ರಾಗಿ ಮಾರಲು ರೈತರ ಪರದಾಟ

ಹುಣಸೂರು ನಗರದ ಎಪಿಎಂಸಿಯಲ್ಲಿನ ರಾಗಿ ಖರೀದಿ ಕೇಂದ್ರದಲ್ಲಿ ರಾಗಿ ಮಾರಾಟ ಮಾಡಲು ಬಂದ ರೈತರ ವಾಹನಗಳು ಮುಖ್ಯರಸ್ತೆಯ ಬದಿಯಲ್ಲಿ ಸಾಲಾಗಿ ನಿಂರುವುದು.

Published on:

04 Mar 2026, 2:32 pm

ಪ್ರಮುಖ ಮುಖ್ಯಾಂಶಗಳು

ರಾಗಿ ಬೆಂಬಲ ಬೆಲೆ ಖರೀದಿ ಕೇಂದ್ರ
ನೋಂದಾಯಿಸಿಕೊಂಡ ರೈತರು ರಾಗಿ ಮಾರಾಟ ಮಾಡಲು ಪರದಾಡುವಂತಾಗಿದ್ದು

ಹುಣಸೂರು: ರಾಗಿ ಬೆಂಬಲ ಬೆಲೆ ಖರೀದಿ ಕೇಂದ್ರದಲ್ಲಿ ನೋಂದಾಯಿಸಿಕೊಂಡ ರೈತರು ರಾಗಿ ಮಾರಾಟ ಮಾಡಲು ಪರದಾಡುವಂತಾಗಿದ್ದು, ನಿಯಮವನ್ನು ಅನುಸರಿಸಿ ರಾಗಿ ಖರೀದಿಸಬೇಕಾದ ಅಧಿಕಾರಿಗಳು ಒತ್ತಡಗಳಿಗೆ ಮಣಿಯುತ್ತಿದ್ದಾರೆನ್ನುವ ದೂರುಗಳು ರೈತರಿಂದ ಕೇಳಿಬಂದಿದೆ.

ಇದರ ಪರಿಣಾಮ ರೈತರು ಕೇಂದ್ರಕ್ಕೆ ತಂದ ರಾಗಿಯನ್ನು ಮಾರಾಟ ಮಾಡಲು 2-3 ದಿನಗಳ ಕಾಲ ರಸ್ತೆಬದಿಯಲ್ಲೇ ಸಂಸಾರ ಹೂಡುವ ಪರಿಸ್ಥಿತಿ ಬಂದೊದಗಿದೆ. ಫೆ.10ರಂದು ನಗರದ ಎಪಿಎಂಸಿ ಆವರಣದಲ್ಲಿ ಹಾಗೂ ರತ್ನಪುರಿಯಲ್ಲಿ ಕರ್ನಾಟಕ ಆಹಾರ ಮತ್ತು ನಾಗರಿಕ ಸರಬರಾಜು ನಿಗಮದಿಂದ ಕೇಂದ್ರ ಸ್ಥಾಪಿಸಿದ್ದು, ಎಪಿಎಂಸಿ ಕೇಂದ್ರದ ಖರೀದಿ ಕೇಂದ್ರದಲ್ಲಿ ಒಟ್ಟು ರಾಗಿ ಮಾರಾಟಕ್ಕೆ 5021 ರೈತರು ನೋಂದಾಯಿಸಿಕೊಂಡಿದ್ದಾರೆ. ಅಂತೆಯೇ 1ಲಕ್ಷದ 25 ಸಾವಿರದ 102 ಕ್ವಿಂಟಾಲ್ ರಾಗಿಯನ್ನು ಮಾರಾಟ ಮಾಡಬೇಕಿದೆ. ರತ್ನಪುರಿ ಖರೀದಿ ಕೇಂದ್ರದಲ್ಲಿ 231 ರೈತರು ನೋಂದಾಯಿಸಿಕೊಂಡಿದ್ದು, 5,742 ಕ್ವಿಂಟಾಲ್ ರಾಗಿ ಮಾರಾಟ ಮಾಡಲಿದ್ದಾರೆ. ಪ್ರಸಕ್ತ ಸಾಲಿನಲ್ಲಿ ಕ್ವಿಂಟಾಲ್ ರಾಗಿಗೆ 4,886 ರೂ.ಗಳ ಬೆಂಬಲ ಬೆಲೆ ಹಾಗೂ ಭತ್ತಕ್ಕೆ 2369 ರೂ.ಗಳ ಬೆಲೆ ನಿಗದಿಪಡಿಸಲಾಗಿದೆ.

ಹನುಮಂತನ ಬಾಲವಾದ ಕ್ಯೂ...: ಕೇಂದ್ರದ ಅಧಿಕಾರಿಗಳು ಆರಂಭದಿಂದಲೂ ಮೊದಲು ನೋಂದಾಯಿಸಿಕೊಂಡವರಿಗೆ ಮೊದಲು ಮಾರಾಟಕ್ಕೆ ಅವಕಾಶ ಎನ್ನುವ ರೀತಿಯಲ್ಲಿ ಆದುತೆ ಮೇರೆಗೆ ರೈತರಿಗೆ ದಿನಾಂಕ ತಿಳಿಸುವ ಮೂಲಕ ಗೊಂದಲಗಳಿಗೆ ಅವಕಾಶವಿಲ್ಲದಂತೆ ರಾಗಿ ಖರೀದಿಸಲು ಕ್ರಮವಹಿಸಿದ್ದಾರೆ. ದಿನವೊಂದಕ್ಕೆ 50 ರೈತರಿಂದ ಖರೀದಿಸಲು ನಿರ್ಧರಿಸಿ ಅದರಂತೆ ದಿನಾಂಕದ ಟೋಕನ್ ನೀಡಲಾಗುತ್ತಿದೆ. ಆದರೆ ಖರೀದಿ ಕೇಂದ್ರ ಆರಂಭಗೊಂಡು 20 ದಿನಗಳಲ್ಲಿ ಹಿಂದೆಂದೂ ಕಾಣದ ರೀತಿಯಲ್ಲಿ ರೈತರು ರಾಗಿ ತುಂಬಿಕೊಂಡುವ ಬಂದು ನಿಂತಿದ್ದಾರೆ. ಅಂತೆಯೇ ಟ್ರಾೃಕ್ಟರ್‌ಗಳು, ಮಿನಿಲಾರಿಗಳು, ಗೂಡ್ಸ್ ಲಾರಿಗಳು ಸಾಲು ಎಪಿಎಂಸಿ ಆವರಣದಿಂದ ಸರಿಸುಮಾರು ಒಂದು ಕಿ.ಮೀ.ದೂರವಿರುವ ಆಂಜನೇಯಸ್ವಾಮಿ ದೇಗುಲದವರೆಗೂ ಸಾಗಿದೆ. ಎಪಿಎಂಸಿ ಆವರಣದ ತುಂಬೆಲ್ಲ ರಾಗಿ ತುಂಬಿರುವ ರೈತರ ಟ್ರಾಕ್ಟರ್‌ಗಳೇ ಇವೆ. ಮಾತ್ರವಲ್ಲದೆ ಮುಖ್ಯರಸ್ತೆಯ ಆಂಜನೇಯಸ್ವಾಮಿ ದೇಗುಲದವರೆಗೂ ವಾಹನಗಳು ನಿಂತಿವೆ.

ಕಾರಣವೇನು? : ನೋಂದಾಯಿತ ರೈತರಿಗೆ ನಿರ್ದಿಷ್ಟ ದಿನದಂದು ರಾಗಿಯನ್ನು ಖರೀದಿ ಕೇಂದ್ರಕ್ಕೆ ತರಲು ಅಧಿಕಾರಿಗಳು ಸೂಚಿಸುತ್ತಾರೆ. ಆದರೆ ರೈತರು ವಾಹನ ನಿಲುಗಡೆಗೆ ಸ್ಥಳಾವಕಾಶದ ಕೊರತೆಯಾಗಬಹುದೆಂದು ನಿರ್ದಿಷ್ಟ ದಿನದ ಹಿಂದಿನ ದಿನವೇ ವಾಹನ ತಂದು ಮಿಲ್ಲಿಸುತ್ತಿದ್ದಾರೆ. ಅಧಿಕಾರಿಗಳು ನಿಯಮಾನುಸಾರ ನೋಂದಣಿಯಾದ ಮತ್ತು ಟೋಕನ್ ನೀಡಿರುವ ಆಧಾರದಲ್ಲೇ ಖರೀದಿ ಮಾಡಿದರೆ ಅಷ್ಟಾಗಿ ಸಮಸ್ಯೆ ಉದ್ಘವಿಸುವುದಿಲ್ಲ. ಬದಲಾಗಿ ಕೆಲ ಬಲಾಢ್ಯರ ಮಾತಿಗೆ ಬೆಲೆಕೊಟ್ಟು ಸರತಿ ಸಾಲಿನಲ್ಲಿ ತನ್ನ ಪಾಳಿಗಾಗಿ ಕಾಯುವ ರೈತರನ್ನು ಬಿಟ್ಟು ಮಧ್ಯದಲ್ಲಿ ಬಲಾಢ್ಯದಿಂದ ಖರೀದಿಸಲು ಆರಂಭಿಸುತ್ತಿರುವುದೇ ಸಮಸ್ಯೆಯ ಮೂಲ ಕಾರಣ ಎನ್ನುವುದು ರೈತರ ದೂರಾಗಿದೆ. ಕಾಮಗೌಡನಕೊಪ್ಪಲು ಗ್ರಾಮದ ರೈತ ಮಹದೇವ್ ತಾವು ರಾಗಿ ತಂದು ಇಂದಿಗೆ ಮೂರನೇ ದಿನವಾಗಿದ್ದು, ಇನ್ನೂ ಕಿ.ಮೀ.ದೂರದಲ್ಲೇ ಇದ್ದೇನೆ. ನಾನು ಮತ್ತು ನನ್ನ ಪುತ್ರ ಹಗಲು ರಾತ್ರಿ ಪಾಳಿಯಲ್ಲಿ ರಾಗಿಯನ್ನು ಕಾಯುತ್ತಿದ್ದೇವೆ. ದಿನಕ್ಕೆ ಟ್ರ್ಯಾಕ್ಟರ್‌ಗೆ 2 ಸಾವಿರ ಬಾಡಿಗೆ ನೀಡಬೇಕಿದೆ ಎಂದು ಬೇಸರಿಸುತ್ತಾರೆ.

ಖರೀದಿ ಕೇಂದ್ರದ ಅಧಿಕಾರಿಗಳು ಯಾವುದೇ ಒತ್ತಡಕ್ಕೆ ಮಣಿಯಬಾರದು. ಟೋಕನ್ ನೀಡಿದ ಆಧಾರದಂತೆ ಖರೀದಿ ಮಾಡಲಿ. ಸಣ್ಣ ಹಿಡುವಳಿದಾರರೇ ಹೆಚ್ಚಾಗಿದ್ದು, ಅವರನ್ನು ಸಂಕಷ್ಟಕ್ಕೆ ಸಿಲುಕಿಸುವ ವ್ಯವಸ್ಥೆ ಮಾಡಬಾರದು. ಬಂದ ಲಾಭವನ್ನೆಲ್ಲ ಇಲ್ಲೇ ಕಳೆದುಕೊಂಡು ಹೋಗುವಂತಾಗಬಾರದು. ಎಪಿಎಂಸಿ ಕೇಂದ್ರದಲ್ಲಿ ಹೆಚ್ಚಿನ ಸಂಖ್ಯೆಯಲಿ ರೈತರಿದ್ದರೆ, ತಾಲೂಕಿನ ರತ್ನಪುರಿ ಕೇಂದ್ರಕ್ಕೆ ವರ್ಗಾಹಿಸುವ ಕಾರ್ಯವನ್ನು ಕೇಂದ್ರದ ಅಧಿಕಾರಿಗಳು ಮಾಡುವ ಮೂಲಕ ಒತ್ತಡವನ್ನು ಕಡಿಮೆಮಾಡಬಹುದು. ಈ ಕುರಿತು ಅಧಿಕಾರಿಗಳು ಗಮನಹರಿಸಲಿ.

ಹೊಸೂರು ಕುಮಾರ್ ಜಿಲ್ಲಾಧ್ಯಕ್ಷ, ರೈತಸಂಘ

ಖರೀದಿ ಕೇಂದ್ರದಲ್ಲಿ ಹೇಳುವವರು, ಕೇಳುವವರು ಯಾರು ಇಲ್ಲದಂತಾಗಿದೆ. 2-3ದಿನಗಳ ಕಾಲ 10-20 ಕ್ವಿಂಟಾಲ್ ಬೆಳೆದ ರೈತ ಕೈಯಲ್ಲಿದ್ದ ಹಣವನ್ನೆಲ್ಲ ಖರ್ಚು ಮಾಡಿಕೊಂಡು ಮಾರಾಟ ಮಾಡುವ ಪರಿಸ್ಥಿತಿ ತಂದಿದ್ದಾರೆ. ನಿಗದಿತ ದಿನಾಂಕದಂದು ಖರೀದಿಸುವುದು ಅಧಿಕಾರಿಗಳ ಕರ್ತವ್ಯ. ಒತ್ತಡಕ್ಕೆ ಮಣಿಯುವುದಾದರೆ ಕೇಂದ್ರ ಯಾಕೆ ಸ್ಥಾಪಿಸಿದ್ದಾರೆ ಎನ್ನುವುದನ್ನು ತಿಳಿಸಬೇಕು. ಸಾಮಾನ್ಯ ರೈತನಿಗೆ ಅನುಕೂಲವಾಗಲೆಂದು ಖರೀದಿ ಕೇಂದ್ರ ಸ್ಥಾಪಿಸಿ ಅದರ ಉದ್ದೇಶವನ್ನೇ ಬುಡಮೇಲು ಮಾಡಲಾಗುತ್ತಿದೆ.

ಬಿ.ಎನ್.ನಾಗರಾಜಪ್ಪ ಮಾಜಿ ನಿರ್ದೇಶಕ, ಎಪಿಎಂಸಿ, ಹುಣಸೂರು

ದಿನವೊಂದಕ್ಕೆ 50 ರೈತರಿಂದ ರಾಗಿ ಖರೀದಿಸಲಾಗುತ್ತಿದ್ದು, ಅಗತ್ಯ ಕಾರ್ಮಿಕರು ಮತ್ತು ಸ್ಥಳ ಎಲ್ಲವೂ ಇದೆ. ನಿಗದಿತ ದಿನದಂದು ರಾಗಿಯನ್ನು ತನ್ನಿರೆಂದು ರೈತರಿಗೆ ಹಲವು ಬಾರಿ ಮನವಿ ಮಾಡುತ್ತಿದ್ದರೂ ರೈತರು ಧಾವಂತ ತೋರುತ್ತಿದ್ದಾರೆ. ಯಾವುದೇ ಒತ್ತಡಕ್ಕೆ ಮಣಿಯುವ ಪ್ರಶ್ನೆಯೇ ಇಲ್ಲ. ನಿಯಮದಂತೆ ಕಾರ್ ನಿರ್ವಹಿಸಲಾಗುತ್ತಿದೆ. ರೈತರು ದಯವಿಟ್ಟು ಸಹಕಾರ ನೀಡಲಿ.

ಮೈಕೆಲ್ ಫರ್ನಾಂಡೀಸ್ ಖರೀದಿ ಕೇಂದ್ರದ ಅಧಿಕಾರಿ, ರಾಗಿ ಖರೀದಿ ಕೇಂದ್ರ, ಹುಣಸೂರು

Mysore