ಚಿನ್ನದ ಚೀಟಿ ಹೆಸರಲ್ಲಿ ಧೋಖಾ

ಹಣ ಪಡೆದು ಚಿನ್ನ ನೀಡದೆ ಕಾಣೆಯಾಗಿದ್ದ ವಿವೇಕಾನಂದ ವೃತ್ತದಲ್ಲಿರುವ ಮೋಹನ್ ಜ್ಯುವೆಲರ್ಸ್ ಮಳಿಗೆ ಮಾಲೀಕ ಮೋಹನ್ ಲಾಲ್ ಬಂಧಿತ. ಈತನ ವಿರುದ್ಧ ಸುಮಾರು 160 ಪ್ರಕರಣ ದಾಖಲಾಗಿವೆ. ಈ ಸಂಖ್ಯೆ ಇನ್ನಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ. 

ಈಗಾಗಲೇ ಅಂಗಡಿ, ಮನೆ ಮಹಜರ ನಡೆಸಿರುವ ಪೊಲೀಸರು ತನಿಖೆ ತೀವ್ರಗೊಳಿಸಿದ್ದಾರೆ. ಬಳಿಕ ಎಷ್ಟು ಜನರಿಗೆ ಮೋಸವಾಗಿದೆ? ಎಷ್ಟು ಹಣ? ಎಂಬುದು ಗೊತ್ತಾಗಲಿದೆ.

ರಾಜಸ್ಥಾನ ಮೂಲದ ಮೋಹನ್‌ಲಾಲ್ ಇಲ್ಲಿ ಆಭರಣ ಮಳಿಗೆ ತೆರೆದು, ವ್ಯವಹಾರ ನಡೆಸುತ್ತಿದ್ದ. ಚಿನ್ನ ನೀಡುವುದಾಗಿ ನಂಬಿಸಿ ಗ್ರಾಹಕರಿಂದ 15 ತಿಂಗಳು ಹಣ ಕೊಟ್ಟಿಸಿದ್ದ. ಜತೆಗೆ, ಮಳಿಗೆಯಿಂದ ಎರಡು ತಿಂಗಳ ಹಣ ಸೇರಿಸಿ ಚಿನ್ನಾಭರಣ ನೀಡುವುದಾಗಿ ಭರವಸೆ ನೀಡಿದ್ದ. ಆರಂಭದಲ್ಲಿ ಸುಸೂತ್ರವಾಗಿ ನಡೆದಿತ್ತು. ಹೀಗಾಗಿ, ಎರಡು ಬಾರಿ ಇದೇ ಮಾದರಿಯಲ್ಲಿ ಗ್ರಾಹಕರಿಗೆ ಹಣ ಕಟ್ಟಿಸಿಕೊಂಡು ಚಿನ್ನಾಭರಣ ಕೊಟ್ಟಿದ್ದಾನೆ.

ಆದರೆ, ಈ ಸಲ 500 ರೂಪಾಯಿಂದ ಆರಂಭಿಸಿ, ಎಷ್ಟು ಬೇಕಾದರೂ ಹಣ ಪಾವತಿಸಬಹುದು ಎಂಬ ಹೊಸ ಸ್ಕೀಮ್ ಶುರು ಮಾಡಿದ್ದ. ಬಳಿಕ ಇದ್ದಕ್ಕಿದಂತೆ ಅಂಗಡಿ ಬಂದ್ ಆಗಿತ್ತು. ಮಾಸಿಕ ಕಂತಿನ ಹಣ ಪಾವತಿಸಲು ಬಂದ ಗ್ರಾಹಕರು ಆತಂಕಗೊಂಡಿದ್ದಾರೆ. 

ಮಾಲೀಕರಿಗೆ ಕರೆ ಮಾಡಿದಾಗಲೂ ಮೊಬೈಲ್ ಸ್ವಿಚ್ ಆಫ್ ಆಗಿತ್ತು. ಈ ಕುರಿತು ವಿಜಯನಗರದ ನಿವಾಸಿ ಮುಕುಲ್ ಹೇಮರಾಜ್ ಕುವೆಂಪುನಗರ ಠಾಣೆಗೆ ಮೊದಲು ದೂರು ನೀಡಿದ್ದು,  ಪ್ರಕರಣವನ್ನು ದಾಖಲಿಸಿಕೊಂಡ ಪೊಲೀಸರು, ತನಿಖೆಯನ್ನು ತ್ವರಿತವಾಗಿ ಕೈಗೊಂಡಿದ್ದರು.

ಶ್ರೀರಾಂಪುರದಲ್ಲಿರುವ ಮೋಹನ್‌ಲಾಲ್ ಮನೆಯನ್ನು ಪೊಲೀಸರು ಪರಿಶೀಲಿಸಿದ್ದ ವೇಳೆ ಆತನ ಕುಟುಂಬ ಸಮೇತ ಬೇರೆಡೆ ತೆರಳಿದ್ದ. ಮಂಗಳವಾರ ಮೋಹನ್‌ಲಾಲ್ ಮನೆಗೆ ಬಂದಿರುವ ಮಾಹಿತಿ ತಿಳಿಯುತ್ತಿದ್ದಂತೆ ಪೊಲೀಸರು ಆರೋಪಿಯನ್ನು  ವಶಕ್ಕೆ ಪಡೆದುಕೊಂಡಿದ್ದಾರೆ.

ಕುವೆಂಪುನಗರ ಠಾಣೆಯಲ್ಲಿ ಮೋಹನ್‌ಲಾಲ್ ವಿರುದ್ಧ ಅನೇಕ ಗ್ರಾಹಕರು ದೂರು ನೀಡಿದ್ದು, ಈಗಲೂ ನಿರಂತರವಾಗಿ ದೂರುಗಳು ಸಲ್ಲಿಕೆಯಾಗುತ್ತಿವೆ. ಕೆಲವರು 10 ಸಾವಿರ ರೂ., ಇನ್ನೂ ಕೆಲವರು 1. 44 ಲಕ್ಷ ರೂ. ಕಳೆದುಕೊಂಡು ಮೋಸ ಹೋಗಿದ್ದಾರೆ. ಈ ಎಲ್ಲ ದೂರು ಪರಿಶೀಲಿಸಿದ ಬಳಿಕ ಎಷ್ಟು ಮೊತ್ತ ವಂಚನೆಯಾಗಿದೆ ಎಂಬುದು ಪತ್ತೆಯಾಗಲಿದೆ. ತನಿಖೆ ಮುಂದುವರಿದಿದೆ. ಯಾರಾದರೂ ಮೋಸ ಹೋಗಿದ್ದರೆ ಠಾಣೆಗೆ ಬಂದು ದೂರು ನೀಡಬಹುದು ಎಂದು ಪೊಲೀಸರು ತಿಳಿಸಿದ್ದಾರೆ.

ನಗರದಲ್ಲಿ ಚಿನ್ನತಂಬಿ ಚಿನ್ನ ವಂಚನೆ ಪ್ರಕರಣ ಮಾಸುವ ಮುನ್ನವೇ ಇದು ಮತ್ತೊಂದು ಗೋಲ್ಡ್ ಸ್ಕ್ಯಾಮ್ ಆಗಿದೆ. ನೂರಾರು ಜನ ಚಿನ್ನದ ಆಸೆಗೆ ಮಾಸಿಕ ಕಂತು ಕಟ್ಟಿ ಈಗ ಹಣ ಕಳೆದುಕೊಂಡು ಇದೀಗ ಗೋಳಾಡುತ್ತಿದ್ದಾರೆ.