ಮೈಸೂರಿನ ದಟ್ಟಗಳ್ಳಿಯ ಮನೆಯೊಂದರಲ್ಲಿ 24 ಲಕ್ಷ ರೂ.ಮೌಲ್ಯದ ಚಿನ್ನಾಭರಣ ಕಳವು

ದಟ್ಟಗಳ್ಳಿಯ ಐ ಬ್ಲಾಕ್ ನಿವಾಸಿ ಎನ್. ಕೋಮಲ ಅವರ ಮನೆಯಲ್ಲಿ ಕಳವು ನಡೆದಿದೆ. ಅನಾರೋಗ್ಯದ ಹಿನ್ನೆಲೆಯಲ್ಲಿ ಕೋಮಲ ಅವರು ಮನೆಗೆ ಬೀಗ ಹಾಕಿ ಏ.29 ರಿಂದ ಬೆಂಗಳೂರಿನಲ್ಲಿರುವ ಮಗನ ಮನೆಯಲ್ಲಿ ವಾಸವಿದ್ದರು. ಈ ನಡುವೆ ಮೇ 31 ರಂದು ಕೋಮಲ ಅವರ ಸಹೋದರ ದಟ್ಟಗಳ್ಳಿಯ ಮನೆಗೆ ಭೇಟಿ ನೀಡಿ ಎಲ್ಲವೂ ಸರಿಯಾಗಿದೆಯೇ ಎಂದು ಪರಿಶೀಲಿಸಿದ್ದರು. ಆದರೆ, ಆ ಸಂದರ್ಭ ಕಳವು ನಡೆದಿರಲಿಲ್ಲ. ಜೂ.12 ರಂದು ಕಮಲ ಹಾಗೂ ಸಹೋದರ ಮನೆಗೆ ಭೇಟಿ ನೀಡಿ ನೋಡಿದಾಗ ಮನೆಯ ಕಿಟಕಿ ಮುರಿದು ಮನೆಯಲ್ಲಿದ್ದ ಚಿನ್ನಾಭರಣವನ್ನು ಕಳ್ಳರು ಕಳವು ಮಾಡಿರುವುದು ಕಂಡು ಬಂತು.

ಮನೆಯಲ್ಲಿದ್ದ 3 ಗ್ರಾಂನ ಒಂದು ಜೊತೆ ಮುತ್ತಿನ ಓಲೆ, 2 ಗ್ರಾಂನ ಒಂದು ಜೊತೆ ಡೈಮಂಡ್‌ಓಲೆ, 4 ಗ್ರಾಂನ ಡೈಮಂಡ್ ಪೆಂಡೆಂಟ್ ಇರುವ ಒಂದು ಚಿನ್ನದ ಸರ, 25 ಗ್ರಾಂನ ಒಂದು ಜೊತೆ ಬಳೆಗಳು, 6 ಗ್ರಾಂನ ಒಂದು ಒತೆ ಚಿನ್ನದ ಕೆಂಪು ಹವಳದ ಓಲೆ, 30 ಗ್ರಾಂನ ಎರಡು ಬೆಳ್ಳಿ ಕುಂಕುಮದ ಬಟ್ಟಲು ಕಳುವಾಗಿದೆ. ಕುವೆಂಪುನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.