‘ಸೋಶಿಯಲ್ ಮೀಡಿಯಾ’ ಮೇಲೆ ಹದ್ದಿನಕಣ್ಣು

ಅರಮನೆ ಅಂಗಳ ಪ್ರವೇಶಿಸಿರುವ ದಸರಾ ಗಜಪಡೆ ತಾಲೀಮು ಆರಂಭಿಸಿದ್ದು, ಈ ಬಾರಿ ಆನೆಗಳ ಸುರಕ್ಷತೆ ಹಾಗೂ ನೆಮ್ಮದಿಗೆ ಅರಣ್ಯ ಇಲಾಖೆ ಹೆಚ್ಚಿನ ಆದ್ಯತೆ ನೀಡಿದೆ. ಅರಮನೆ ಅಂಗಳದಲ್ಲಿನ ಆನೆ ತಾಣಕ್ಕೆ ಸಾರ್ವಜನಿಕರ ಅನಧಿಕೃತ ಪ್ರವೇಶವನ್ನು ಸಂಪೂರ್ಣ ನಿಷೇಧಿಸಿದೆ. ಜತೆಗೆ ಗಜಪಡೆಯ ಸಂಬಂಧ ನಕಾರಾತ್ಮಕ ಪೋಸ್ಟ್ ಬಿತ್ತರಿಸುವ ಸಾಮಾಜಿಕ ಜಾಲತಾಣದ ಮೇಲೂ ಹದ್ದಿನ ಕಣ್ಣಿದೆ. ಈ ಸಂಬಂಧ ಅರಣ್ಯ ಇಲಾಖೆ ಒಂದು ತಂಡ ಸೋಶಿಯಲ್ ಮೀಡಿಯಾವನ್ನು ಪರಿಶೀಲಿಸುತ್ತಿದೆ.

ಪ್ರತಿವರ್ಷ ದಸರಾ ಗಜಪಡೆ ಅರಮನೆಗೆ ಆಗಮಿಸುತ್ತಿದ್ದಂತೆ ಆನೆಗಳನ್ನು ನೋಡಲು, ಸೆಲ್ಫಿ ಕ್ಲಿಕ್ಕಿಸಿಕೊಳ್ಳಲು ಹಾಗೂ ವಿಡಿಯೋ ಮಾಡಲು ಸಾರ್ವಜನಿಕರು ಮುಗಿಬೀಳುತ್ತಿದ್ದರು. ಇದರಿಂದ ಆನೆಗಳಿಗೆ ಅನಗತ್ಯ ಕಿರಿಕಿರಿ ಹಾಗೂ ಒತ್ತಡ ಉಂಟಾಗುವ ಸಾಧ್ಯತೆ ಹಿನ್ನೆಲೆಯಲ್ಲಿ ಈ ಬಾರಿ ಅರಣ್ಯ ಇಲಾಖೆ ಕಟ್ಟುನಿಟ್ಟಿನ ಕ್ರಮ ಕೈಗೊಂಡಿದೆ. ಗಜಪಡೆಯಿಂದ ಸುಮಾರು 100 ಮೀಟರ್ ದೂರದಲ್ಲೇ ಸಾರ್ವಜನಿಕರನ್ನು ತಡೆಯಲಾಗುತ್ತಿದ್ದು, ಅನುಮತಿಯಿಲ್ಲದೆ ಯಾರನ್ನೂ ಆನೆಗಳ ಸಮೀಪಕ್ಕೆ ಬಿಡುತ್ತಿಲ್ಲ. ಆನೆ ತಾಣದ ಎಲ್ಲವನ್ನು ಸಿಸಿ ಕ್ಯಾಮರಾ ಮೂಲಕ ವಾಚ್ ಮಾಡಲಾಗುತ್ತಿದೆ.

ಗಜಪಡೆಯ ಸುತ್ತ ಬಿಗಿ ಭದ್ರತೆ ಕಲ್ಪಿಸಿರುವ ಪರಿಣಾಮ ಈ ಬಾರಿ ಆನೆ ಬಿಡಾರದಲ್ಲಿ ಜನರ ಓಡಾಟ ಕಡಿಮೆಯಾಗಿದ್ದು, ಗಜಪಡೆಗೆ ಶಾಂತ ಹಾಗೂ ನೆಮ್ಮದಿಯ ವಾತಾವರಣ ದೊರೆತಿದೆ. ಆನೆಗಳು ಆರಾಮವಾಗಿ ವಿಶ್ರಾಂತಿ ಪಡೆಯುವುದರ ಜತೆಗೆ ನಿಗದಿತ ಸಮಯದಲ್ಲಿ ಬೆಳಗ್ಗೆ ಮತ್ತು ಸಂಜೆ ತಾಲೀಮು ನಡೆಸುತ್ತಿವೆ. ಜಂಬೂಸವಾರಿ ಸಾಗುವ ಮಾರ್ಗದಲ್ಲಿ ಜನಸಂದಣಿ, ವಿವಿಧ ಶಬ್ದಗಳು ಹಾಗೂ ದೀಪದ ಬೆಳಕಿಗೆ ಆನೆಗಳನ್ನು ಹಂತ ಹಂತವಾಗಿ ಹೊಂದಿಸಲಾಗುತ್ತಿದೆ.

ದುಬಾರೆ ಶಿಬಿರ ಸೇರಿ ಈ ಹಿಂದಿನ ಕೆಲವು ಘಟನೆಗಳಿಂದ ಪಾಠ ಕಲಿತಿರುವ ಅರಣ್ಯ ಇಲಾಖೆ, ದಸರಾ ಗಜಪಡೆಯ ಸುರಕ್ಷತೆಯ ವಿಚಾರದಲ್ಲಿ ನಿರ್ಲಕ್ಷ್ಯಕ್ಕೆ ಅವಕಾಶ ನೀಡದಿರಲು ಮುಂದಾಗಿದೆ. ಆನೆಗಳ ಸ್ವಭಾವ ಹಾಗೂ ದಸರಾ ಕರ್ತವ್ಯದ ವೇಳೆ ಅವುಗಳ ಮೇಲೆ ಉಂಟಾಗುವ ಒತ್ತಡವನ್ನು ಗಮನದಲ್ಲಿಟ್ಟುಕೊಂಡು ಭದ್ರತಾ ವ್ಯವಸ್ಥೆಯನ್ನು ಬಿಗಿಗೊಳಿಸಲಾಗಿದೆ.

ಗಜಪಡೆ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಹರಡುವ ಸುಳ್ಳು ಹಾಗೂ ತಪ್ಪು ಮಾಹಿತಿಗಳ ಮೇಲೂ ಅರಣ್ಯ ಇಲಾಖೆ ನಿಗಾ ಇರಿಸಿದೆ. ದಸರಾ ಆನೆಗಳ ಬಗ್ಗೆ ಉದ್ದೇಶಪೂರ್ವಕವಾಗಿ ನಕಾರಾತ್ಮಕ ಪೋಸ್ಟ್ ಹಾಕುವುದು, ಆನೆಗಳ ಆರೋಗ್ಯ ಅಥವಾ ವರ್ತನೆಯ ಕುರಿತು ಪರಿಶೀಲಿಸದ ಮಾಹಿತಿಯನ್ನು ಹರಡುವುದು ಹಾಗೂ ಸಾರ್ವಜನಿಕರಲ್ಲಿ ಅನಗತ್ಯ ಆತಂಕ ಮೂಡಿಸುವಂತಹ ವಿಷಯಗಳನ್ನು ಪ್ರಕಟಿಸುವವರ ವಿರುದ್ಧವೂ ಕಠಿಣ ಕ್ರಮ ಕೈಗೊಳ್ಳಲು ಇಲಾಖೆ ಮುಂದಾಗಿದೆ. ಎಐ ತಂತ್ರಜ್ಞಾನ ಬಳಸಿ ಸೃಷ್ಟಿಸಿರುವ ವಿಡಿಯೋ, ಚಿತ್ರ ಅಥವಾ ದೃಶ್ಯಗಳನ್ನು ದಸರಾ ಗಜಪಡೆಯ ಆನೆಗಳದ್ದೇ ಎಂದು ಬಿಂಬಿಸಿ ಹರಿಬಿಡುವವರ ಮೇಲೂ ನಿಗಾ ಇರಿಸಲಾಗುತ್ತಿದೆ. ಹೀಗಾಗಿ ದಸರಾ ಗಜಪಡೆಯ ಕುರಿತು ಯಾವುದೇ ವಿಡಿಯೋ ಅಥವಾ ಮಾಹಿತಿ ಕಂಡುಬಂದರೆ ಅದರ ಸತ್ಯಾಸತ್ಯತೆ ಪರಿಶೀಲಿಸದೆ ಹಂಚಿಕೊಳ್ಳದಂತೆ ಸಾರ್ವಜನಿಕರಿಗೆ ಮನವಿ ಮಾಡಿದೆ.

"