ಶಾಂತಿ, ಸೌಹಾರ್ದತೆಯಿಂದ ಹಬ್ಬ ಆಚರಿಸಿ

ಸಭೆಯಲ್ಲಿ ಬಲ್ಲಯ್ಯ ಮಾತನಾಡಿ, ಬಂಡಿ ಉತ್ಸವದ ಸಂದರ್ಭದಲ್ಲಿ ಎತ್ತುಗಳ ನಿಲುಗಡೆಗೆ ಪರ್ಯಾಯ ಸ್ಥಳವನ್ನು ವ್ಯವಸ್ಥೆ ಹಾಗೂ ಪೂಜೆಗೆ ಆಗಮಿಸುವ ಮಹಿಳೆಯರಿಗೆ ದೇಗುಲಕ್ಕೆ ಹೋಗಲು ಅನುವು ಮಾಡಿಕೊಡಬೇಕು. ಕಳೆದ ವರ್ಷ ರಥೋತ್ಸವದ ವೇಳೆ ನಡೆದ ಘಟನೆಯಲ್ಲಿ ಭಾಗಿಯಾಗಿದ್ದವರ ಮೇಲಿನ ಮೊಕದಮ್ಮೆಯನ್ನು ಖುಲಾಸೆ ಮಾಡಿಕೊಡಬೇಕೆಂದು ಕೇಳಿಕೊಂಡರು. ಬಂಡಿಯ ರುದ್ರಾಕ್ಷಿ ಮಂಟಪ ಹಾಗೂ ರಥೋತ್ಸವದ ಮೇಲೆ ಕೆಲವೇ ಮಂದಿಗೆ ಮಾತ್ರ ಅವಕಾಶ ನೀಡಬೇಕು. ಜಾತ್ರೆಯ ಉತ್ಸವದ ವೇಳೆ ಯಾವುದೇ ಚಿತ್ರ ನಟರ ಭಾವಚಿತ್ರದ ಬಾವುಟ ಪ್ರದರ್ಶನ ನಿಷೇಧಿಸಿ, ಭಕ್ತರಿಗೆ ಕಿರಿಕಿರಿಯನ್ನುಂಟು ಮಾಡುವ ಪುಂಡರ ಮೇಲೆ ನಿಗಾ ವಹಿಸಬೇಕು. 5 ದಿನವೂ ಹೆಚ್ಚುವರಿ ಪೊಲೀಸ್ ಸಿಬ್ಬಂದಿಯನ್ನು ನಿಯೋಜಿಸುವ ಮೂಲಕ ಜಾತ್ರಾ ಮಹೋತ್ಸವವನ್ನು ಯಶಸ್ವಿಗೊಳಿಸಿಕೊಡಬೇಕೆಂದು ಮನವಿ ಮಾಡಿದರು.