ಅರ್ಹರನ್ನು ಮತದಾರರ ಪಟ್ಟಿಯಿಂದ ಕೈಬಿಡುವಂತಿಲ್ಲ

ಹುಣಸೂರು: ಮತದಾರರ ಪಟ್ಟಿಯಲ್ಲಿ ಅರ್ಹರನ್ನು ಬಿಡುವಂತಿಲ್ಲ, ಅನರ್ಹರನ್ನು ಇರಿಸಿಕೊಳ್ಳುವಂತಿಲ್ಲವೆನ್ನುವುದೇ ವಿಶೇಷ ತೀವ್ರ ಪರಿಷ್ಕರಣೆ(ಎಸ್‌ಐಆರ್)ಯ ಮೂಲ ಆಶಯವಾಗಿದೆ ಎಂದು ಉಪವಿಭಾಗಾಧಿಕಾರಿ ಹಾಗೂ ಮತದಾತರರ ಪಟ್ಟಿಯ ನೋಂದಣಾಧಿಕಾರಿ ಕೆ.ವಿ.ಕಾವ್ಯಾರಾಣಿ ತಿಳಿಸಿದರು.

ನಗರದ ಅಂಬೇಡ್ಕರ್ ಭವನದಲ್ಲಿ ಗುರುವಾರ ಚುನಾವಣಾ ಶಿರಸ್ತೇದಾರ್ ಕಚೇರಿ ವತಿಯಿಂದ ಬಿಎಲ್‌ಎ 1 ಮತ್ತು 2 (ರಾಜಕೀಯ ಪಕ್ಷಗಳ ಬೂತ್ ಮಟ್ಟದ ಏಜೆಂಟರು)ಗಳಿಗೆ ಆಯೋಜಿಸಿದ್ದ ಒಂದು ದಿನದ ತರಬೇತಿ ಕಾರ್ಯಾಗಾರವನ್ನು ಉದ್ಘಾಟಿಸಿ ಮಾತನಾಡಿದರು.

2002-04ರ ಮತದಾರರ ಪಟ್ಟಿಯ ಪರಿಷ್ಕರಣೆಯ ಸುದೀರ್ಘ 24 ವರ್ಷಗಳ ನಂತರ ಇದೀಗ ವಿಶೇಷ ತೀವ್ರ ಪರಿಷ್ಕರಣೆಯ ಎರಡನೆಯ ಹಂತ ದೇಶಾದ್ಯಂತ ಆರಂಭವಾಗಿದೆ. ಈ ಬಾರಿ ಪರಿಷ್ಕರಣೆಗೆ 2002-04ರ ಮತದಾರರ ಪಟ್ಟಿಯೇ ಮೂಲಾಧಾರವಾಗಿದೆ. ಎಸ್‌ಐಆರ್ ಪ್ರಕ್ರಿಯೆ ಅತ್ಯಂತ ಸೂಕ್ಷ್ಮತೆಯಿಂದ ಕೂಡಿದ್ದು, ಯಾರಿಂದಲೂ ಯಾವುದೇ ರೀತಿಯಲ್ಲಿ ಲೋಪವಾಗಬಾರದು. ಇದಕ್ಕಾಗಿ ರಾಜಕೀಯ ಪಕ್ಷಗಳಿಂದ ನೇಮಿಸಲ್ಪಟ್ಟ ಏಜೆಂಟರು ಸರ್ಕಾರದ ಬಿಎಲ್‌ಒಗಳೊಂದಿಗೆ ಉತ್ತಮ ಬಾಂಧವ್ಯದೊಂದಿಗೆ ಪರಿಷ್ಕರಣೆ ಯಶಸ್ವಿಯಾಗಲು ಸಹಕರಿಸಬೇಕಿದೆ. ಪರಿಷ್ಕರಣೆಯ ಮೂಲ ಉದ್ದೇಶ ಅರ್ಹ ಮತದಾರರನ್ನು ಪಟ್ಟಿಯಿಂದ ಹೊರಗಿಡಬಾರದು ಹಾಗೂ ಅನರ್ಹರು ಪಟ್ಟಿಯಲ್ಲಿ ಇರಬಾರದು ಎನ್ನುವುದಾಗಿದೆ ಎಂದರು.

30ರಿಂದ ಮನೆ ಮನೆ ಭೇಟಿ: ಜೂ.30ರಿಂದ ಜು.29ರವರೆಗೆ ಒಂದು ತಿಂಗಳವರೆಗೆ ಬಿಎಲ್‌ಒಗಳು ತಮ್ಮ ಕಾರ್ಯವ್ಯಾಪ್ತಿಯಲ್ಲಿ ಮನೆ ಮನೆಗೆ ಭೇಟಿ ನೀಡಲಿದ್ದಾರೆ. ಜತೆಯಲ್ಲಿ ಮತದಾರರಿಗೆ ಮತದಾರರ ಗಣತಿ ನಮೂನೆ(ಎನ್ಯುಮರೇಷನ್ ಅರ್ಜಿ) ನೀಡಲಿದ್ದಾರೆ. ನಮೂನೆಯನ್ನು ಭರ್ತಿ ಮಾಡಿ ಬಿಎಲ್‌ಒಗಳಿಗೆ ನೀಡಬೇಕು. ಇದಕ್ಕಾಗಿ ಒಟ್ಟು ಮೂರು ಬಾರಿ ಬಿಎಲ್‌ಒಗಳು ಮನೆಗೆ ಭೇಟಿ ನೀಡಲಿದ್ದಾರೆ. ಈ ವೇಳೆ ಮನೆ ಪತ್ತೆ ಹಚ್ಚಲಾಗದ, ಬೀಗ ಹಾಕಿದ್ದರೆ ಮನೆಯವರ ಕುರಿತು ಮಾಹಿತಿ ನೀಡುವ ಇವೇ ಮುಂತಾದ ಕಾರ್ಯಗಳಿಗೆ ಸ್ಥಳೀಯರೂ ಆಗಿರುವ ಬಿಎಲ್‌ಎಗಳಾಗಿ ನೀವು ಸಹಕಾರ ನೀಡಬೇಕು. ಯಾವುದೇ ಕಾರಣಕ್ಕೂ ಅರ್ಹ ಮತದಾರ ಪಟ್ಟಿಯಿಂದ ಹೊರಬೀಳದಂತೆ ಗಮನಹರಿಸಿರಿ. ನಿಮ್ಮ ಸಹಕಾರದಿಂದ ಮಾತ್ರ ಮತದಾರರ ಪಟ್ಟಿಯ ಪರಿಷ್ಕರಣೆಯನ್ನು ಯಶಸ್ವಿಯಾಗಿ ಕೈಗೊಳ್ಳಲು ಸಾಧ್ಯ ಎಂದರು.

ತಹಸೀಲ್ದಾರ್ ಜೆ.ಮಂಜುನಾಥ್ ಮಾತನಾಡಿ, ಮತದಾರರ ಗಣತಿ ನಮೂನೆ ನೀಡಿದ ನಂತರ ಬಿಎಲ್‌ಎಗಳು ಅನಕ್ಷರಸ್ಥ ಕುಟುಂಬವಾಗಿದ್ದಲ್ಲಿ ಅರ್ಜಿ ಭರ್ತಿ ಮಾಡುವ, ಸ್ಥಳೀಯವಾಗಿ ಮರಣ ಹೊಂದಿದ ಮತದಾರರು, ಬೇರೆಡೆಗ ಸ್ಥಳಾಂತರವಾಗಿದ್ದು ಇಲ್ಲಿನ ಮತದಾರರ ಪಟ್ಟಿಯಲ್ಲಿ ಉಳಿದುಕೊಂಡಿದ್ದರೆ ಅಂತಹುದನ್ನು ಗುರುತಿಸುವ ಇವೇ ಮುಂತಾದ ಕಾರ್ಯಗಳಲ್ಲಿ ಪರಿಣಾಮಕಾರಿಯಾಗಿ ಬಿಎಲ್‌ಒಗಳೊಂದಿಗೆ ಸಹಕರಿಸಬೇಕು. ಒಬ್ಬ ವ್ಯಕ್ತಿ ಎರಡು ಕಡೆ ಮತದಾರನಾಗಿರುವುದು, ಮೃತವ್ಯಕ್ತಿಯ ಹೆಸರು ಮತದಾರರ ಪಟ್ಟಿಯಿಂದ ತೆಗೆದು ಹಾಕದಿರುವುದು ಮುಂತಾದವು ಪ್ರಜಾ ಪ್ರತಿನಿಧಿ ಕಾಯ್ದೆಗೆ ವಿರುದ್ಧವಾದುದಾಗಿದ್ದು, 10 ವರ್ಷಗಳ ಸಜೆ ವಿಧಿಸಬಹುದಾಗಿದೆ. ಹಾಗಾಗಿ ಬಿಎಲ್‌ಎಗಳು ಜವಾಬ್ದಾರಿಯುತವಾಗಿ ಕಾರ್ಯನಿರ್ವಹಿಸಬೇಕಿದೆ ಎಂದರು.

ಸಭೆಯಲ್ಲಿ ತಾಲೂಕು ಚುನಾವಣಾ ಶಿರಸ್ತೇದಾರ್, ಎ.ಪ್ರಕಾಶ್, ಜೆಡಿಎಸ್ ಪಕ್ಷದ ಬಿಎಲ್‌ಎ 1 ಸತೀಶ್ ಪಾಪಣ್ಣ, ಬಿಜಿಪಿಯ ಕಿರಣ್‌ಕುಮಾರ್, ಕಾಂಗ್ರೆಸ್ ಪಕ್ಷದ ರವಿ ಸೇರಿದಂತೆ 274 ಬೂತ್‌ಗಳ ಎಲ್ಲ ಪಕ್ಷಗಳ ಬಿಎಲ್‌ಎ 2ಗಳು ಹಾಜರಿದ್ದರು.