ಬಸವೇಶ್ವರ, ವೆಂಕಟೇಶ್ವರಸ್ವಾಮಿ ಉತ್ಸವ ವಿಜೃಂಭಣೆ

ದೇವರ ಉತ್ಸವ ಮೂರ್ತಿಗಳಿಗೆ ಹಳೇಎಡತೊರೆಯ ಕಾವೇರಿ ನದಿಯಲ್ಲಿ ಶನಿವಾರ ಸಂಜೆ ಗಂಗಾಪೂಜೆ ನೆರವೇರಿಸಿದ ನಂತರ ಅಲಂಕೃತ ತೆರೆದ ವಾಹನದಲ್ಲಿ ಕೆ.ಆರ್.ನಗರದ ವಿವಿ ರಸ್ತೆ ಮೂಲಕ ಮಾರಿಗುಡಿಕೊಪ್ಪಲು ಗ್ರಾಮಕ್ಕೆ ತರಲಾಯಿತು. ತಮಟೆ, ಮಂಗಳವಾದ್ಯ, ದೇವರಕುಣಿತ ಸೇರಿದಂತೆ ವಿವಿಧ ಜಾನಪದ ಕಲಾತಂಡಗಳೊಂದಿಗೆ ಉತ್ಸವ ಮೂರ್ತಿಗಳನ್ನು ಮೆರವಣಿಗೆ ಮಾಡಲಾಯಿತು.

ಕೆಂಪನಕೊಪ್ಪಲು, ಕಾಳೇನಹಳ್ಳಿಯಲ್ಲಿ ಸಾಗಿದ ಮೆರವಣಿಗೆ ನಂತರ ಕಾಳೇನಹಳ್ಳಿಯ ದೇವಾಲಯದ ಬಳಿ ಸಮಾವೇಶಗೊಂಡಿತು. ಹಬ್ಬದ ಹಿನ್ನೆಲೆಯಲ್ಲಿ ನಾಲ್ಕು ಗ್ರಾಮಗಳು ವಿದ್ಯುತ್ ದೀಪಾಲಂಕಾರ ಮತ್ತು ತಳಿರು ತೋರಣದಿಂದ ಶೃಂಗಾರಗೊಂಡಿದ್ದವು. ಮಹಿಳೆಯರು ಮತ್ತು ಹೆಣ್ಣು ಮಕ್ಕಳು ದೇವರ ಮೆರವಣಿಗೆ ಸಾಗುವ ರಸ್ತೆಗಳಲ್ಲಿ ಬಣ್ಣ ಬಣ್ಣದ ರಂಗೋಲಿ ಬಿಡಿಸಿದ್ದರು.

ಉತ್ತಮ ಮಳೆ-ಬೆಳೆಯಾಗಿ ಗ್ರಾಮಗಳು ಸುಭಿಕ್ಷತೆಯಿಂದಿರಬೇಕೆಂಬ ಉದ್ದೇಶದಿಂದ ಹಿಂದಿನಿಂದಲೂ ಜೂನ್‌ನಲ್ಲಿ ಈ ಹಬ್ಬವನ್ನು ಆಚರಿಸುತ್ತಿರುವುದು ವಾಡಿಕೆ. ಭಾನುವಾರ ಮಧ್ಯಾಹ್ನ 11ಕ್ಕೆ ದೇವರ ಗುಡ್ಡಪ್ಪ ನಾಗೇಗೌಡರು ಕಾರಣಿಕ ನುಡಿದಿದ್ದು ಈ ಭಾರಿ ಉತ್ತಮ ಮಳೆ-ಬೆಳೆಯಾಗಲಿದೆ ಎಂದು ಬಣ್ಣಿಸಲಾಗಿದೆ. ನಾಲ್ಕು ಗ್ರಾಮಗಳ ಮುಖಂಡರು, ಯುವಕರು ಹಾಜರಿದ್ದರು. ದೇವರಿಗೆ ಜಯಕಾರ ಕೂಗಿ ಸಂಭ್ರಮಿಸಿದರು.

ಅರ್ಚಕರಾದ ಕೆ.ಎಸ್.ಮಾದೇಶ್, ಕೆ.ಧನುಷ್, ವಸಂತಕುಮಾರ್, ಗ್ರಾಮ ಪಂಚಾಯಿತಿ ಮಾಜಿ ಸದಸ್ಯರಾದ ಕೆ.ಪಿ.ಜಗದೀಶ್, ಕೆ.ಎನ್.ರವಿ, ಯಜಮಾನರಾದ ಕೆ.ಮಹದೇವ್, ಸಿದ್ದೇಗೌಡ, ರಾಜೇಗೌಡ, ಚನ್ನಕೇಶವ, ಕೆ.ಜೆ.ಕುಮಾರ್, ರಾಮೇಗೌಡ, ದೇವರಾಜು, ಮುಖಂಡರಾದ ಕರೀಗೌಡ, ಕೆ.ಎಸ್.ದಿನೇಶ್, ಕೆ.ಎಸ್.ಮಂಜುನಾಥ್, ಪುಟ್ಟೇಗೌಡ, ದೇವೇಂದ್ರ ಹಾಜರಿದ್ದರು.