ಮೈಸೂರು

ದಸರಾ ಗಜಪಡೆಯಲ್ಲಿ ಭೀಮನದ್ದೇ ಕ್ರೇಜ್

ಭೀಮ ಆನೆ
ಭೀಮ ಆನೆ
ಅವಿನಾಶ್ ಜೈನಹಳ್ಳಿ
Published on: 

ಪ್ರಮುಖ ಮುಖ್ಯಾಂಶಗಳು

  • ಎಲ್ಲರ ಅಚ್ಚುಮೆಚ್ಚಿನ ಆನೆ
  • ಮಸ್ತ್ ಕಾರಣ ಮೀಸಲು ಪಟ್ಟಿಯಲ್ಲಿರುವ ಗಜರಾಜ
  • ಮತ್ತೆ ದಸರಾ ತಂಡಕ್ಕೆ ಸೇರ್ಪಡೆಗೊಳ್ಳುವ ಸಾಧ್ಯತೆ

ಅವಿನಾಶ್ ಜೈನಹಳ್ಳಿ ಮೈಸೂರು

ಅರಮನೆ ನಗರಿಯ ರಾಜಮಾರ್ಗದಲ್ಲಿ ದಸರಾ ಗಜಪಡೆ ತಾಲೀಮು ನಡೆಸುವಾಗ ಸಾವಿರಾರು ಮಂದಿ ಕಣ್ತುಂಬಿಕೊಳ್ಳಲು ಮುಗಿಬೀಳುತ್ತಾರೆ. ಆದರೆ, ಆನೆಗಳ ಸಾಲು ಸಾಗುತ್ತಿದ್ದರೆ ಜನರ ಮೊಬೈಲ್ ಕ್ಯಾಮರಾಗಳೆಲ್ಲವೂ ಒಂದೇ ಕಡೆ ತಿರುಗುತ್ತವೆ. ಜತೆಗೆ ಜನರ ಬಾಯಲ್ಲಿ ಪದೇ ಪದೆ ಕೇಳಿಬರುವ ಹೆಸರು ಭೀಮ...!
ಯಾರಾದರೂ ಭೀಮ ಎಂದು ಕೂಗಿದರೆ ಸಾಕು... ಸೊಂಡಿಲು ಎತ್ತಿ ನಮಸ್ಕರಿಸುವ ಮೂಲಕ ಅಭಿಮಾನಿಗಳಿಗೆ ಮುದ ನೀಡುವ ಈ ಗಜರಾಜನಿಗೆ ಮೈಸೂರಿನಲ್ಲಿ ಅಪಾರ ಅಭಿಮಾನಿ ಬಳಗವೇ ಇದೆ.
ಹೌದು. ವಿಶ್ವವಿಖ್ಯಾತ ಮೈಸೂರು ದಸರಾ ಮಹೋತ್ಸವದ ಗಜಪಡೆಯ ಆನೆಗಳ ಪೈಕಿ ಅತಿಹೆಚ್ಚು ಅಭಿಮಾನಿಗಳನ್ನು ಹೊಂದಿರುವ ಆನೆಗಳಲ್ಲಿ ಭೀಮನೂ ಒಬ್ಬ. ಅಂಬಾರಿ ಹೊತ್ತಿಲ್ಲದಿದ್ದರೂ, ಜನಪ್ರಿಯತೆಯಲ್ಲಿ ಮುಂದಿರುವ ಭೀಮನಿಗೆ ಈ ಬಾರಿ ಮಸ್ತ್ ಇರುವ ಕಾರಣ ದಸರಾ ಗಜಪಡೆಯ ಮೊದಲ ಹಾಗೂ ಎರಡನೇ ತಂಡದಲ್ಲಿ ಸ್ಥಾನ ಸಿಕ್ಕಿಲ್ಲ. ಬದಲಿಗೆ ಮೀಸಲು ಆನೆಯಾಗಿ ಉಳಿದಿರುವುದು ಭೀಮ ಅಭಿಮಾನಿಗಳಿಗೆ ಕೊಂಚ ಬೇಸರ ಮೂಡಿಸಿದೆ.
ನಾಡಹಬ್ಬದ ಪ್ರಮುಖ ಆಕರ್ಷಣೆಯಾದ ಜಂಬೂಸವಾರಿಯಲ್ಲಿ ಭೀಮ ಈಗಾಗಲೇ 2017, 2022, 2023, 2024 ಹಾಗೂ 2025ರಲ್ಲಿ ಭಾಗವಹಿಸಿದ್ದಾನೆ. ಸತತವಾಗಿ ದಸರಾ ಮೆರವಣಿಗೆಯಲ್ಲಿ ಕಾಣಿಸಿಕೊಂಡಿರುವ ಭೀಮನನ್ನು ಈ ಬಾರಿಯೂ ಕಣ್ತುಂಬಿಕೊಳ್ಳಲು ಅಭಿಮಾನಿಗಳು ಕಾತರರಾಗಿದ್ದರು. ಆದರೆ, ಮಸ್ತ್‌ನಲ್ಲಿರುವ ಕಾರಣ ಭೀಮ ಮುಖ್ಯ ತಂಡದಿಂದ ಹೊರಗುಳಿದಿರುವುದು ನಿರಾಸೆ ಮೂಡಿಸಿದೆ. ಆದರೂ, ದಸರಾ ಆರಂಭವಾಗುವ ಹೊತ್ತಿಗೆ ಮಸ್ತ್ ಕಡಿಮೆಯಾದರೆ ಭೀಮನನ್ನು ಮತ್ತೆ ಗಜಪಡೆಗೆ ಕರೆತರುವ ಸಾಧ್ಯತೆ ಇದೆ.

ಭೀಮ... ಭೀಮ... ಎಂದರೆ ಸಾಕು!

ಸುಮಾರು 26 ವರ್ಷದ ಭೀಮ ದಸರಾ ಗಜಪಡೆಯ ಅತಿ ಕಿರಿಯ ಆನೆ. ಸುಮಾರು 2.85 ಮೀಟರ್ ಎತ್ತರ, 3.05 ಮೀಟರ್ ಉದ್ದ ಹಾಗೂ 5,300 ಕೆ.ಜಿ. ತೂಕ ಹೊಂದಿರುವ ಭೀಮನಿಗೆ ಭವ್ಯ ದಂತ, ಗಟ್ಟಿಯಾದ ದೇಹದ ರಚನೆ ಹಾಗೂ ಸಮತಟ್ಟಾದ ಬೆನ್ನು ಇದೆ. ದಸರಾ ಗಜಪಡೆ ತಾಲೀಮು ನಡೆಸುವ ವೇಳೆ ಭೀಮನನ್ನು ಕಂಡರೆ ಸಾಕು, ಜನರ ಮೊಬೈಲ್ ಕ್ಯಾಮರಾಗಳು ಆತನತ್ತ ತಿರುಗುತ್ತವೆ. ಭೀಮ... ಭೀಮ... ಎಂಬ ಕೂಗು ಕೇಳುತ್ತಿದ್ದಂತೆ ಸೊಂಡಿಲೆತ್ತಿ ಪ್ರತಿಕ್ರಿಯಿಸುವ ಗಜರಾಜನ ಆ ನೋಟಕ್ಕೆ ಅಭಿಮಾನಿಗಳು ಫಿದಾ ಆಗಿದ್ದಾರೆ. ಮಸ್ತ್ ಕಡಿಮೆಯಾಗಿ ಭೀಮ ಈ ಬಾರಿಯೂ ದಸರಾ ಮಹೋತ್ಸವದಲ್ಲಿ ಭಾಗಿಯಾಗಲಿ ಎಂಬುದು ಅಭಿಮಾನಿಗಳ ಆಶಯ.

ಅಮ್ಮನನ್ನು ಕಳೆದುಕೊಂಡು ಕಾಡಿನಲ್ಲಿ ಅಲೆದಾಡಿದ್ದ!

ಭೀಮನ ಇಂದಿನ ಜನಪ್ರಿಯತೆಯ ಹಿಂದೆ ಕರುಣಾಜನಕ ಕಥೆಯೂ ಇದೆ. 2001ರಲ್ಲಿ ನಾಗರಹೊಳೆ ಅಭಯಾರಣ್ಯದ ಮತ್ತಿಗೋಡು ವಲಯದ ಭೀಮನಕಟ್ಟೆ ಬಳಿ ತಾಯಿಯನ್ನು ಕಳೆದುಕೊಂಡಿದ್ದ ಆರು ತಿಂಗಳ ಮರಿ ಆನೆ, ಅಮ್ಮನ ಅಗಲಿಕೆಯ ನೋವಿನಲ್ಲೇ ವಾರಗಟ್ಟಲೆ ಕಾಡಿನಲ್ಲಿ ಅಲೆದಾಡುತ್ತಿತ್ತು. ಒಂದು ದಿನ ಕಾಡಿಗೆ ಮೇಯಲು ತೆರಳಿದ್ದ ದನಗಳ ಜತೆ ಅದು ಭೀಮನಕಟ್ಟೆ ಸಮೀಪದ ಅಳ್ಳೂರು ಗ್ರಾಮ ಪ್ರವೇಶಿಸಿತು. ಮರಿ ಆನೆಯನ್ನು ಕಂಡ ಗ್ರಾಮಸ್ಥರು ಸಂಭ್ರಮಗೊಂಡು ಪೂಜೆ ಸಲ್ಲಿಸಿ, ಊರಿನಲ್ಲಿ ಮೆರವಣಿಗೆ ಮಾಡಿಸಿದರು. ಬಳಿಕ ಅರಣ್ಯ ಇಲಾಖೆ ಅಧಿಕಾರಿಗಳಿಗೆ ಮಾಹಿತಿ ನೀಡಿ, ಮರಿಯನ್ನು ಮತ್ತಿಗೋಡು ಅರಣ್ಯ ಇಲಾಖೆ ಕಚೇರಿಗೆ ಒಪ್ಪಿಸಿದರು.

ಮಗನಂತೆ ಸಾಕಿದ ಕುಳ್ಳರಾಮ

ಆನೆಗಳ ಲಾಲನೆ, ಪಾಲನೆ ಹಾಗೂ ಪಳಗಿಸುವಿಕೆಯಲ್ಲಿ ನೈಪುಣ್ಯ ಹೊಂದಿದ್ದ ಮಾವುತ ಕುಳ್ಳರಾಮ ಅವರ ಜವಾಬ್ದಾರಿಗೆ ಈ ಮರಿ ಆನೆಯನ್ನು ವಹಿಸಲಾಯಿತು. ಕುಳ್ಳರಾಮ ಅವರೇ ಮರಿಗೆ ಭೀಮ ಎಂದು ನಾಮಕರಣ ಮಾಡಿ, ಸ್ವಂತ ಮಗನಂತೆ ಸಾಕಿದರು.
ಅದೇ ಸಮಯದಲ್ಲಿ ಕಾಡಿನಲ್ಲಿ ಸುಮಾರು ಆರು ಮರಿ ಆನೆಗಳು ಪತ್ತೆಯಾಗಿದ್ದವು. ಆದರೆ ತಾಯಿಹಾಲು ಸಿಗದೆ ಅವುಗಳಲ್ಲಿ ಉಳಿದಿದ್ದು ಭೀಮ ಮಾತ್ರ. ಕುಳ್ಳರಾಮ ಹಾಗೂ ಅವರ ಪತ್ನಿ ಭೀಮನನ್ನು ಅತ್ಯಂತ ಕಾಳಜಿಯಿಂದ ಬೆಳೆಸಿದರು. ಕಾಲಕ್ರಮೇಣ ಕಾಡಿನ ಮರಿ ಆನೆಯಾಗಿದ್ದ ಭೀಮ, ದಸರಾ ಗಜಪಡೆಯ ಪ್ರಮುಖ ಆನೆಗಳ ಸಾಲಿಗೆ ಸೇರಿಕೊಂಡ. ಬಳಿಕ ರಾಧಾಕೃಷ್ಣ ಅವರು ಭೀಮನ ಆರೈಕೆ ಮಾಡುತ್ತಿದ್ದರು. ಕಳೆದ ನಾಲ್ಕು ವರ್ಷಗಳಿಂದ ಗುಂಡ ಅವರು ಭೀಮನ ಮಾವುತರಾಗಿ ಜವಾಬ್ದಾರಿ ನಿರ್ವಹಿಸುತ್ತಿದ್ದಾರೆ. ನಂಜುಂಡಸ್ವಾಮಿ ಕಾವಾಡಿಯಾಗಿದ್ದಾರೆ.
"

ಭೀಮ ಆನೆಗೆ ಈ ಬಾರಿ ಗಜಪಡೆಯಲ್ಲಿ ಅವಕಾಶ ನೀಡಲಾಗಿಲ್ಲ. ಭೀಮನಿಗೆ ಮಸ್ತ್ ಬಂದಿರುವ ಹಿನ್ನೆಲೆಯಲ್ಲಿ ಆತನನ್ನು ಸದ್ಯಕ್ಕೆ ಕಾಯ್ದಿರಿಸಲಾಗಿದೆ. ಮಸ್ತ್ ಕಡಿಮೆಯಾದ ಬಳಿಕ ದಸರಾ ಮಹೋತ್ಸವಕ್ಕೆ ಕರೆತರುವ ಸಾಧ್ಯತೆ ಇದೆ. ಭೀಮನಿಗೆ ಅಪಾರ ಅಭಿಮಾನಿಗಳಿದ್ದು, ಆತನನ್ನು ದಸರಾದಲ್ಲಿ ಕಾಣಲು ಜನರು ಉತ್ಸುಕರಾಗಿದ್ದಾರೆ.

— -ಡಾ.ಎಸ್.ಎಸ್.ರವಿಶಂಕರ್, ಅರಣ್ಯ ಸಂರಕ್ಷಣಾಧಿಕಾರಿ

dasara gajapade
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net