ಅರ್ಧಕ್ಕೆ ಸ್ಥಗಿತವಾದ ಕಾಮಗಾರಿ

ಸಿದ್ದಪ್ಪಾಜಿ ತಂಬೂರಿ ನಂಜನಗೂಡು

ನಗರದಲ್ಲಿ ಬಹು ಉದ್ದೇಶಿತ ಬಾಬು ಜಗಜೀವನರಾಮ್ ಸಮುದಾಯ ಭವನದ ಕಾಮಗಾರಿ 4 ವರ್ಷವಾದರೂ ಪೂರ್ಣಗೊಂಡಿಲ್ಲ. ಮೈಸೂರು- ಚಾಮರಾಜನಗರ ಮುಖ್ಯ ರಸ್ತೆಯಲ್ಲಿ ಭವನದ ಕಟ್ಟಡ ಕಾಮಗಾರಿ ಅರ್ಧಕ್ಕೆ ಸ್ಥಗಿತವಾಗಿದ್ದು, ಕುದುರೆ ಲಾಯವಾಗಿ, ಅನೈತಿಕ ಚಟುವಟಿಕೆಗಳ ತಾಣವಾಗಿ ಬಳಕೆಯಾಗುತ್ತಿರುವುದು ಬೇಸರ ಮೂಡಿಸಿದೆ.

2013ರಲ್ಲಿ ಅಂದಿನ ಕಂದಾಯ ಸಚಿವರಾಗಿದ್ದ ಶ್ರೀನಿವಾಸ ಪ್ರಸಾದ್ ಅವರು ಸರ್ವ ಸಮುದಾಯಗಳಿಗೂ ಒಂದೇ ಸೂರಿನಡಿ ಸಮುದಾಯ ಭವನಗಳನ್ನು ನಿರ್ಮಾಣ ಮಾಡಬೇಕು ಎಂಬ ಉದ್ದೇಶದಿಂದ ಜಾಗ ನಿಗದಿಗೊಳಿಸಿ ಅಡಿಗಲ್ಲಿ ಹಾಕಿದ್ದರು. ನಂತರದ ರಾಜಕೀಯ ಬೆಳವಣಿಗೆಯಲ್ಲಿ ಯೋಜನೆ ಸ್ಥಗಿತಗೊಂಡಿತು. 9 ವರ್ಷಗಳ ಅವಧಿಯಲ್ಲಿ ಭವನ ನಿರ್ಮಾಣಕ್ಕೆ ಯಾವುದೇ ಅನುದಾನ ಮಂಜೂರಾಗಲಿಲ್ಲ. ಸರ್ಕಾರ ಮತ್ತು ಜನ ಪ್ರತಿನಿಧಿಗಳಿಂದ ಆಸಕ್ತಿಯೂ ಮೂಡಲಿಲ್ಲ.

2022 ರಲ್ಲಿ ಅಂದಿನ ಶಾಸಕರಾಗಿದ್ದ ಹರ್ಷವರ್ಧನ್ ಅವರು ಇದೇ ಸ್ಥಳದಲ್ಲಿ ಭೂಮಿ ಪೂಜೆ ನೆರವೇರಿಸಿ ಬಾಬು ಜಗಜೀವನರಾಮ್ ಸಮುದಾಯ ಭವನ ನಿರ್ಮಾಣ ಕಾಮಗಾರಿಗೆ ಚಾಲನೆ ನೀಡಿದರು. ಮೊದಲನೇ ಹಂತದಲ್ಲಿ 1 ಕೋಟಿ ರೂ. ಬಿಡುಗಡೆಯೂ ಆಯಿತು. 1 ಕೋಟಿ ರೂ. ಬಳಕೆಯಾಗುವವರೆಗೆ ಕೆಲಸ ನಡೆಯಿತು. ನಂತರ ಯಾವುದೇ ಅನುದಾನ ಬಾರದ ಕಾರಣ ಕಾಮಗಾರಿ ಅರ್ಥಕ್ಕೆ ಸ್ಥಗಿತವಾಗಿದೆ.

*

ಕುದುರೆ ಕಟ್ಟುವ ತಾಣ

ಹೇಳುವವರು, ಕೇಳುವವರು ಯಾರೂ ಇಲ್ಲದ, ಅರ್ಧಕ್ಕೆ ನಿಂತಿರುವ ಸಮುದಾಯ ಭವನ ಈಗ ಕುದುರೆ ಕಟ್ಟುವ ಲಾಯವಾಗಿ ಮಾರ್ಪಾಡಾಗಿದೆ. ಶ್ರೀಕಂಠೇಶ್ವರ ದೇವಾಲಯದ ಮುಂಭಾಗದಲ್ಲಿ ಪ್ರವಾಸಿಗರಿಗೆ ಮತ್ತು ದರ್ಶನಕ್ಕಾಗಿ ಪರ ಊರಿನಿಂದ ಬಂದ ಯಾತ್ರಾರ್ಥಿಗಳಿಗೆ ಕುದುರೆ ಸವಾರಿ ಮಾಡಿಸುವವರು ಸಂಜೆಯ ವೇಳೆ ಭವನದ ಆವರಣದಲ್ಲೇ ಕುದುರೆಗಳನ್ನು ಕಟ್ಟಿ ಮನೆಗೆ ಹೋಗುತ್ತಾರೆ. ರಾತ್ರಿಯ ವೇಳೆ ಇದು ಮದ್ಯಪ್ರಿಯರ ಮತ್ತು ಅನೈತಿಕ ಚಟುವಟಿಕೆ ಮಾಡುವವರ ತಾಣವಾಗಿರುವುದು ಬೇಸರದ ಸಂಗತಿಯಾಗಿದೆ.

*

ವಿಳಂಬ ಏಕೆ ?

ಎರಡನೇ ಬಾರಿಗೆ ಭೂಮಿ ಪೂಜೆ ನಡೆದು 4 ವರ್ಷ ಕಳೆದಿದ್ದರೂ ಭವನದ ಕಾಮಗಾರಿ ಮಾತ್ರ ಮುಗಿಯುವ ಯಾವುದೇ ಸೂಚನೆ ಕಂಡುಬರುತ್ತಿಲ್ಲ. ಸಮಾಜ ಕಲ್ಯಾಣ ಇಲಾಖೆ ಉಸ್ತುವಾರಿಯಲ್ಲಿ ಲ್ಯಾಂಡ್ ಅರ್ಮಿಯವರು ನಿರ್ಮಿಸುತ್ತಿರುವ ಬಾಬು ಜಗಜೀವನ ರಾಂ ಸಮುದಾಯ ಭವನದ ಕಾಮಗಾರಿ ನಿಂತಲ್ಲೇ ನಿಂತಿದೆ. ಇದು ದಲಿತ ಸಂಘಟನೆಗಳ ಅಸಮಾಧಾನಕ್ಕೆ ಕಾರಣವಾಗಿದೆ. ತಳ ಸಮುದಾಯದ ಮಹನೀಯರೊಬ್ಬರ ಹೆಸರಿನಲ್ಲಿ ನಿರ್ಮಾಣವಾಗುತ್ತಿರುವ ಭವನದ ಬಗ್ಗೆ ಅಧಿಕಾರಿಗಳಿಗೆ ಕೇಳಿದರೆ ಗುತ್ತಿಗೆದಾರರ ಮೇಲೆ ಕೈ ತೋರಿಸುತ್ತಾರೆ. ಗುತ್ತಿಗೆದಾರರು ಇದಕ್ಕೆ ಪ್ರತಿಯಾಗಿ ಅಧಿಕಾರಿಗಳು ಮತ್ತು ಇಲಾಖೆಗಳ ಮೇಲೆ ಆರೋಪಿಸುತ್ತಾರೆ.

ಒಟ್ಟಾರೆ ನಿರ್ಲಕ್ಷೃಕ್ಕೆ ಒಳಗಾದ ಕಾರಣ ಕಾಮಗಾರಿಯು ನನೆಗುದಿಗೆ ಬಿದ್ದಿರುವುದು ಬೇಸರದ ಸಂಗತಿಯಾಗಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಸಮಾಜ ಕಲ್ಯಾಣ ಇಲಾಖೆ ಸಹಾಯಕ ನಿರ್ದೇಶಕ ಸಿದ್ದಲಿಂಗು, ತಾಂತ್ರಿಕ

ಸಮಸ್ಯೆಗಳಿಂದ ಕಾಮಗಾರಿ ವಿಳಂಬವಾಗಿತ್ತು. ಶಾಸಕರ ನಿಧಿಯಿಂದ ಈಗಾಗಲೇ ಅನುದಾನ ಬಿಡುಗಡೆಯಾಗಿದೆ. ಇನ್ನೆರಡು ದಿನಗಳಲ್ಲಿ ಎರಡನೇ ಹಂತದ ಕಾಮಗಾರಿ ಆರಂಭವಾಗಲಿದೆ ಎನ್ನುತ್ತಾರೆ.

*

ಉದ್ದೇಶಿತ ಪ್ರಯೋಜನಗಳು ಏನು?

ನಂಜನಗೂಡಿನಲ್ಲಿ ಬಾಬು ಜಗಜೀವನರಾಮ್ ಸಮುದಾಯ ಭವನ ಕಾಮಗಾರಿ ಪೂರ್ಣಗೊಂಡರೆ ಹಿಂದುಳಿದ ಸಮುದಾಯವರಿಗೆ ಹತ್ತು ಹಲವು ನಿಟ್ಟಿನಲ್ಲಿ ಪ್ರಯೋಜನವಾಗಲಿದೆ. ಪರಿಶಿಷ್ಟ ಪಂಗಡದ ಎಡಗೈ ಸಮುದಾಯದ ಜನಾಂಗದ ಮತ್ತು ಶೋಷಿತ ವರ್ಗಗಳ ಯುವಕರಿಗೆ ವಿಜ್ಞಾನ, ಕೌಶಲ ಅಭಿವೃದ್ಧಿ ತರಬೇತಿ ನೀಡುವ ಜ್ಞಾನ ಕೇಂದ್ರವಾಗಿ ಬಳಕೆಯಾಗಲಿದೆ. ಸಭಾಂಗಣವು ಸಾಂಸ್ಕೃತಿಕ ಚಟುವಟಿಕೆಗಳನ್ನು ಆಯೋಜಿಸಲು ವೇದಿಕೆಯಾಗಲಿದೆ. ಹಿಂದುಳಿದ ಸಮುದಾಯದವರ ಶುಭ ಸಮಾರಂಭಗಳಿಗೆ ಕಲ್ಯಾಣ ಮಂಟಪವಾಗಿ ಲಭ್ಯವಾಗಲಿದೆ. ದೂರದ ಊರುಗಳಿಂದ ಶ್ರೀ ಕ್ಷೇತ್ರ ಶ್ರೀಕಂಠೇಶ್ವರ ದೇವಾಲಯಕ್ಕೆ ಆಗಮಿಸುವ ಸಮುದಾಯದವರು ತಂಗಲು ಆಶ್ರಯತಾಣವಾಗಲಿದೆ. ಆದರೆ 4 ವರ್ಷಗಳಿಂದ ಅನುದಾನ ಕೊರೆತೆಯಿಂದ ಕಾಮಗಾರಿ ವಿಳಂಬವಾಗಿ ಸಾವಿರಾರು ವಿದ್ಯಾರ್ಥಿಗಳು ಮತ್ತು ಸಮುದಾಯದ ಜನರಿಗೆ ಸಿಗಬೇಕಾದ ಬಹುವಿಧ ಸೌಲಭ್ಯಗಳು ಅಲಭ್ಯವಾದಂತಾಗಿದೆ. ಈ ಬಗ್ಗೆ ಶಾಸಕರು, ಅಧಿಕಾರಿಗಳು ಸರ್ಕಾರದ ಮಟ್ಟದಲ್ಲಿ ಒತ್ತಡ ಹೇರಬೇಕು ಎಂದು ಮುಖಂಡರು ಆಗ್ರಹಿಸಿದ್ದಾರೆ.

**

ಕೋಟ್

ಮುಖ್ಯಮಂತ್ರಿಗಳ ಅಭಿವೃದ್ಧಿ ನಿಧಿಯಿಂದ ಕ್ಷೇತ್ರಕ್ಕೆ 50 ಕೋಟಿ ರೂ. ಅನುದಾನ ನೀಡಲಾಗಿದೆ. ಇದರಲ್ಲಿ

50 ಲಕ್ಷ ರೂ. ಗಳನ್ನು ಕಳೆದ ಎರಡು ತಿಂಗಳ ಹಿಂದೆಯೇ ಬಾಬು ಜಗಜೀವನ ರಾಂ ಭವನದ ಮುಂದುವರಿದ

ಕಾಮಗಾರಿಗಾಗಿ ನೀಡಲಾಗಿದೆ. ಭವನ ಸ್ಥಿತಿಗತಿ ವೀಕ್ಷಣೆ ಮಾಡಿದ್ದೇನೆ. ಎರಡನೇ ಹಂತದ ಕಾಮಗಾರಿ ಯನ್ನು ಕೂಡಲೇ ಆರಂಭಿಸುವಂತೆ ಅಧಿಕಾರಿಗಳಿಗೆ ನಿರ್ದೇಶನ ನೀಡಿದ್ದೇನೆ. ಈ ವರ್ಷದ ಅಂತ್ಯದೊಳಗೆ ಕಾಮಗಾರಿ ಪೂರ್ಣಗೊಳ್ಳುವ ಸಾಧ್ಯತೆಗಳಿವೆ.

ದರ್ಶನ್ ಧ್ರುವನಾರಾಯಣ್

ನಂಜನಗೂಡು ಶಾಸಕ

ದಿ. ಶ್ರೀನಿವಾಸ ಪ್ರಸಾದ್ ಅವರ ಕನಸಿನ ಕೂಸಾದ ‘ಸಮುದಾಯ ಭವನಗಳ ಸಮ್ಚುಯ’ ಶೀರ್ಷಿಕೆ ಅಡಿಯಲ್ಲಿ ಚಾಲನೆಗೊಂಡ ಕಾಮಗಾರಿ ವಿಳಂಬವಾಗಿದೆ. ತಾಲೂಕಿನಲ್ಲಿರುವ ಹಿಂದುಳಿದ ವಿವಿಧ ಸಮುದಾಯಗಳ ಜನರಿಗೆ ಅನುಕೂಲವಾಗಬೇಕು ಎಂದು ಅವರು ಕಂದಾಯ ಸಚಿವರಾಗಿದ್ದಾಗಲೇ ಸ್ಥಳ ಪರಿಶೀಲನೆ ನಡೆಸಿ, ಮೊದಲ ಹಂತದ ಅನುದಾನವನ್ನೂ ಬಿಡುಗಡೆ ಮಾಡಿಸಿದ್ದರು. ದೇವಾಲಯಕ್ಕೆ ಬರುವ ಭಕ್ತರಿಗೂ ಇದು ವಿಶ್ರಾಂತಿ ತಾಣವಾಗಲಿ ಎಂಬುದು ಅವರ ಅಪೇಕ್ಷೆಯಾಗಿತ್ತು. ಸಂಬಂಧಪಟ್ಟವರು ತುರ್ತು ಗಮನ ಹರಿಸಿ ಕಾಮಗಾರಿ ಪೂರ್ಣಮಾಡಲಿ.

ಹರ್ಷವರ್ಧನ್

ಮಾಜಿ ಶಾಸಕ