ಮಾರಣಾಂತಿಕವಾಗಿ ಹಲ್ಲೆ ಮಾಡಿದ್ದ ಐವರಿಗೆ 10 ವರ್ಷ ಶಿಕ್ಷೆ

ಎಚ್.ಡಿ.ಕೋಟೆ ತಾಲೂಕಿನ ಇಟ್ನಾ ಕಾಲನಿಯ ನಿವಾಸಿಗಳಾದ ಕುಮಾರ್, ಸಿದ್ದನಾಯಕ, ಚೆನ್ನಕೇಶವ, ನಿಂಗನಾಯಕ, ಮಹೇಶ್ ಅಪರಾಧಿಗಳು. ಬೊಮ್ಮಸಿದ್ದನಾಯಕ ಹಲ್ಲೆಗೆ ಒಳಗಾದವರು.

2018ರ ಜುಲೈ 2ರಂದು ದಾರಿ ಬಿಡುವ ವಿಚಾರವಾಗಿ ಗುಂಪು ಕಟ್ಟಿಕೊಂಡು ಬಂದು ಗಲಾಟೆ ಮಾಡಿದ್ದರು. ಅಲ್ಲದೆ, ಬೊಮ್ಮನಾಯಕನ ತಲೆಗೆ ರಾಡ್‌ನಿಂದ ಹಲ್ಲೆ ಮಾಡಿದ್ದರು. 

ತೀವ್ರವಾಗಿ ಗಾಯಗೊಂಡಿದ್ದ ಬೊಮ್ಮನಾಯಕ ಎಚ್.ಡಿ.ಕೋಟೆ, ಮೈಸೂರಿನ ಕೆ.ಆರ್. ಆಸ್ಪತ್ರೆ ಮತ್ತು ಬೆಂಗಳೂರಿನ ನಿಮಾನ್ಸ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದಿದ್ದರು. 

ಈ ಕುರಿತು ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸಿದ ಎಚ್.ಡಿ.ಕೋಟೆ ಠಾಣೆಯ ಪೊಲೀಸರು, ಆರೋಪ ಪಟ್ಟಿಯನ್ನು ನ್ಯಾಯಾಲಯಕ್ಕೆ ಸಲ್ಲಿಸಿದ್ದರು.

ವಿಚಾರಣೆ ನಡೆಸಿದ ನ್ಯಾಯಾಧೀಶರಾದ ಟಿ.ಗೋವಿಂದಯ್ಯ ಅವರು ಆರೋಪಿತರ ವಿರುದ್ಧ ಆರೋಪ ಸಾಬೀತಾಗಿದ್ದರಿಂದ ಹತ್ತು ವರ್ಷ ಸಾದಾ ಶಿಕ್ಷೆಯೊಂದಿಗೆ 42,500 ರೂ. ದಂಡ ವಿಧಿಸಿದ್ದಾರೆ. ಸರ್ಕಾರಿ ಅಭಿಯೋಜಕ ಕೆ.ಎಂ.ಶಿವಶಂಕರಮೂರ್ತಿ ಸರ್ಕಾರದ ಪರ ವಾದ ಮಂಡಿಸಿದ್ದರು.