ವಿಜಯವಾಣಿಯಿಂದ ಪರಿಸರ ದಿನ ಆಚರಣೆ

ಜಿಲ್ಲೆಯ ವಿವಿಧ ಶಾಲೆಯ ವಿದ್ಯಾರ್ಥಿಗಳು ಚಿತ್ರಕಲಾ ಸ್ಪರ್ಧೆಯಲ್ಲಿ ಉತ್ಸಾಹದಿಂದ ಪಾಲ್ಗೊಂಡು ತಮ್ಮ ಭಾವನೆಗಳಿಗೆ ಬಣ್ಣ ತುಂಬಿದರು.

ಈ ಮೂಲಕ ‘ವಿಜಯವಾಣಿ’ ಈ ಬಾರಿಯ ಪರಿಸರ ದಿನಾಚರಣೆಯನ್ನು ಅರ್ಥಪೂರ್ಣವಾಗಿ ಆಚರಿಸಿತು. ಸಬ್ ಜ್ಯೂನಿಯರ್ (1 ರಿಂದ 4ನೇ ತರಗತಿ), ಜೂನಿಯರ್ (5 ರಿಂದ 7ನೇ ತರಗತಿ) ಹಾಗೂ ಸೀನಿಯರ್ (8 ರಿಂದ 10ನೇ ತರಗತಿ) ವಿಭಾಗದಲ್ಲಿ ಸ್ಪರ್ಧೆ ನಡೆಯಿತು. ಈ ಬಾರಿ ‘ಪ್ರಕೃತಿಯಿಂದ ಸ್ಫೂರ್ತಿ ಪಡೆಯೋಣ, ಹವಾಮಾನ ಸಂರಕ್ಷಣೆಗಾಗಿ, ನಮ್ಮೆಲ್ಲರ ಭವಿಷ್ಯಕ್ಕಾಗಿ’ ವಿಷಯದಲ್ಲಿ ಸ್ಪರ್ಧೆ ಆಯೋಜಿಸಲಾಗಿತ್ತು. ನೂರಾರು ಸಂಖ್ಯೆಯಲ್ಲಿ ವಿದ್ಯಾರ್ಥಿಗಳು ಪಾಲ್ಗೊಂಡಿದ್ದರು.

ಕಾರ್ಯಕ್ರಮ ಉದ್ಘಾಟಿಸಿದ ಶಾಲಾ ಶಿಕ್ಷಣ ಇಲಾಖೆ ಉಪ ನಿರ್ದೇಶಕ ಡಿ. ಉದಯ ಕುಮಾರ್ ಮಾತನಾಡಿ, ಪರಿಸರ ವಿಚಾರದಲ್ಲಿ ಹಲವಾರು ಸವಾಲುಗಳನ್ನು ಎದುರಿಸುತ್ತಿದ್ದೇವೆ. ಹೀಗಾಗಿ ಮಕ್ಕಳಿಗೆ ಪರಿಸರದ ಕುರಿತು ಕಾಳಜಿ ಮೂಡಿಸುವ ಕಾರ್ಯ ಆಗಬೇಕು ಎಂದು ಹೇಳಿದರು.

ಶಿಕ್ಷಣ ಎಂದರೆ ಕೇವಲ ಓದು, ಬರಹಕ್ಕೆ ಸೀಮಿತವಲ್ಲ, ಅದಕ್ಕೆ ಹಲವಾರು ಆಯಾಮಗಳು ಇವೆ. 21ನೇ ಶತಮಾನದ ಸವಾಲುಗಳನ್ನು ಎದುರಿಸಲು ಚಿಂತನೆಗಳು ಬಹಳ ಮುಖ್ಯ. ಮಕ್ಕಳಲ್ಲಿ ಉತ್ತಮ ಚಿಂತನೆ, ಕಲ್ಪನೆ, ಸೃಜಶೀಲತೆ ತುಂಬಲು ಇಂತಹ ಕಾರ್ಯಕ್ರಮಗಳು ಸಹಕಾರಿಯಾಗಿವೆ ಎಂದು ಅಭಿಪ್ರಾಯಪಟ್ಟರು.

ವಿಜಯವಾಣಿ ದೈನಿಕ ಶೈಕ್ಷಣಿಕವಾಗಿ, ವೈಜ್ಞಾಕವಾಗಿ ಮಕ್ಕಳ ಅಭಿವೃದ್ಧಿಗೆ ತುಂಬಾ ಉತ್ತಮವಾದ ಲೇಖನ ನೀಡುವ ಮೂಲಕ ಹಾಗೂ ಒಳ್ಳೆಯ ವಿಚಾರಗಳನ್ನು ನೀಡುವ ಮೂಲಕ ಸಮಾಜವನ್ನು ಎಚ್ಚರಿಸುವ ಕಾರ್ಯ ಮಾಡುತ್ತಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

ಹೆಚ್ಚುವರಿ ಪ್ರಾದೇಶಿಕ ಆಯುಕ್ತ ಡಾ.ಪಿ. ಶಿವರಾಜು ಮಾತನಾಡಿ, ವಿದ್ಯಾರ್ಥಿಗಳು ಪಠ್ಯ ಪುಸ್ತಗಳನ್ನು ಓದುವುದು, ಪರೀಕ್ಷೆ ಎದುರಿಸುವುದು ಸಾಮಾನ್ಯ. ಆದರೆ, ಇದರ ಜತೆಗೆ ಸೃಜನಾತ್ಮಕವಾಗಿ ತಮ್ಮನ್ನು ತೊಡಗಿಸಿಕೊಳ್ಳುವುದು ಬಹಳ ಮುಖ್ಯ. ಇಂದಿನ ಎಐ ಯುಗದಲ್ಲಿ ಹಲವಾರು ಕೆಲಸಗಳನ್ನು ಎಐ ಮಾಡುತ್ತಿದೆ. ಹೀಗಾದರೆ ಮುಂದಿನ ದಿನಗಳಲ್ಲಿ ಜನರಿಗೆ ಏನು ಕೆಲಸ ಇರುತ್ತದೆ? ಹಾಗಾಗಿ ಎಐಅನ್ನು ಮೀರಿಸುವ ಸೃಜನಶೀಲತೆಯನ್ನು ಬೆಳೆಸಿಕೊಳ್ಳಬೇಕು ಎಂದು ಕರೆ ನೀಡಿದರು.

ಹಿರಿಯ ಚಿತ್ರಕಲಾವಿದ ಎಲ್. ಶಿವಲಿಂಗಪ್ಪ ಮಾತನಾಡಿ, ಮಕ್ಕಳಲ್ಲಿ ಪರಿಸರ ಪ್ರಜ್ಞೆ ಮೂಡಿಸುವುದು ಅತ್ಯಂತ ಅಗತ್ಯ. ಇಂತಹ ಚಿತ್ರಕಲಾ ಸ್ಪರ್ಧೆಗಳು ಮಕ್ಕಳಲ್ಲಿ ಪರಿಸರದ ಕಾಳಜಿ ಮೂಡಿಸಲು ಸಹಕಾರಿಯಾಗಿವೆ. ಪ್ಲಾಸ್ಟಿಕ್ ಬಳಕೆಯಿಂದ ಪರಿಸರ ಹೆಚ್ಚು ಹಾಳಾಗುತ್ತಿದ್ದು, ವಿದ್ಯಾರ್ಥಿಗಳು ಪ್ಲಾಸ್ಟಿಕ್ ಬಳಕೆಯನ್ನು ಸಂಪೂರ್ಣವಾಗಿ ತ್ಯಜಿಸಬೇಕು ಎಂದು ಸಲಹೆ ನೀಡಿದರು.

ವಿಜಯವಾಣಿ ಮೈಸೂರು ಸ್ಥಾನಿಕ ಸಂಪಾದಕ ಎಂ.ಆರ್. ಸತ್ಯನಾರಾಯಣ ಮಾತನಾಡಿ, ಕನ್ನಡದ ನಂ.1 ದೈನಿಕ ‘ವಿಜಯವಾಣಿ’ ಪ್ರತಿವರ್ಷ ವಿದ್ಯಾರ್ಥಿಗಳಲ್ಲಿ ಪರಿಸರದ ಕುರಿತು ಅರಿವು ಮೂಡಿಸಲು ಪರಿಸರ ದಿನಾಚರಣೆ ಸಂದರ್ಭ ಚಿತ್ರಕಲಾ ಸ್ಪರ್ಧೆ ಅಯೋಜಿಸುತ್ತಾ ಬರುತ್ತಿದೆ. ರಾಜ್ಯದ ಎಲ್ಲ ಜಿಲ್ಲಾ ಕೇಂದ್ರಗಳಲ್ಲಿ ಈ ಸ್ಪರ್ಧೆ ಆಯೋಜಿಸಲಾಗಿದೆ ಎಂದರು.

ಸಬ್ ಜ್ಯೂನಿಯರ್ ವಿಭಾಗದಲ್ಲಿ (1 ರಿಂದ 4ನೇ ತರಗತಿ) ಬೇಡನ್ ಪೊವೆಲ್ ಪಬ್ಲಿಕ್ ಶಾಲೆಯ ಬಿ. ಪುನರ್‌ದತ್ತ (ಪ್ರಥಮ), ಬೇಡನ್ ಪೊವೆಲ್ ಪಬ್ಲಿಕ್ ಶಾಲೆಯ ಎಸ್. ಮೌಲ್ಯ (ದ್ವಿತೀಯ), ಎಸ್‌ವಿಇ ಪಬ್ಲಿಕ್ ಶಾಲೆಯ ನಿಶಾಲ್ ಮನೆಲ್ (ತೃತೀಯ), ಬಿಎಸ್‌ಎಸ್ ವಿದ್ಯೋದಯ ಶಾಲೆಯ ಎಂ.ವಿ. ಸಮನ್ವಿತಾ ಮತ್ತು ಬಿಎಸ್‌ಎಸ್ ವಿದ್ಯೋದಯ ಶಾಲೆಯ ಖುಷಿ ಸ್ವರೂಪ್ ಸಮಾಧಾನಕರ ಬಹುಮಾನ ಪಡೆದರು.

ಜೂನಿಯರ್ ವಿಭಾಗದಲ್ಲಿ (5 ರಿಂದ 7ನೇ ತರಗತಿ) ಶಾರದಾ ಪಬ್ಲಿಕ್ ಶಾಲೆಯ ಕೆ. ಧೀರಜ್ (ಪ್ರಥಮ), ನಿರ್ಮಲ ಎಚ್‌ಪಿಎಸ್ ಶಾಲೆಯ ಡಿ. ಸ್ನೇಹಾ ರಚನಾ (ದ್ವಿತೀಯ), ಭಾರತೀಯ ವಿದ್ಯಾಭವನ ಶಾಲೆಯ ತೀರ್ಥ್ ಬಿ. ಸೋನಿ (ತೃತೀಯ), ಜೆಎಸ್‌ಎಸ್ ಪಬ್ಲಿಕ್ ಶಾಲೆಯ ಸಿ. ಸಾಯಿ ಸೋಹನ್ ಮತ್ತು ಬಿಎಸ್‌ಎಸ್ ವಿದ್ಯೋದಯ ಶಾಲೆಯ ನಾವಿಕಾ ಭಟ್ ಸಮಾಧಾನಕರ ಬಹುಮಾನ ಪಡೆದರು.

ಸೀನಿಯರ್ ವಿಭಾಗದಲ್ಲಿ (8 ರಿಂದ 10ನೇ ತರಗತಿ) ಕೃಥ್ವಿನಿ ವಿಜಯ್ (ಪ್ರಥಮ), ಕ್ಯಾಪಿಟಲ್ ಪಬ್ಲಿಕ್ ಶಾಲೆಯ ಎಚ್.ಪಿ. ಪಾವನಿ (ದ್ವಿತೀಯ), ವಿಜಯ ವಿಠಲ ವಿದ್ಯಾಶಾಲೆಯ ಸಿರಿಶಾ (ತೃತೀಯ), ವಿವೇಕ ಬಾಲೋದ್ಯಾನ ಪಬ್ಲಿಕ್ ಶಾಲೆಯ ಪ್ರೀತಮ್ ಮತ್ತು ಎಸ್‌ಜೆಸಿಎಸ್ ಶಾಲೆಯ ಧೃತಿ ವಿ. ಶಾ ಸಮಾಧಾನಕರ ಬಹುಮಾನ ಪಡೆದರು. ತೀರ್ಪುಗಾರರಾಗಿ ಕಲಾನಿಕೇತನ ಆರ್ಟ್ ಕಾಲೇಜಿನ ಉಪನ್ಯಾಸಕ ಡಾ.ವಿಠಲ ರೆಡ್ಡಿ, ಹಿರಿಯ ಚಿತ್ರಕಲಾವಿದರಾದ ಎಲ್. ಶಿವಲಿಂಗಪ್ಪ, ಜಂಬುಕೇಶ್ವರ, ಲಲಿತಕಲಾ ಅಕಾಡೆಮಿ ಸದಸ್ಯ ಡಿ. ಅಭಿಲಾಷ್ ಕಾರ್ಯನಿರ್ವಹಿಸಿದರು.

ವಾಸುದೇವ ಭಟ್, ಟ್ರಸ್ಟಿ, ಬಿಎಸ್‌ಎಸ್ ವಿದ್ಯೋದಯ

ಸಂಧ್ಯಾ, ಕ್ವಾಲಿಟಿ ಮ್ಯಾನೇಜರ್, ನೆಕ್ಸಾ ಕಲ್ಯಾಣಿ ಮೋಟಾರ್ಸ್‌

ಮೈಸೂರಿನ ವಾಣಿವಿಲಾಸ ರಸ್ತೆಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ನೆಕ್ಸಾ ಕಲ್ಯಾಣಿ ಮೋಟಾರ್ಸ್‌ ಪ್ರೈವೇಟ್ ಲಿಮಿಟೆಡ್ ಮೈಸೂರು ಹಾಗೂ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ನೆಕ್ಸಾ ವಾಹನಗಳ ಮಾರಾಟದಲ್ಲಿ ಪ್ರಮುಖ ಸ್ಥಾನ ಹೊಂದಿದ್ದು, ಗ್ರಾಹಕರಿಗೆ ಅತ್ಯುತ್ತಮ ಸೇವೆ ಒದಗಿಸುವಲ್ಲಿ ನೆಕ್ಸಾ ಕಲ್ಯಾಣಿ ಮೋಟಾರ್ಸ್‌ ಮುಂಚೂಣಿಯಲ್ಲಿದೆ.

ಗ್ರಾಹಕರಿಗೆ ವಾಹನಗಳನ್ನು ಸಮಯಕ್ಕೆ ಸರಿಯಾಗಿ ಒದಗಿಸುವುದು ಮಾತ್ರವಲ್ಲದೆ ಮಾರಾಟದ ನಂತರ ಗ್ರಾಹಕರಿಗೆ ವಿಶ್ವದರ್ಜೆಯ ಸರ್ವೀಸ್ ವ್ಯವಸ್ಥೆಯನ್ನು ಸಹ ಒದಗಿಸುತ್ತಿದೆ. ಮೈಸೂರಿನ ವಿದ್ಯಾರಣ್ಯಪುರಂ, ಹೆಬ್ಬಾಳು, ಬೋಗಾದಿ ಮತ್ತು ಬನ್ನಿಮಂಟಪ ಪ್ರದೇಶಗಳಲ್ಲಿ ಸಂಸ್ಥೆಯ ಸೇವಾ ಕೇಂದ್ರಗಳು ಕಾರ್ಯನಿರ್ವಹಿಸುತ್ತಿದ್ದು, ನಂಜನಗೂಡು, ಚಾಮರಾಜನಗರ, ಹುಣಸೂರು, ವಿರಾಜಪೇಟೆ ಹಾಗೂ ಮಡಿಕೇರಿ ನಗರಗಳಲ್ಲಿಯೂ ಶಾಖೆಗಳ ಮೂಲಕ ಗ್ರಾಹಕರಿಗೆ ಸೇವೆ ಒದಗಿಸಲಾಗುತ್ತಿದೆ. ಇದರಿಂದ ಮೈಸೂರು ವಿಭಾಗದ ವಾಹನ ಮಾಲೀಕರಿಗೆ ಸುಲಭ ಮತ್ತು ಗುಣಮಟ್ಟದ ಸೇವೆ ದೊರೆಯುತ್ತಿದೆ.

ವಿಶ್ವ ಪರಿಸರ ದಿನಾಚರಣೆಯ ಅಂಗವಾಗಿ ‘ವಿಜಯವಾಣಿ’ ಆಯೋಜಿಸಿದ ಕಾರ್ಯಕ್ರಮದಲ್ಲಿ ನೆಕ್ಸಾ ಕಲ್ಯಾಣಿ ಮೋಟಾರ್ಸ್‌ ಇ-ಮೊಬಿಲಿಟಿ ಪಾರ್ಟ್‌ನರ್ ಆಗಿ ಭಾಗವಹಿಸುವ ಮೂಲಕ ಪರಿಸರ ಸಂರಕ್ಷಣೆಯ ಕುರಿತು ಜನರಲ್ಲಿ ಜಾಗೃತಿ ಮೂಡಿಸುವ ಪ್ರಯತ್ನಕ್ಕೆ ಕೈಜೋಡಿಸಿದೆ. ಈ ಸಂದರ್ಭದಲ್ಲಿ ಸುಜುಕಿ ಸಂಸ್ಥೆಯು ಹೊಸದಾಗಿ ಬಿಡುಗಡೆ ಮಾಡಿರುವ ಸಂಪೂರ್ಣ ವಿದ್ಯುತ್ ಚಾಲಿತ ಎಸ್‌ಯುವಿ ಇ-ವಿಟಾರಾ ವಾಹನವನ್ನು ಸಾರ್ವಜನಿಕರಿಗೆ ಪರಿಚಯಿಸಲಾಯಿತು. ಶೂನ್ಯ ಮಾಲಿನ್ಯದತ್ತ ಸಾಗುತ್ತಿರುವ ವಾಹನ ಕ್ಷೇತ್ರದಲ್ಲಿ ವಿದ್ಯುತ್ ವಾಹನಗಳು ಮಹತ್ವದ ಪಾತ್ರ ವಹಿಸುತ್ತಿದ್ದು, ಪರಿಸರ ಸ್ನೇಹಿ ಸಂಚಾರ ವ್ಯವಸ್ಥೆಗಳನ್ನು ಉತ್ತೇಜಿಸುವಲ್ಲಿ ಇ-ವಿಟಾರಾ ಹೊಸ ಆಯ್ಕೆಯಾಗಿ ಮೂಡಿಬಂದಿದೆ. ಕೊಡುಗೆಗಳು ಹಾಗೂ ಟೆಸ್ಟ್ ಡ್ರೈವಿಂಗ್‌ಗೆ ಮೊ: 9590960011 ಸಂಪರ್ಕಿಸಬಹುದು ಅಥವಾ ಹೆಚ್ಚಿನ ಮಾಹಿತಿಗೆ ಮೊ: 9845943726 ಸಂಪರ್ಕಿಸಬಹುದು.