಅಂಕಣದ ಪ್ರಾಂಗಣವನ್ನು ಮೂಗೂರಿನ ಪಾಳೇಗಾರರು ನಿರ್ಮಿಸಿದರು ಎನ್ನಲಾಗಿದೆ. ಅಮೆರಿಕಾದಲ್ಲಿನ ಫ್ಲೊರಿಡಾದ ಮಿಯಾಮಿ ನಗರದಲ್ಲಿ ನೆಲೆಸಿರುವ ಅನಿವಾಸಿ ಭಾರತೀಯ ಡಾ.ರಾಮಾನುಜ ಅಯ್ಯಂಗಾರ್ ಕನಸಿನಲ್ಲಿ ಪ್ರತ್ಯಕ್ಷರಾಗಿ ದೇವಾಲಯವನ್ನು ಜೀರ್ಣೋದ್ಧಾರಗೊಳಿಸುವಂತೆ ಕೋರಿದ ಹಿನ್ನೆಲೆಯಲ್ಲಿ 2010 ರಲ್ಲಿ ದೇವಾಲಯವನ್ನು ಜೀರ್ಣೋದ್ಧಾರಗೊಸಲಾಯಿತು.