ಅಭಿಮನ್ಯುವಿಗೆ ವೀರನಹೊಸಳ್ಳಿಯಲ್ಲಿ ಭಾವಪೂರ್ಣ ಬೀಳ್ಕೊಡುಗೆ

ಹಲವು ವರ್ಷಗಳ ಕಾಲ ಮೈಸೂರು ದಸರೆಯ ವೈಭವದ ಭಾಗವಾಗಿದ್ದ ಅಭಿಮನ್ಯುವಿನ ಸುದೀರ್ಘ ಸೇವೆಯನ್ನು ಸ್ಮರಿಸಿ ಬುಧವಾರ ಹುಣಸೂರು ತಾಲೂಕಿನ ವೀರನಹೊಸಳ್ಳಿ ಗ್ರಾಮದಲ್ಲಿ ನಡೆಯಲಿರುವ ಗಜಪಯಣದ ಸಂದರ್ಭದಲ್ಲಿ ವಿಶೇಷ ಗೌರವ ಸಲ್ಲಿಸಲಾಗುತ್ತಿದೆ.

ಅಂಬಾರಿ ಹೊತ್ತು ಸಾಗುವಾಗ ತನ್ನ ಗಂಭೀರ ನಡಿಗೆ, ಶಾಂತ ಸ್ವಭಾವ ಹಾಗೂ ಶಿಸ್ತುಬದ್ಧ ವರ್ತನೆಯಿಂದ ಜನರ ಗಮನ ಸೆಳೆಯುತ್ತಿದ್ದ ಅಭಿಮನ್ಯು, ಮೈಸೂರು ದಸರೆಯ ಗಜಪಡೆಯ ಅವಿಭಾಜ್ಯ ಅಂಗವಾಗಿದ್ದ. ಅರಮನೆಯ ಅಂಗಳದಿಂದ ಬನ್ನಿಮಂಟಪದವರೆಗೆ ಆತನ ಹೆಜ್ಜೆಗಳು ದಸರೆಯ ಹಲವು ಸ್ಮರಣೀಯ ಕ್ಷಣಗಳಿಗೆ ಸಾಕ್ಷಿಯಾಗಿವೆ.

ಸುಮಾರು 60 ವರ್ಷಗಳ ಸುದೀರ್ಘ ಸೇವೆ ಸಲ್ಲಿಸಿರುವ ಅಭಿಮನ್ಯು, ದಸರಾ ಮಹೋತ್ಸವದ ಜತೆಗೆ ಅರಣ್ಯ ಇಲಾಖೆಯ ವಿವಿಧ ಕಾರ್ಯಗಳಲ್ಲಿಯೂ ಗಮನಾರ್ಹ ಸೇವೆ ಸಲ್ಲಿಸಿದ್ದಾನೆ. ದೀರ್ಘಕಾಲದ ಸೇವೆಯನ್ನು ಪರಿಗಣಿಸಿ ಇದೀಗ ಆತನಿಗೆ ವಿಶ್ರಾಂತಿಯ ಬದುಕು ಕಲ್ಪಿಸುವ ಉದ್ದೇಶದಿಂದ ದಸರಾ ಅಂಬಾರಿ ಹೊರುವ ಜವಾಬ್ದಾರಿಯಿಂದ ಹಿಂದೆ ಸರಿಸಲಾಗುತ್ತಿದೆ.

ಈ ಹಿನ್ನೆಲೆಯಲ್ಲಿ ಗಜಪಯಣದ ಸಂದರ್ಭದಲ್ಲಿ ಅರಣ್ಯ ಇಲಾಖೆ ಹಾಗೂ ದಸರಾ ಗಜಪಡೆಯ ವತಿಯಿಂದ ಅಭಿಮನ್ಯುವಿನ ಸೇವೆಯನ್ನು ಸ್ಮರಿಸಿ ಗೌರವಪೂರ್ವಕವಾಗಿ ಬೀಳ್ಕೊಡಲಾಗುತ್ತಿದೆ. ಹಲವು ವರ್ಷಗಳ ಕಾಲ ಅಭಿಮನ್ಯುವಿನೊಂದಿಗೆ ಒಡನಾಟ ಹೊಂದಿದ್ದ ಮಾವುತರು ಮತ್ತು ಕಾವಾಡಿಗಳ ಪಾಲಿಗೂ ಈ ಕ್ಷಣ ಅತ್ಯಂತ ಭಾವನಾತ್ಮಕವಾಗಿರಲಿದೆ.

ಅಭಿಮನ್ಯುವಿಗೆ ದೊರೆಯಲಿರುವ ಈ ಬೀಳ್ಕೊಡುಗೆ ಕೇವಲ ಒಂದು ಆನೆಗೆ ಸಲ್ಲಿಸುವ ಗೌರವವಲ್ಲ. ಮೈಸೂರು ದಸರೆಯ ವೈಭವಕ್ಕೆ ಹಲವು ವರ್ಷಗಳ ಕಾಲ ತನ್ನದೇ ಆದ ಮೆರುಗು ನೀಡಿದ ಗಜರಾಜನ ಸೇವೆಗೆ ಸಲ್ಲಿಸುವ ಗೌರವವವಾಗಿದೆ. ಅಂಬಾರಿ ಹೊತ್ತು ಸಾಗಿದ ಆತನ ರಾಜಗಾಂಭೀರ್ಯವನ್ನು ಕಣ್ತುಂಬಿಕೊಂಡಿದ್ದ ಸಾವಿರಾರು ಜನರ ಪ್ರೀತಿ ಮತ್ತು ಅಭಿಮಾನಕ್ಕೆ ಸಲ್ಲಿಸುವ ಗೌರವವೂ ಹೌದು.

ಗಜಪಯಣದ ಸಂದರ್ಭ ಹೊಸ ಆನೆಗಳೊಂದಿಗೆ ಮೈಸೂರಿನತ್ತ ಹೆಜ್ಜೆ ಹಾಕುವ ಸಂದರ್ಭದಲ್ಲಿ, ಹಲವು ವರ್ಷಗಳ ಕಾಲ ದಸರೆಯ ಸಾರಥಿಯಾಗಿದ್ದ ಅಭಿಮನ್ಯುವಿನ ಸೇವಾ ಪಯಣಕ್ಕೆ ವೀರನಹೊಸಳ್ಳಿಯಲ್ಲಿ ಭಾವಪೂರ್ಣ ವಿದಾಯ ದೊರೆಯಲಿದೆ. ಅಂಬಾರಿ ಹೊತ್ತ ಆ ಗಂಭೀರ ಹೆಜ್ಜೆಗಳು ಇನ್ನು ದಸರೆಯ ಮೆರವಣಿಗೆಯಲ್ಲಿ ಕಾಣಿಸದಿದ್ದರೂ, ಅಭಿಮನ್ಯುವಿನ ಹೆಜ್ಜೆ ಗುರುತುಗಳು ಮೈಸೂರು ದಸರೆಯ ಇತಿಹಾಸದಲ್ಲಿ ಎಂದೆಂದಿಗೂ ಅಚ್ಚಳಿಯದೆ ಉಳಿಯಲಿವೆ.