‘ರಂಗರಸ’ ಸವಿದ ರಂಗಾಸಕ್ತರು

ರಂಗಾಸಕ್ತರು, ಹಿರಿಯರು, ಯುವ ಮನಸ್ಸುಗಳು ತಮ್ಮ ಸ್ನೇಹಿತರು ಮತ್ತು ಹಿತೈಷಿಗಳ ಜತೆಗೂಡಿ ರಂಗಾಯಣ ಅಂಗಳದಲ್ಲಿ ಜಮಾಯಿಸಿ ‘ರಂಗರಸ’ ಸವಿದರು.

ತಂಡೋಪತಂಡವಾಗಿ ಹೆಚ್ಚು ಜನರು ಭಾಗಿಯಾದ ಕಾರಣ ನಾಟಕ, ಜನಪದ ಕಾರ್ಯಕ್ರಮಗಳಿಗೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಯಿತು. ಬಹುರೂಪಿ ನಾಟಕೋತ್ಸವಕ್ಕೆ ಬುಧವಾರ ಜನಪದ ಉತ್ಸವ ಹೊಸ ರಂಗು ತಂದಿತು. ಕಿಂದರಿಜೋಗಿ ಆವರಣದಲ್ಲಿ ಪ್ರದರ್ಶನಗೊಂಡ ‘ಕಳರಿಪಯಟ್ಟು’ ಮೋಡಿ ಮಾಡಿತು. ಕತ್ತಿ ಹಿಡಿದು ಎದುರಾಳಿಯನ್ನು ಮಣಿಸುವ, ಚೂಪಾದ ಭರ್ಜಿ ಹಾಗೂ ಕತ್ತಿ ಹಿಡಿದು ವಿವಿಧ ಭಂಗಿ ಪ್ರದರ್ಶಿಸುವ, ಬೆಂಕಿಯಲ್ಲಿ ಹಾರುವ ಹಾಗೂ ಬೆಂಕಿ ಹಿಡಿದು ಸಾಹಸ ಪ್ರದರ್ಶನ, ಏಳು ಜನರ ಮೇಲೆ ಒಮ್ಮೆಲೆ ನೆಗೆಯುವ ಮೂಲಕ ‘ಕಳರಿಪಯಟ್ಟು’ ಸಮರ ಕಲೆಯನ್ನು ಡಾ.ವೇಣುಗೋಪಾಲ್ ಮಾರ್ಗದರ್ಶನದಲ್ಲಿ ಅನಾವರಣಗೊಳಿಸಿದ ಕೇರಳದ ಕಲಾವಿದರು ನೋಡುಗರನ್ನು ಅರೆಕ್ಷಣ ದಂಗುಬಡಿಸಿದರು. ಇದಕ್ಕೂ ಮುನ್ನ ನಡೆದ ಚಾಮರಾಜನಗರದ ಬಸವರಾಜು ಮತ್ತು ತಂಡದ ‘ಗೋರುಕನ ನೃತ್ಯ’ ಪ್ರದರ್ಶನ ಪ್ರೇಕ್ಷಕರನ್ನು ರಂಜಿಸಿತು.

ವನರಂಗದಲ್ಲಿ ಇಂಗ್ಲೀಷ್ ಮತ್ತು ಹಿಂದಿಯ ‘ಸೇಮ್ ಸೇಮ್ ಬಟ್ ಡಿಫರೆಂಟ್’ ನಾಟಕವನ್ನು ಮುಂಬೈನ ತಮಾಷಾ ಥಿಯೇಟರ್ ತಂಡ ಪ್ರಸ್ತುತಪಡಿಸಿತು. ಕಿರುರಂಗ ಮಂದಿರದಲ್ಲಿ ಕನ್ನಡ ಭಾಷೆಯ ‘ಬೆಲ್ಲದ ದೋಣಿ’ ನಾಟಕವನ್ನು ಚಾಮರಾಜನಗರದ ರಂಗವಾಹಿನಿ ತಂಡ ಪ್ರಸ್ತುತಪಡಿಸಿತು. ಕಲಾಮಂದಿರದಲ್ಲಿ ಕನ್ನಡ ಭಾಷೆಯ ‘ಸೂರ್ಯ ಚಂದ್ರ’ ನಾಟಕವನ್ನು ತೆಕ್ಕಟ್ಟೆ ಧಮನ ತಂಡ ಹಾಗೂ ಭೂಮಿಗೀತದಲ್ಲಿ ಮಣಿಪುರಿ ಭಾಷೆಯ ‘ಪಿ ಥದೊಯ್’ ನಾಟಕವನ್ನು ಮಣಿಪುರ್‌ನ ಕಲಾಕ್ಷೇತ್ರ ತಂಡ ಪ್ರಸ್ತುತಪಡಿಸಿತು.

ಬಹುರೂಪಿಯಲ್ಲಿ ಈ ಬಾರಿಯೂ ಚಲನಚಿತ್ರ ಪ್ರದರ್ಶನ ಜನಾಕರ್ಷಿಸುತ್ತಿದ್ದು, ರಂಗಾಯಣ ಆವರಣದ ಶ್ರೀರಂಗ ರಂಗಮಂದಿರದಲ್ಲಿ ಆಯೋಜಿಸಿದ್ದ ಚಲನಚಿತ್ರ ಪ್ರದರ್ಶನವನ್ನು ಹಲವು ಜನರು ವೀಕ್ಷಿಸಿದರು. ಹಿಂದಿ ಭಾಷೆಯ ‘ಆಭಿನವ್ ಪಾಂಡೇ’, ‘ಜೈ ಭೀಮ್ ಕಾಮ್ರೇಡ್-2’, ಕನ್ನಡ ಭಾಷೆಯ ‘ಕಾಳ್ಚೌಡಿ’ ಸಿನಿಮಾ ಪ್ರದರ್ಶನಗೊಂಡವು.

ಉಳಿದಂತೆ ಕರಕುಶಲ ವಸ್ತುಗಳು, ಪುಸ್ತಕ ಹಾಗೂ ಆಹಾರ ಮಳಿಗೆಗಳ ಮುಂದೆ ಜನಸಮೂಹ ಕಂಡುಬಂತು. ನಾಟಕ ನೋಡಿದ ಕಲಾರಸಿಕರು ಪುಸ್ತಕ ಮಳಿಗೆಗಳಿಗೆ ಭೇಟಿ ನೀಡಿ ನೆಚ್ಚಿನ ಪುಸ್ತಕಗಳನ್ನು ಖರೀದಿಸಿದರು. ಜತೆಗೆ ಆಹಾರ ಮೇಳದಲ್ಲಿ ಬಗೆ-ಬಗೆಯ ರುಚಿ ಸವಿದರು.