ಸರ್ಕಾರಿ ಪದವಿ ಕಾಲೇಜುಗಳ ಪ್ರವೇಶಾತಿಗೆ ನಿರಾಸಕ್ತಿ...!

ಮೈಸೂರಿನ ಮಹಾರಾಣಿ ಕಾಲೇಜು

Published on:

14 Jun 2026, 10:30 am

ಪ್ರಮುಖ ಮುಖ್ಯಾಂಶಗಳು

ಪದವಿ ಕಾಲೇಜುಗಳತ್ತ ವಿದ್ಯಾರ್ಥಿಗಳು ವಿಮುಖ
ಮಂದಗತಿಯಲ್ಲಿ ಸಾಗಿರುವ ಪ್ರವೇಶಾತಿ
ವೃತ್ತಿ ಶಿಕ್ಷಣ ಕೋರ್ಸ್‌ಗಳತ್ತ ಒಲವು

ಮಂಜುನಾಥ ತಿಮ್ಮಯ್ಯ ಭೋವಿ ಮೈಸೂರು

ಸರ್ಕಾರಿ ಪದವಿ ಕಾಲೇಜುಗಳ ಈ ಸಾಲಿನ ಪ್ರವೇಶಾತಿ ಮಂದಗತಿಯಲ್ಲಿ ಸಾಗಿದ್ದು, ಸಾಂಪ್ರದಾಯಿಕ ಶಿಕ್ಷಣದತ್ತ ನಿರಾಸಕ್ತಿ ತೋರುತ್ತಿರುವ ವಿದ್ಯಾರ್ಥಿಗಳು ವೃತ್ತಿ ಶಿಕ್ಷಣ ಕೋರ್ಸ್‌ಗಳತ್ತ ಆಕರ್ಷಿತರಾಗಿದ್ದಾರೆ.

ಕಾಲೇಜು ಶಿಕ್ಷಣ ಇಲಾಖೆಯ ವ್ಯಾಪ್ತಿಯ ಸರ್ಕಾರಿ ಪದವಿ ಕಾಲೇಜಿನಲ್ಲಿ 2026-27ನೇ ಶೈಕ್ಷಣಿಕ ಸಾಲಿನ ದಾಖಲಾತಿ ಪ್ರಕ್ರಿಯೆ ಈಗಾಗಲೇ ಶುರುವಾಗಿದೆ. ಮೈಸೂರು, ಚಾಮರಾಜನಗರ, ಮಂಡ್ಯ, ಹಾಸನ ಜಿಲ್ಲೆಯಲ್ಲಿ ಈವರೆಗೆ ಶೇ.67.12 ವಿದ್ಯಾರ್ಥಿಗಳು ಪ್ರವೇಶ ಪಡೆದಿದ್ದು, ಇನ್ನೂ ಶೇ.32.88 ಸೀಟುಗಳು ಬಾಕಿ ಉಳಿದಿವೆ. ಇದು ವರ್ಷದಿಂದ ವರ್ಷಕ್ಕೆ ಪದವಿ ಕಾಲೇಜುಗಳು ಬೇಡಿಕೆ ಕುಸಿಯುತ್ತಿರುವುದಕ್ಕೆ ಸಾಕ್ಷಿಯಾಗಿದೆ.

ಇಂಜಿನಿಯರಿಂಗ್, ವೈದ್ಯಕೀಯ, ಪ್ಯಾರಾಮೆಡಿಕಲ್‌ನಂತಹ ಕೋರ್ಸ್‌ಗಳಿಗೆ ಅವಕಾಶ ಸಿಗದವರು ಪದವಿ ಕಾಲೇಜುಗಳತ್ತ ಮುಖ ಮಾಡಲಿದ್ದು, ಬಳಿಕವೇ ಉಳಿದ ಸೀಟುಗಳು ಭರ್ತಿಯಾಗುವ ಸಾಧ್ಯತೆ ಇದೆ. ಅದು ಸಹ ಗ್ಯಾರಂಟಿ ಇಲ್ಲ.

ನಾಲ್ಕು ಜಿಲ್ಲೆಗಳಲ್ಲಿ ಶೇ.33 ಸೀಟು ಖಾಲಿ:

ಮೈಸೂರು, ಮಂಡ್ಯ, ಹಾಸನ ಹಾಗೂ ಚಾಮರಾಜನಗರ ಜಿಲ್ಲೆಗಳಲ್ಲಿರುವ 75 ಪದವಿ ಕಾಲೇಜುಗಳು ಉನ್ನತ ಶಿಕ್ಷಣ ನೀಡುತ್ತಿವೆ. ಈವರೆಗೆ 11,195 ವಿದ್ಯಾರ್ಥಿಗಳು ಪ್ರವೇಶಾತಿ ಪಡೆದುಕೊಂಡಿದ್ದಾರೆ. ಕಳೆದ ವರ್ಷ 16,680 ವಿದ್ಯಾರ್ಥಿಗಳು ದಾಖಲಾತಿದ್ದರು. ಈ ಬಾರಿ ಇನ್ನೂ 5,485 ಸೀಟುಗಳು ಖಾಲಿ ಇವೆ.

ಈ ಪೈಕಿ 24 ಪದವಿ ಕಾಲೇಜುಗಳಿರುವ ಮೈಸೂರು ಜಿಲ್ಲೆಯಲ್ಲಿ ಅಧಿಕ ಪ್ರವೇಶಾತಿಯಾಗಿದ್ದು, ಇಲ್ಲಿ ಶೇ.78.98 ಅಭ್ಯರ್ಥಿಗಳು ಕಾಲೇಜಿಗೆ ಪ್ರವೇಶ ಪಡೆದಿದ್ದಾರೆ. ಸಕ್ಕರೆನಾಡು ಮಂಡ್ಯ ಜಿಲ್ಲೆಯಲ್ಲಿರುವ 15 ಪ್ರಥಮ ದರ್ಜೆ ಕಾಲೇಜುಗಳಲ್ಲಿ ಶೇ.73.07 ಪ್ರವೇಶಾತಿಯಾಗಿದ್ದು, 1,370 ವಿದ್ಯಾರ್ಥಿಗಳು ಉನ್ನತ ಶಿಕ್ಷಣ ಪಯಣ ಶುರು ಮಾಡಿದ್ದಾರೆ.

26 ಪದವಿ ಕಾಲೇಜುಗಳಿರುವ ಹಾಸನ ಜಿಲ್ಲೆಯಲ್ಲಿ ಕಡಿಮೆ ಪ್ರವೇಶಾತಿಯಾಗಿದೆ. ಈವರೆಗೆ ಶೇ.47.85 ಸೀಟು ಮಾತ್ರ ಭರ್ತಿಯಾಗಿದ್ದು, ಇನ್ನೂ ಶೇ.52 ಸೀಟುಗಳು ಖಾಲಿ ಉಳಿದಿವೆ. ಕಳೆದ ವರ್ಷ ಈ ಜಿಲ್ಲೆಯಲ್ಲಿ 5,057 ವಿದ್ಯಾರ್ಥಿಗಳು ದಾಖಲಾಗಿದ್ದರು. 10 ಸರ್ಕಾರಿ ಪದವಿ ಕಾಲೇಜುಗಳನ್ನು ಹೊಂದಿರುವ ಗಡಿ ಜಿಲ್ಲೆ ಚಾಮರಾಜನಗರ ಜಿಲ್ಲೆಯಲ್ಲಿ ಶೇ.56.07 ಪ್ರವೇಶಾತಿಯಾಗಿದ್ದು, 720 ವಿದ್ಯಾರ್ಥಿಗಳು ದಾಖಲಾಗಿದ್ದಾರೆ. ಇನ್ನೂ ಶೇ.44 ಸೀಟು ಭರ್ತಿಯಾಗಬೇಕಿದೆ.

ಮೈಸೂರು ಜಿಲ್ಲೆಯಲ್ಲಿ ಶೇ.78 ದಾಖಲಾತಿ:

ಮೈಸೂರಿನಲ್ಲಿರುವ ಸರ್ಕಾರಿ ಮಹಾರಾಜ ಸಂಸ್ಕೃತ ಕಾಲೇಜಿನಲ್ಲೇ ಪ್ರವೇಶಾತಿ ಇನ್ನೂ ಒಂದಂಕಿಯನ್ನೂ ದಾಟಿಲ್ಲ. ಈವರೆಗೆ 7 ವಿದ್ಯಾರ್ಥಿಗಳು ಮಾತ್ರ ದಾಖಲಾಗಿದ್ದಾರೆ. ಶೇ.96 ಸೀಟು ಖಾಲಿ ಇವೆ. ಇಲ್ಲಿಯ ಕೋರ್ಸ್‌ಗಳಿಗೆ ಬೇಡಿಕೆ ತೀರ ಕುಸಿದಿದೆ. ಸರಗೂರಿನ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಶೇ.32 ಮಕ್ಕಳು ಪ್ರವೇಶ ಪಡೆದುಕೊಂಡಿದ್ದಾರೆ. ಕಳೆದ ವರ್ಷ ಇಲ್ಲಿ ಬರೀ 88 ವಿದ್ಯಾರ್ಥಿಗಳು ಸೇರಿಕೊಂಡಿದ್ದರು. ಹನಗೂಡು ಪದವಿ ಕಾಲೇಜಿನಲ್ಲಿ ಶೇ.38, ತಿ.ನರಸೀಪುರ ತಾಲೂಕಿನ ತಲಕಾಡಿನ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಶೇ.32 ಮಾತ್ರ ದಾಖಲಾತಿಯಾಗಿದೆ. ಉಭಯ ಕಾಲೇಜಿನಲ್ಲಿ ಕ್ರಮವಾಗಿ 26 ಮತ್ತು 16 ವಿದ್ಯಾರ್ಥಿಗಳ ಪ್ರವೇಶಾತಿಯಾಗಿದೆ.

ಮಹಾರಾಣಿ ಕಾಲೇಜಿಗೆ ಬಲು ಬೇಡಿಕೆ

ಮೂರು ಮಹಾರಾಣಿ ಕಾಲೇಜುಗಳಿಗೆ ಮಾತ್ರ ಬೇಡಿಕೆಯೇ ಕಡಿಮೆಯಾಗಿಲ್ಲ. ಇದಕ್ಕೆ ಸಂಬಂಧಿಸಿದ ಕಲಾ, ವಿಜ್ಞಾನ, ವಾಣಿಜ್ಯ ಕಾಲೇಜುಗಳ ಪ್ರವೇಶಾತಿಗೆ ವಿದ್ಯಾರ್ಥಿನಿಯರು ಮುಗಿಬಿದ್ದಿದ್ದಾರೆ. ಈಗಾಗಲೇ ಕಲಾ ಕಾಲೇಜಿನಲ್ಲಿರುವ ಬಹುತೇಕ ಸೀಟುಗಳು ಭರ್ತಿಯಾಗಿದ್ದು, ಉಳಿದ ವಿಜ್ಞಾನ, ವಾಣಿಜ್ಯ ಕಾಲೇಜುಗಳಲ್ಲೂ ಸೀಟುಗಳು ಭರ್ತಿಯಾಗುವ ಹಂತಕ್ಕೆ ಬಂದಿವೆ.

ಚಾಮರಾಜನಗರದಲ್ಲಿ ಶೇ.44 ದಾಖಲಾತಿ ಬಾಕಿ

ಚಾಮರಾಜನಗರ ತಾಲೂಕಿನ ಭೋಗಾಪುರದ ವಸತಿಯುಕ್ತ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಶೇ.36, ಗುಂಡ್ಲುಪೇಟೆಯ ಪದವಿ ಕಾಲೇಜಿನಲ್ಲಿ ಶೇ.42 ದಾಖಲಾತಿಯಾಗಿದೆ. ಈ ಜಿಲ್ಲೆಯ ಕಾಲೇಜುಗಳಲ್ಲಿ ಶೇ.40ರಿಂದ 60ರ ಒಳಗೆ ಪ್ರವೇಶಾತಿಯಾಗಿದೆ.

ಆದರೆ, ಚಾಮರಾಜನರಗದ ಮಹಿಳಾ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಅಗತ್ಯಕ್ಕಿಂತ ಹೆಚ್ಚಿನ ಪ್ರಮಾಣದಲ್ಲಿ ವಿದ್ಯಾರ್ಥಿನಿಯರು ಪ್ರವೇಶ ಪಡೆದುಕೊಂಡಿದ್ದು ವಿಶೇಷ. ಶೇ.121 ಸಾಧನೆ ಮಾಡಲಾಗಿದೆ. ಈ ಕಾಲೇಜಿನಲ್ಲಿ ಕಳೆದ ವರ್ಷ 187 ವಿದ್ಯಾರ್ಥಿಗಳು ಪ್ರವೇಶ ಗಿಟ್ಟಿಸಿದ್ದರೆ, ಈ ಸಲ 228 ವಿದ್ಯಾರ್ಥಿಗಳು ದಾಖಲಾಗಿದ್ದಾರೆ. ಇದು ಗಮನಾರ್ಹ ಬೆಳವಣಿಗೆ.

ಮಂಡ್ಯ ಜಿಲ್ಲೆಯಲ್ಲಿ ಕೊಂಚ ಉತ್ತಮ:

ಸ್ವಾಯತ್ತ ಸಂಸ್ಥೆಯಾಗಿರುವ ಮಂಡ್ಯ ಮಹಾವಿದ್ಯಾಲಯ, ಭಾರತೀ ನಗರ ಸರ್ಕಾರಿ ಪ್ರಥಮ ಕಾಲೇಜಿನಲ್ಲಿ ಪ್ರವೇಶಾತಿ ಇನ್ನೂ ಶುರುವಾಗಿಲ್ಲ. ಕೆ.ಆರ್.ಪೇಟೆ ಕಾಲೇಜಿನಲ್ಲಿ ಶೇ.24, ಕೃಷ್ಣರಾಜನಗರದ ಕಾಲೇಜಿನಲ್ಲಿ ಶೇ.28, ಹಲಗೂರು ಕಾಲೇಜಿನಲ್ಲಿ ಶೇ.29, ಮೇಲುಕೋಟೆ ಕಾಲೇಜಿನಲ್ಲಿ ಶೇ.24 ಕಡಿಮೆ ಪ್ರವೇಶಾತಿಯಾಗಿದೆ.

ಹಾಸನ ಜಿಲ್ಲೆಯಲ್ಲಿ ಕಡಿಮೆ ದಾಖಲಾತಿ:

ಹಾಸನ ಜಿಲ್ಲೆಯಲ್ಲೂ ಇದೇ ಸ್ಥಿತಿ ಇದೆ. ಆಲೂರು ಕಾಲೇಜಿನಲ್ಲಿ ಶೇ.14, ಸಕಲೇಶಪುರ ಕಾಲೇಜಿನಲ್ಲಿ 15, ಹೊಳೇನರಸೀಪುರದ ಮಹಿಳಾ ಸರ್ಕಾರಿ ಗೃಹವಿಜ್ಞಾನ ಕಾಲೇಜಿನಲ್ಲಿ ಶೇ.20, ಬೇಲೂರು ಕಾಲೇಜಿನಲ್ಲಿ ಶೇ.29, ಹಳೇಬೀಡು ಕಾಲೇಜಿನಲ್ಲಿ 27, ಗಂಡಸಿಯಲ್ಲಿರುವ ಕಾಲೇಜಿನಲ್ಲಿ ಶೇ.20, ಅರಕಲಗೂಡು ಕಾಲೇಜಿನಲ್ಲಿ ಶೇ.26 ವಿದ್ಯಾರ್ಥಿಗಳು ಮಾತ್ರ ಪ್ರವೇಶ ಪಡೆದುಕೊಂಡಿದ್ದಾರೆ.

ಹಳ್ಳಿ ಕಾಲೇಜಿಗಳತ್ತ ನಿರಾಸಕ್ತಿ

ಜಿಲ್ಲಾ ಕೇಂದ್ರದಲ್ಲಿರುವ ಕಾಲೇಜುಗಳನ್ನು ಹೊರತುಪಡಿಸಿ ತಾಲೂಕು ಕೇಂದ್ರ, ಹೋಬಳಿ ಹಂತದಲ್ಲಿರುವ ಸರ್ಕಾರಿ ಪದವಿ ಕಾಲೇಜುಗಳು ಬೇಡಿಕೆ ಕಳೆದುಕೊಂಡಿದ್ದು, ಮೂಲಸೌಕರ್ಯ ಕೊರತೆ ಇರುವ ಇಲ್ಲಿಯ ಕಾಲೇಜುಗಳು ಪ್ರವೇಶ ಪಡೆದುಕೊಳ್ಳಲು ಇಷ್ಟಪಡದ ವಿದ್ಯಾರ್ಥಿಗಳು, ಜಿಲ್ಲಾ ಕೇಂದ್ರದತ್ತ ವಲಸೆ ಹೋಗುತ್ತಿದ್ದಾರೆ.

ಪದವಿ ಕಾಲೇಜುಗಳು ಎರಡನೇ ಆಯ್ಕೆ

ಪದವಿ ಕಾಲೇಜಿನ ಶಿಕ್ಷಣ ಕೇವಲ ಉದ್ಯೋಗ ಪಡೆಯುವ ಮೆಟ್ಟಿಲಲ್ಲದೆ, ನಿರ್ದಿಷ್ಟ ವಿಷಯದ ಆಳವಾದ ಜ್ಞಾನ, ವಿಮರ್ಶಾತ್ಮಕ ಆಲೋಚನೆ, ಉನ್ನತ ವ್ಯಕ್ತಿತ್ವವನ್ನು ರೂಪಿಸುವಲ್ಲಿ ಮಹತ್ವದ ಪಾತ್ರ ವಹಿಸುತ್ತದೆ. ಆದರೆ, ಇದು ವಿದ್ಯಾರ್ಥಿಗಳಿಗೆ 2ನೇ ಆಯ್ಕೆಯಾಗಿದ್ದು, ಇಂಜಿನಿಯರಿಂಗ್, ವೈದ್ಯಕೀಯ, ಪ್ಯಾರಾಮೆಡಿಕಲ್, ನರ್ಸಿಂಗ್‌ನಂತಹ ವೃತ್ತಿಪರ ಕೋರ್ಸ್ ಕಲಿಕೆಯೇ ಮೊದಲ ಆದ್ಯತೆಯಾಗಿದೆ. ಇಲ್ಲಿ ಅವಕಾಶ ಸಿಗದಿದ್ದರೆ ಪದವಿ ಕಾಲೇಜುಗಳತ್ತ ಬರುತ್ತಿದ್ದಾರೆ. ಹೀಗಾಗಿ, ಬಿಇ, ಮೆಡಿಕಲ್ ಕೋರ್ಸ್‌ಗಳ ಕೌನ್ಸೆಲಿಂಗ್ ಮುಗಿದ ಬಳಿಕವೇ ಪದವಿ ಕಾಲೇಜುಗಳು ಸೀಟುಗಳು ಭರ್ತಿಯಾಗುತ್ತವೆ. ಇಲ್ಲದಿದ್ದರೆ ಹಾಗೇ ಖಾಲಿ ಹೊಡೆಯುತ್ತವೆ.

ವಿದ್ಯಾರ್ಥಿಗಳ ಸಂಖ್ಯೆ ಹೆಚ್ಚಿಸಲು ಕಸರತ್ತು:

ಪ್ರವೇಶಾತಿ ಹೆಚ್ಚಿಸಲು ಸರ್ಕಾರಿ ಪದವಿ ಕಾಲೇಜುಗಳ ಬೋಧಕರು ಕಸರತ್ತು ಮಾಡುತ್ತಿದ್ದಾರೆ. ಕಳೆದ 4-5 ತಿಂಗಳಿಂದಲೇ ಈ ಕುರಿತು ಶ್ರಮ ಹಾಕುತ್ತಿದ್ದಾರೆ. ಪಿಯುಸಿ ಕಾಲೇಜುಗಳಿಗೆ ಭೇಟಿ ನೀಡಿ ದ್ವಿತೀಯ ವರ್ಷ ವಿದ್ಯಾರ್ಥಿಗಳಿಗೆ ಕೋರ್ಸ್‌ಗಳು, ಕಾಲೇಜಿನಲ್ಲಿರುವ ಸೌಲಭ್ಯ ಕುರಿತು ಮನವರಿಕೆ ಮಾಡಿಕೊಟ್ಟು ದಾಖಲಾತಿ ಆಗುವಂತೆ ಮನವೊಲಿಸಿದ್ದಾರೆ. ಜತೆಗೆ, ಸಾಂಪ್ರದಾಯಿಕ ಕೋರ್ಸ್‌ಗಳೊಂದಿಗೆ ಬೇಡಿಕೆ ತಕ್ಕಂತೆ ಬಿಸಿಎ, ಅಪರಾಧ ಶಾಸ್ತ್ರ, ಹೋಮ್ ಸೈನ್ಸ್‌ನಂತಹ ಉದ್ಯೋಗಾಧಾರಿತ ಕೋರ್ಸ್‌ಗಳನ್ನು ಹೊಸದಾಗಿ ಶುರು ಮಾಡಿ ವಿದ್ಯಾರ್ಥಿಗಳನ್ನು ಆಕರ್ಷಿಸಲಾಗುತ್ತಿದೆ.

ಸರ್ಕಾರಿ ಪದವಿ ಕಾಲೇಜುಗಳ ದಾಖಲಾತಿ ವಿವರ

ಜಿಲ್ಲೆ 2025-26 2026-27 ಶೇಕಡವಾರು

ಮೈಸೂರು 8,464 6,685 78.98

ಚಾಮರಾಜನಗರ 1,284 720 65.07

ಹಾಸನ 5,057 2,420 47.85

ಮಂಡ್ಯ 1,875 1,370 73.07

ಒಟ್ಟು 16,680 11,195 67.12

ಮೈಸೂರು, ಹಾಸನ, ಚಾಮರಾಜನಗರ, ಮಂಡ್ಯ ಜಿಲ್ಲೆಯಲ್ಲಿರುವ ಸರ್ಕಾರಿ ಪದವಿ ಕಾಲೇಜುಗಳ ಪ್ರವೇಶಾತಿ ಹೆಚ್ಚಿಸಲಾಗುತ್ತಿದೆ. ಆಯಾ ಕಾಲೇಜಿನ ಬೋಧಕರು, ಸಿಬ್ಬಂದಿ ಈ ನಿಟ್ಟಿನಲ್ಲಿ ಪ್ರಯತ್ನಿಸುತ್ತಿದ್ದಾರೆ. ಹಳ್ಳಿಗಳಿಗೆ ಹೋಗಿ ಮಕ್ಕಳ ಮನವೊಲಿಸುವ ಕೆಲಸ ಮಾಡುತ್ತಿದ್ದಾರೆ. ಪ್ರವೇಶಾತಿ ಕೊನೆ ದಿನಾಂಕ ಇನ್ನೂ ನಿಗದಿಪಡಿಸಿಲ್ಲ. ವಿದ್ಯಾರ್ಥಿಗಳು ದಾಖಲಾಗಬಹುದು.

ಪದವಿ ಕಾಲೇಜು