ಮೈಸೂರು: ಇಂದಿನ ಸ್ಪರ್ಧಾತ್ಮಕ ವೃತ್ತಿಪರ ಜಗತ್ತಿಗೆ ವಿದ್ಯಾರ್ಥಿಗಳನ್ನು ಅಣಿಗೊಳಿಸುವ ಹಾಗೂ ಪಠ್ಯದ ಆಚೆಗಿನ ಪ್ರಾಯೋಗಿಕ ಜ್ಞಾನವನ್ನು ಒದಗಿಸುವ ಮಹತ್ವಾಕಾಂಕ್ಷೆಯೊಂದಿಗೆ ಮೈಸೂರಿನ ಹೂಟಗಳ್ಳಿಯಲ್ಲಿರುವ ದಕ್ಷ ಫಸ್ಟ್ ಗ್ರೇಡ್ ಕಾಲೇಜಿನಲ್ಲಿ ‘ದಕ್ಷ ಎಕ್ಸ್ಪರ್ಟ್ ಕನೆಕ್ಟ್’ (Daksha Expert Connect) ಎಂಬ ವಿನೂತನ ಸಂವಾದ ಕಾರ್ಯಕ್ರಮವನ್ನು ಆಯೋಜಿಸಲಾಗಿತ್ತು.
ದಕ್ಷ ಫಸ್ಟ್ ಗ್ರೇಡ್ ಕಾಲೇಜು ಹಾಗೂ ಗ್ಲೋಬಲ್ ಎಜುಕೇಷನ್ ಟ್ರಸ್ಟ್ನ ಆಂತರಿಕ ಗುಣಮಟ್ಟ ಭರವಸೆ ಘಟಕದ (ಐಕ್ಯೂಎಸಿ) ಜಂಟಿ ಆಶ್ರಯದಲ್ಲಿ ‘ಎಕ್ಸ್ಪ್ಲೋರ್, ಇಂಟರಾಕ್ಟ್, ಇನ್ನೋವೇಟ್, ಇವಾಲ್ವ್’ ಎಂಬ ವಿಶಿಷ್ಟ ಆಶಯದಡಿ ಈ ಜ್ಞಾನದಾನ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿತ್ತು. ಗ್ಲೋಬಲ್ ಎಜುಕೇಷನ್ ಟ್ರಸ್ಟ್ನ ಅಧ್ಯಕ್ಷರಾದ ಡಾ. ಪಿ. ಜಯಚಂದ್ರ ರಾಜು ಅವರ ಅಧ್ಯಕ್ಷತೆಯಲ್ಲಿ ನಡೆದ ಈ ಕಾರ್ಯಕ್ರಮವು, ವಿವಿಧ ವೃತ್ತಿಪರ ಕ್ಷೇತ್ರಗಳ ಆಗುಹೋಗುಗಳನ್ನು ವಿದ್ಯಾರ್ಥಿಗಳ ಮುಂದಿಡುವಲ್ಲಿ ಯಶಸ್ವಿಯಾಯಿತು.
ವಿಷಯ ತಜ್ಞರಿಂದ ಪ್ರಾಯೋಗಿಕ ಜ್ಞಾನದ ಧಾರೆ
ಭವಿಷ್ಯದ ತಂತ್ರಜ್ಞಾನಗಳು ಹಾಗೂ ವೃತ್ತಿಪರ ಕೌಶಲಗಳ ಕುರಿತು ವಿದ್ಯಾರ್ಥಿಗಳಿಗೆ ಅರಿವು ಮೂಡಿಸಲು ಕೋಚಿಂಗ್, ಕೃತಕ ಬುದ್ಧಿಮತ್ತೆ (AI) ಹಾಗೂ ಕ್ಲೌಡ್ ತಂತ್ರಜ್ಞಾನ ಕ್ಷೇತ್ರದ ದಿಗ್ಗಜರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.
ಇಂಟರ್ನ್ಯಾಷನಲ್ ಕೋಚಿಂಗ್ ಫೆಡರೇಷನ್ನ ಮಾಸ್ಟರ್ ಸರ್ಟಿಫೈಡ್ ಕೋಚ್ ಆಗಿರುವ ಅಲನ್ ಮೇಯ್ನ್ ಅವರು ‘ದಿ ಸೈನ್ಸ್ ಆಫ್ ಕೋಚಿಂಗ್’ ವಿಷಯದ ಕುರಿತು ವಿಶೇಷ ಉಪನ್ಯಾಸ ನೀಡಿದರು. ಎಡಬ್ಲ್ಯೂಎಸ್ ಕ್ಲೌಡ್ ಕನ್ಸಲ್ಟಿಂಗ್ ಪಾರ್ಟ್ನರ್ ಜೋಸ್ ಮಲಿಯಾಕಲ್ ಅವರು ಮಾತನಾಡಿ ‘ಫ್ರಮ್ ಸ್ಮಾರ್ಟ್ ಟು ಎಐ-ಸ್ಮಾರ್ಟ್: ಫ್ಯೂಚರ್-ಪ್ರೂಫ್ ಯುವರ್ಸೆಲ್ಫ್’ ಎಂಬ ಪ್ರಸ್ತುತ ಕಾಲಘಟ್ಟಕ್ಕೆ ಅತ್ಯಗತ್ಯವಾದ ವಿಷಯದ ಮೇಲೆ ಬೆಳಕು ಚೆಲ್ಲಿದರು.
ವಿಮಾನಯಾನ; ಸವಾಲುಗಳ ಅನಾವರಣ
ಕಾರ್ಯಕ್ರಮದ ಮತ್ತೊಂದು ಪ್ರಮುಖ ಘಟ್ಟದಲ್ಲಿ ವಿಮಾನಯಾನ ಕ್ಷೇತ್ರದ ಸಂಕೀರ್ಣತೆಗಳ ಬಗ್ಗೆ ವಿದ್ಯಾರ್ಥಿಗಳಿಗೆ ಮಾಹಿತಿ ನೀಡಲಾಯಿತು. ವಿಮಾನ ನಿಲ್ದಾಣ ಕಾರ್ಯಾಚರಣೆಗಳ ಮಾಜಿ ಮುಖ್ಯಸ್ಥ ಸುಕುಮಾರ್ ಪಾಂಡಾ ಅವರು, ವಿಮಾನ ನಿಲ್ದಾಣದ ಸುಗಮ ಕಾರ್ಯಾಚರಣೆಯ ಹಿಂದಿರುವ ಕಠಿಣ ಶ್ರಮ, ನಿಖರವಾದ ಯೋಜನೆ ಹಾಗೂ ಅಷ್ಟೇ ಕಟ್ಟುನಿಟ್ಟಾದ ಭದ್ರತಾ ನಿಯಮಗಳ ಕುರಿತು ವಿವರಿಸಿದರು.
ವಿವಿಧ ತಜ್ಞರ ವಿಚಾರ ವಿನಿಮಯದ ನಂತರ ನಡೆದ ‘ಫೈರ್ಸೈಡ್ ಚಾಟ್’ ಸಂವಾದ ಕಾರ್ಯಕ್ರಮವು ವಿದ್ಯಾರ್ಥಿಗಳಲ್ಲಿ ಹೊಸ ಚಿಂತನೆಗಳನ್ನು ಹುಟ್ಟುಹಾಕಿತು. ಗ್ಲೋಬಲ್ ಎಜುಕೇಷನ್ ಟ್ರಸ್ಟ್ನ ಅಧ್ಯಕ್ಷ ಡಾ. ಪಿ. ಜಯಚಂದ್ರ ರಾಜು ಅವರು ಈ ಸಂವಾದವನ್ನು ಮುನ್ನಡೆಸಿದರು. ಶಿಕ್ಷಣ ಎಂದರೆ ಕೇವಲ ತರಗತಿಯ ಪಾಠಗಳು ಮತ್ತು ಪಠ್ಯಪುಸ್ತಕದ ಸೈದ್ಧಾಂತಿಕ ಜ್ಞಾನಕ್ಕೆ ಮಾತ್ರ ಸೀಮಿತವಾಗಬಾರದು ಎಂದು ಪ್ರತಿಪಾದಿಸಿದ ಅವರು, ಬದಲಾಗುತ್ತಿರುವ ಜಾಗತಿಕ ಸನ್ನಿವೇಶಗಳಿಗೆ ಹೊಂದಿಕೊಳ್ಳುವ ಕುತೂಹಲ ಮತ್ತು ನವೀನತೆಯನ್ನು ಸ್ವೀಕರಿಸುವ ಧೈರ್ಯವನ್ನು ವಿದ್ಯಾರ್ಥಿಗಳು ಮೈಗೂಡಿಸಿಕೊಳ್ಳಬೇಕು ಎಂದರು.
ಕಾರ್ಯಕ್ರಮದಲ್ಲಿ ಗ್ಲೋಬಲ್ ಎಜುಕೇಷನ್ ಟ್ರಸ್ಟ್ನ ವ್ಯವಸ್ಥಾಪಕ ನಿರ್ದೇಶಕ ಗೌತಮ್ ರಾಜು, ಕಾರ್ಯದರ್ಶಿ ಸೋನಿಯಾ ಉಮಾಪತಿ, ದಕ್ಷ ಫಸ್ಟ್ ಗ್ರೇಡ್ ಕಾಲೇಜಿನ ಉನ್ನತ ಶಿಕ್ಷಣ ನಿರ್ದೇಶಕ ಹರೀಶ್ ಪಿ., ಪ್ರಾಂಶುಪಾಲ ಡಾ. ಕೆ.ವಿ. ಸುರೇಶ ಹಾಗೂ ಐಕ್ಯೂಎಸಿ ಸಂಯೋಜಕಿ ಡಾ. ಅರ್ಪಿತಾ ಎಚ್.ಆರ್. ಸೇರಿದಂತೆ ಕಾಲೇಜಿನ ಬೋಧಕ, ಬೋಧಕೇತರ ಸಿಬ್ಬಂದಿ ಮತ್ತು ಅಪಾರ ಸಂಖ್ಯೆಯ ವಿದ್ಯಾರ್ಥಿಗಳು ಈ ಜ್ಞಾನದಾನ ಕಾರ್ಯಕ್ರಮಕ್ಕೆ ಸಾಕ್ಷಿಯಾದರು.
