ಸಮಗ್ರ ಕೃಷಿಯಲ್ಲಿ ಪ್ರಗತಿ ಸಾಧಿಸಿ ರೈತ

‘ಕೋಟಿ ವಿದ್ಯೆಗಿಂತ ಮೇಟಿ ವಿದ್ಯೆಯೇ ಮೇಲು’ ಎಂಬ ನಾಣ್ನುಡಿಯಂತೆ ತಂದೆಯಿಂದ ಬಳುವಳಿಯಾಗಿ ಬಂದ ಬೇಸಾಯ ವಿದ್ಯೆಯನ್ನೇ ಕರಗತ ಮಾಡಿಕೊಂಡಿರುವ ನಾಸಿರ್ ಹುಸೇನ್, ಆರ್‌ಪಿ ಹುಂಡಿ ಗ್ರಾಮದ ಬಳಿ ರಾಜಪರಮೇಶ್ವರಿ ನಾಲೆಯ ತೀರದಲ್ಲಿರುವ ಪಿತ್ರಾರ್ಜಿತ 12 ಎಕರೆ ಜಮೀನಿನಲ್ಲಿ ಎರಡು ದಶಕಗಳ ಅವಿರತ ದುಡಿಮೆ ಮಾಡಿ ಸಾವಿರಾರು ಮರಗಳನ್ನು ಬೆಳೆದು ಹಚ್ಚ ಹಸುರಿನ ವನವನ್ನು ನಿರ್ಮಾಣ ಮಾಡಿದ್ದಾರೆ.

ಯುವ ಉತ್ಸಾಹಿ ರೈತ ನಾಸಿರ್ ಹುಸೇನ್, ವ್ಯಾಪಾರ, ವಹಿವಾಟು ನಡೆಸದೆ ಕೃಷಿಯನ್ನೇ ನೆಚ್ಚಿಕೊಂಡು ದುಡಿಮೆ ಮಾಡಿದ್ದರ ಫಲವಾಗಿ ಕೆಂಪು ಮಣ್ಣಿನ ಭೂಮಿಯಲ್ಲಿ 7 ಸಾವಿರ ಅಡಿಕೆ ಮರ, 200 ತೆಂಗಿನಮರ, 100 ಸಿಲ್ವರ್ ಹಾಗೂ 20 ತೇಗದ ಮರಗಳು ಮುಗಿಲೆತ್ತರಕ್ಕೆ ಬೆಳೆದು ನಿಂತಿವೆ. 2000 ಕಾಫಿ ಗಿಡಗಳು ಫಲ ಬಿಡುವ ಹಂತದಲ್ಲಿವೆ. ಹತ್ತಾರು ಮೆಣಸು ಬಳ್ಳಿಗಳು ಕೂಡ ಅಡಿಕೆ ಮರಗಳ ಎತ್ತರಕ್ಕೆ ಬೆಳೆದು ಹಬ್ಬಿದ್ದರೆ, 2 ಎಕರೆಯಲ್ಲಿ ಬಾಳೆ ಬೆಳೆದು ನಿಂತಿವೆ. 6 ಮಾವು, 5 ಸೀಬೆ, 4 ಸಪೋಟ ಮತ್ತು 2 ನೇರಳೆಯನ್ನು ಬೆಳೆದಿದ್ದಾರೆ. ಇದಲ್ಲದೆ ಗುತ್ತಿಗೆ ಮಾಡಿಕೊಂಡಿರುವ 5 ಎಕರೆ ನಾಲೆ ಬಯಲಿನ ಭೂಮಿಯಲ್ಲಿ ವರ್ಷಕ್ಕೆ 2 ಫಸಲು ಭತ್ತವನ್ನು ಬೆಳೆಯುತ್ತಿದ್ದಾರೆ.

ಸಮಗ್ರ ಕೃಷಿಯಲ್ಲಿ ಒಂದೊಳ್ಳೆ ತೋಟವನ್ನು ಅಭಿವೃದ್ಧಿಪಡಿಸಬೇಕು ಎಂಬುದು ನಾಸಿರ್ ಹುಸೇನ್ ಅವರ ತಂದೆ ಲೇಟ್ ಮಜಾರ್ ಹುಸೇನ್ ಅವರ ಕನಸಾಗಿತ್ತು. ಅದಕ್ಕಾಗಿ ಅವರು ತುಂಬಲ-ರಂಗಸಮುದ್ರ ರಸ್ತೆಯಲ್ಲಿ ಜಮೀನನ್ನು ಖರೀದಿ ಮಾಡಿದ್ದರು. ಆರಂಭದಲ್ಲಿ ದ್ವಿದಳ ಧಾನ್ಯಗಳು ಬೆಳೆಯುತ್ತಿದ್ದ ಭೂಮಿಯಲ್ಲಿ ಭತ್ತ, ಕಬ್ಬು ಬೆಳೆದ ಬಳಿಕ ಸಮಗ್ರ ಕೃಷಿ ಪದ್ಧತಿಯಲ್ಲಿ ಹಂತ ಹಂತವಾಗಿ ಅಡಿಕೆ, ತೆಂಗು ನೆಟ್ಟು ಈಗ ವಾಣಿಜ್ಯ ಬೆಳೆ ಕಾಫಿ ಹಾಕಿ, ತೋಟಗಾರಿಕೆ ಬಾಳೆಯನ್ನು ಬೆಳೆಲಾಗಿದೆ. ಪಿಯುಸಿ ವ್ಯಾಸಂಗ ಮುಗಿದ ಕೂಡಲೇ ತಾಯಿ ಜಾಹೆದ್ ಉನ್ನಿಸ್ಸಾ ಅವರ ಸಲಹೆ ಮೇರೆಗೆ ಕೃಷಿಯತ್ತ ಮುಖ ಮಾಡಿದ ನಾಸಿರ್ ಕೊನೆಗೂ ತಂದೆಯ ಕನಸನ್ನು ಸಾಕಾರಗೊಳಿಸಿದ್ದಾರೆ.

ರಸಗೊಬ್ಬರ ಬಳಕೆಗೆ ವಿದಾಯ ಹೇಳಿ ಸಾವಯವ ಗೊಬ್ಬರ ಬಳಕೆ ಹಾಗೂ ಕೊಟ್ಟಿಗೆ ಗೊಬ್ಬರವನ್ನು ವರ್ಷಕ್ಕೆರಡು ಬಾರಿ ಹಾಕಿ ಭೂಮಿಯ ಫಲವತ್ತತೆಯನ್ನು ಕಾಪಾಡಿಕೊಂಡಿದ್ದಾರೆ. ಗಂಗಾ ಕಲ್ಯಾಣ ಯೋಜನೆಯ 2 ಕೊಳವೆಬಾವಿ ಮತ್ತು ಹಳೇಯ 2 ಕೊಳವೆ ಬಾವಿಗಳನ್ನು ನೀರಾವರಿ ಸೌಲಭ್ಯಕ್ಕೆ ಬಳಸಿಕೊಳ್ಳುತ್ತಿದ್ದಾರೆ. ಹಳೆಯ ಕೃಷಿ ಹೊಂಡ ಹಾಗೂ ಸ್ವಂತ ಹಣದಲ್ಲಿ ಹನಿ ನೀರಾವರಿ ಪದ್ಧತಿಯನ್ನು ಅಳವಡಿಸಿಕೊಂಡು ಸದ್ಬಳಕೆ ಮಾಡಿಕೊಂಡಿದ್ದಾರೆ. ಆರಂಭದಲ್ಲಿ ರಸಗೊಬ್ಬರ ಬಳಕೆಯಿಂದ ಮರ ಗಿಡಗಳಲ್ಲಿ ಬೆಳವಣಿಗೆ ಕಂಡು ಬಾರದ್ದರಿಂದ ಸಾವಯವ ಗೊಬ್ಬರ ಹಾಕಲು ಆರಂಭಿಸಿದ ಬಳಿಕ ಹಸುರಿನ ಜತೆಗೆ ಮರ ಗಿಡಗಳು ಎತ್ತರಕ್ಕೆ ಎತ್ತರಕ್ಕೆ ಬೆಳೆಯತೊಡಗಿದವು ಎನ್ನುತ್ತಾರೆ ನಾಸಿರ್.

ಪ್ರತಿ ವರ್ಷವೂ ಗರ್ಗೇಶ್ವರಿ ಕಾವೇರಿ ಗ್ರಾಮೀಣ ಬ್ಯಾಂಕ್‌ನಲ್ಲಿ 3ಲಕ್ಷ ರೂ. ಬೆಳೆ ಸಾಲ ಪಡೆದುಕೊಳ್ಳುವ ನಾಸಿರ್ ಹುಸೇನ್, ನಿತ್ಯವೂ 8 ಕೂಲಿ ಕಾರ್ಮಿಕರಿಗೆ ಕೆಲಸವನ್ನು ಕೊಡುತ್ತಾರೆ. ತಿಂಗಳ ಅಂತರದಲ್ಲಿ ತೆಂಗು ಹಾಗೂ ಅಡಿಕೆ ಬೆಳೆಗಳ ಮಾರಾಟದಿಂದ ವಾರ್ಷಿಕವಾಗಿ 10 ಲಕ್ಷ ರೂ. ವಹಿವಾಟು ನಡೆಸುತ್ತಿದ್ದಾರೆ. ಅವರ ಕೃಷಿಗೆ ಪತ್ನಿ ಹರ್ಷಿಯಾ ಖಾನಂ ಬೆಂಬಲವಾಗಿದ್ದಾರೆ. ಪ್ರಾಥಮಿಕ ಹಾಗೂ ಪ್ರೌಢ ಶಿಕ್ಷಣವನ್ನು ಪಡೆಯುತ್ತಿರುವ ಪುತ್ರರಾದ ಮೊಹಮ್ಮದ್ ಅರ್ಮನ್, ಮೊಹಮ್ಮದ್ ಉಮರ್ ಹಾಗೂ ಮೊಹಮ್ಮದ್ ಆಲಿ ಎಚ್ದನ್ ಅವರೂ ಬಿಡುವಿನ ವೇಳೆಯಲ್ಲಿ ತಂದೆಯೊಡನೆ ಜಮೀನು ಕೆಲಸಗಳಲ್ಲಿ ಭಾಗಿಯಾಗುತ್ತಾರೆ.

ರಾಜಕೀಯ ಅಥವಾ ಸಾಮಾಜಿಕವಾಗಿ ಗುರುತಿಸಿಕೊಳ್ಳಲು ಇಚ್ಛಿಸದ ರೈತ ನಾಸಿರ್ ಹುಸೇನ್ ವ್ಯಾಪಾರ, ವಹಿವಾಟು ಅಥವಾ ಗುಡಿ ಕೈಗಾರಿಕೆಗಳಿಗೂ ಗಂಟು ಬೀಳದೆ ಕೃಷಿಯನ್ನೇ ನೆಚ್ಚಿಕೊಂಡು ನಿರಂತರ ದುಡಿಮೆ ಮಾಡುವ ಮೂಲಕ ಕಾಯಕ ಯೋಗಿಯಾಗಿದ್ದಾರೆ.