ದಸರಾ ವಸ್ತುಪ್ರದರ್ಶನದಲ್ಲಿ ಸೇನೆ, ಇಸ್ರೋ ಶಕ್ತಿ ಅನಾವರಣ...!

ದಸರಾ ವಸ್ತುಪ್ರದರ್ಶನ

Published on:

19 Sep 2026, 10:02 am

ಪ್ರಮುಖ ಮುಖ್ಯಾಂಶಗಳು

ವಸ್ತುಪ್ರದರ್ಶನದಲ್ಲಿ ಸೌರವ್ಯೆಹ ಕೌತುಕ ವೀಕ್ಷಣೆಗೆ ಲಭ್ಯ
12.53 ಕೋಟಿ ರೂ. ಟೆಂಡರ್ ನಿಗದಿ
ಉಪಗ್ರಹಗಳು, ರಾಕೆಟ್ ಇನ್ನಿತರ ಉಪಕರಣಗಳ ಪ್ರದರ್ಶನ

ಮಂಜುನಾಥ ತಿಮ್ಮಯ್ಯ ಭೋವಿ ಮೈಸೂರು

ಲಕ್ಷಾಂತರ ಜನರನ್ನು ಸೂಜಿಗಲ್ಲಿನಂತೆ ಸೆಳೆಯುವ ದಸರಾ ವಸ್ತುಪ್ರದರ್ಶನಕ್ಕೆ ಹೊಸ ರೂಪ ನೀಡುವ ಪ್ರಯತ್ನ ನಡೆದಿದ್ದು, ಇದೇ ಮೊದಲ ಬಾರಿಗೆ ಭಾರತೀಯ ಸೇನಾ ತುಕಡಿಗಳ ಪರಾಕ್ರಮ, ಇಸ್ರೋ ಸಾಧನೆಯ ಪ್ರತಿಬಿಂಬವನ್ನು ಸಾರ್ವಜನಿಕರು, ಪ್ರವಾಸಿಗರು ಕಣ್ತುಂಬಿಕೊಳ್ಳಬಹುದಾಗಿದೆ.

ವಿಶ್ವವಿಖ್ಯಾತ ನಾಡಹಬ್ಬ ಮೈಸೂರು ದಸರಾ ಮಹೋತ್ಸವ ಅಕ್ಟೋಬರ್ 11ರಿಂದ 21ರವರೆಗೆ ನೆರವೇರಲಿದ್ದು, ಇದು ಮುಗಿದ ಬಳಿಕವೂ ಮೂರು ತಿಂಗಳ ಕಾಲ ನಡೆಯುವ ದಸರಾ ವಸ್ತುಪ್ರದರ್ಶನಕ್ಕೂ ಅಗತ್ಯ ಸಿದ್ಧತೆ ಮಾಡಿಕೊಳ್ಳಲಾಗುತ್ತಿದೆ. ಮೈಸೂರು ಅರಮನೆ ಎದುರಿನ ದೊಡ್ಡಕೆರೆ ಮೈದಾನದಲ್ಲಿರುವ ಕರ್ನಾಟಕ ವಸ್ತುಪ್ರದರ್ಶನ ಪ್ರಾಧಿಕಾರದ ಆವರಣದಲ್ಲಿ ಪ್ರತಿ ವರ್ಷದಂತೆ ಈ ಬಾರಿಯೂ ದಸರಾ ಉದ್ಘಾಟನೆ ದಿನವೇ ಸಾರ್ವಜನಿಕರ ವೀಕ್ಷಣೆಗೆ ತೆರೆದುಕೊಳ್ಳಲಿದೆ.

ಭಾರತೀಯ ಸೇನೆ ದಸರಾ ವಸ್ತುಪ್ರದರ್ಶನದಲ್ಲಿ ಭಾಗಿಯಾಗಲಿದ್ದು, ಭೂಸೇನೆ, ವಾಯುಸೇನೆ, ನೌಕಸೇನೆಯಲ್ಲಿ ಬಳಸುವ ಶಸ್ತ್ರಾಸ್ತ್ರಗಳನ್ನು ಹತ್ತಿರದಿಂದ ನೋಡಬಹುದಾಗಿದೆ. ಮೂರು ತುಕಡಿಗಳ ಸಾಧನೆ, ಶೌರ್ಯವನ್ನು ಬಿಂಬಿಸುವ ಪ್ರಸ್ತುತಿಯೂ ಇರಲಿದೆ. ಕೆಲ ಆಯುಧ ಬಳಕೆ, ಅವುಗಳು ಹೇಗೆ ಕೆಲಸ ಮಾಡುತ್ತವೆ ಎಂಬುದರ ಪ್ರಾತ್ಯಕ್ಷಿಕೆ ಸಹ ಇರಲಿದೆ.

ದೇಶ ರಕ್ಷಣೆ ಕಾರ್ಯವೈಖರಿ ಕುರಿತು ಸಂಕ್ಷಿಪ್ತವಾಗಿ ತಿಳಿಸಿಕೊಡಲಾಗುತ್ತದೆ. ಸೇನೆಯ ಕುರಿತು ಮಕ್ಕಳಲ್ಲಿ ಅರಿವು ಮೂಡಿಸುವುದು, ಯುವಕರು ಸೇನೆ ಸೇರುವಂತೆ ಪ್ರೇರಣೆ ನೀಡಲಾಗುವುದು ಎಂದು ಕರ್ನಾಟಕ ವಸ್ತುಪ್ರದರ್ಶನ ಪ್ರಾಧಿಕಾರದ ಅಧ್ಯಕ್ಷ ಅಯೂಬ್ ಖಾನ್ ‘ವಿಜಯವಾಣಿ’ಗೆ ತಿಳಿಸಿದರು.

ದೇಶದ ಹೆಮ್ಮೆಯ ಸಂಸ್ಥೆಯಾಗಿರುವ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ(ಇಸ್ರೋ) ಸಹ ಪಾಲ್ಗೊಳ್ಳಲಿದೆ. ಬಾಹ್ಯಾಕಾಶ ಕ್ಷೇತ್ರದಲ್ಲಿ ಹಲವು ಐತಿಹಾಸಿಕ ಮೈಲಿಗಲ್ಲುಗಳನ್ನು ಸಾಧಿಸುವ ಮೂಲಕ ಜಾಗತಿಕ ಮಟ್ಟದಲ್ಲಿ ದೇಶದ ಕೀರ್ತಿ ಹೆಚ್ಚಿಸಿರುವ ಇದು, ತನ್ನ ಸಾಧನೆಯನ್ನು ತೆರೆದಿಡಲಿದೆ. ಉಪಗ್ರಹಗಳು, ರಾಕೆಟ್ ಇನ್ನಿತರ ಉಪಕರಣಗಳನ್ನು ವೀಕ್ಷಿಸಬಹುದಾಗಿದೆ.

ಕೌತುಕದ ತಾಣವಾಗಿರುವ ಬ್ರಹ್ಮಾಂಡ ಲೋಕವೂ ಅನಾವರಣಗೊಳಲಿದೆ. ಎಲ್ಲ ಗ್ರಹಗಳ ಚಲನೆಯ ಮಾದರಿ ವೀಕ್ಷಣೆಗೆ ದೊರೆಯಲಿದೆ. ಇದರೊಂದಿಗೆ ಮಿನುಗುವ ನಕ್ಷತ್ರಗಳು, ಗ್ಯಾಲಕ್ಸಿಗಳ ಬಿಂಬಿವೂ ಕಣ್ಣು ಕುಕ್ಕಲಿದೆ. ಬ್ರಹ್ಮಾಂಡ ಲೋಕ ಪರಿಕಲ್ಪನೆ ಸೃಷ್ಟಿ ಮಾಡಲು ಹೈದರಾಬಾದ್ ಮೂಲದ ಕಂಪನಿಯೊಂದು ಮುಂದೆ ಬಂದಿದೆ.

ಹೂವಿನ ಲೋಕ(ಡೇನ್ ಲ್ಯಾಂಡ್) ಸೃಷ್ಟಿಸಲಾಗುತ್ತದೆ. ವಿವಿಧ ಬಗೆಯ ಹೂಗಳಿಂದ ಅಲಂಕಾರ ಮಾಡಲಾಗುತ್ತದೆ. ಫೋಟೋ ತೆಗೆದುಕೊಳ್ಳಲು ಸೆಲ್ಫಿ ಪಾಯಿಂಟ್ ಸಹ ಇರಲಿದೆ. ಮುಖ್ಯದ್ವಾರ ಮುಂಭಾಗ ಹಾಗೂ ಪ್ರಾಧಿಕಾರದ ಪ್ರಮುಖ ರಸ್ತೆಗಳು, ಅಲ್ಲಿರುವ ವೃತ್ತಗಳು ವಿದ್ಯುತ್ ದೀಪಾಲಂಕಾರದಿಂದ ಕಂಗೊಳಿಸಲಿವೆ.

12.53 ಕೋಟಿ ರೂ.ಟೆಂಡರ್

ಈ ಸಲ ದಸರಾ ವಸ್ತುಪ್ರದರ್ಶನ ನಿರ್ವಹಣೆಯ ಟೆಂಡರನ್ನು 12.53 ಕೋಟಿ ರೂ.ಗೆ ನಿಗದಿಪಡಿಸಲಾಗಿದೆ. ಕಳೆದ ಬಾರಿಗಿಂತ 1 ಕೋಟಿ ರೂ.ಹೆಚ್ಚಿದೆ. ಸೆ.17ರಂದು ಟೆಂಡರ್ ಅಂತಿಮವಾಗಲಿದೆ.

ಟೆಂಡರ್‌ನಿಂದ ದೊರೆಯುವ ಆದಾಯವೇ ಪ್ರಾಧಿಕಾರದ ಆದಾಯ ಮೂಲವಾಗಿದೆ. 2025, 2024ರಲ್ಲಿ ಕ್ರಮವಾಗಿ 11.54 ಕೋಟಿ ರೂ. ಮತ್ತು 10.03 ಕೋಟಿ ರೂ.ಗೆ ಬೆಂಗಳೂರಿನ ಫನ್‌ವರ್ಲ್ಡ್ ಸಂಸ್ಥೆ ಟೆಂಡರ್ ಪಡೆದುಕೊಂಡಿತ್ತು. ವಸ್ತುಪ್ರದರ್ಶನದ ಪ್ರವೇಶ ಶುಲ್ಕ, ವಾಹನ ನಿಲುಗಡೆ ಶುಲ್ಕ ಸಂಗ್ರಹದೊದಿಗೆ ದಸರಾ ವಸ್ತುಪ್ರದರ್ಶನದ ಆವರಣದಲ್ಲಿರುವ ಎ ಬ್ಲಾಕ್ ವಾಣಿಜ್ಯ ಮಳಿಗೆ, ಅಮ್ಯೂಸ್‌ಮೆಂಟ್ ಪಾರ್ಕ್, ಆಹಾರ ಮಳಿಗೆಗಳ ಜವಾಬ್ದಾರಿ ಟೆಂಡರ್‌ದಾರರಿಗೆ ವಹಿಸಲಾಗುತ್ತದೆ. ಇದಕ್ಕೆ ಪ್ರತಿಯಾಗಿ ವಸ್ತುಪ್ರದರ್ಶನದ ಒಳಗಿನ ಮಳಿಗೆಗಳ ಬಾಡಿಗೆ ಟೆಂಡರ್ ಪಡೆದ ಸಂಸ್ಥೆ ಪಡೆದುಕೊಳ್ಳಲಿದೆ.

ಕರ್ನಾಟಕ ವಸ್ತುಪ್ರದರ್ಶನ ಪ್ರಾಧಿಕಾರದಿಂದ ಜಿಲ್ಲಾ ಪಂಚಾಯಿತಿ, ಇಲಾಖೆಗಳಿಂದ ಸರ್ಕಾರಿ ಮಳಿಗೆಗಳು, ಸಾಂಸ್ಕೃತಿಕ ಕಾರ್ಯಕ್ರಮ ಮಾಡಲಾಗುತ್ತದೆ. ಈ ಸಲ ವಿವಿಧ ಇಲಾಖೆಗಳ ಅಂದಾಜು 30 ಮಳಿಗೆಗಳು ವಿವಿಧ ವಿಷಯಗಳ ಮಾದರಿ ವೀಕ್ಷಣೆಗೆ ಲಭ್ಯ ಇರಲಿವೆ. ವಾಣಿಜ್ಯ ಮಳಿಗೆಗಳ ಸಂಖ್ಯೆ 150 ದಾಟಲಿದೆ.

ದಸರಾ ವಸ್ತುಪ್ರದರ್ಶನ ಅಂದಾಜು 12 ಲಕ್ಷ ಜನರನ್ನು ಪ್ರತಿ ವರ್ಷ ಆಕರ್ಷಿಸಲಿದೆ. ಹೀಗಾಗಿ, ಇದು ಮೈಸೂರಿನ ಪ್ರವಾಸೋದ್ಯಮಕ್ಕೆ ಜೀವಸೆಲೆ. ಇದು ಪ್ರವಾಸೋದ್ಯಮಕ್ಕೆ ದೊಡ್ಡ ಆದಾಯದ ಹರಿವಿಗೂ ಕಾರಣವಾಗಿದೆ. ಈ ವಸ್ತುಪ್ರದರ್ಶನವನ್ನು ವರ್ಷವಿಡೀ ನಡೆಸಬೇಕು ಎಂಬುದು ಪ್ರವಾಸೋದ್ಯಮ ಕ್ಷೇತ್ರದ ಆಗ್ರಹವಾಗಿದೆ. ಆದರೆ, ಇದು ಈವರೆಗೂ ಸಾಕಾರಗೊಂಡಿಲ್ಲ.

ದಸರಾ ವಸ್ತುಪ್ರದರ್ಶನಕ್ಕಾಗಿ ಈಗಾಗಲೇ ಸಿದ್ಧತೆ ಮಾಡಿಕೊಳ್ಳಲಾಗಿದೆ. ಎಲ್ಲ ಇಲಾಖೆಗಳು, ಜಿಲ್ಲಾ ಪಂಚಾಯಿತಿಗಳಿಗೆ ಪತ್ರ ವ್ಯವಹಾರದ ಮೂಲಕ ಮಳಿಗೆ ತೆರೆಯಲು ಕೋರಲಾಗಿದೆ. ಸಿವಿಲ್ ಕೆಲಸ ಭರದಿಂದ ಸಾಗಿದೆ. ಈ ಸಲ ವಿನೂನತವಾಗಿ ದಸರಾ ವಸ್ತುಪ್ರದರ್ಶನವನ್ನು ಕಟ್ಟಿಕೊಡುವ ಪ್ರಯತ್ನ ಮಾಡಲಾಗುವುದು. ದಸರಾ ವಸ್ತುಪ್ರದರ್ಶನದಿಂದ 12.53 ಕೋಟಿ ರೂ. ಆದಾಯ ಬರುವ ನಿರೀಕ್ಷೆ ಇದೆ. ಕಳೆದ ಎರಡು ವರ್ಷದಲ್ಲಿ 4 ಕೋಟಿ ರೂ. ಆದಾಯ ಹೆಚ್ಚಿಸಲಾಗಿದೆ.

ಉದ್ಘಾಟನೆಗೂ ಮುನ್ನ ಭರ್ತಿಯಾಗುವುದೇ?

ದಸರಾ ವಸ್ತುಪ್ರದರ್ಶನ ನಿರ್ವಹಣೆ ಜವಾಬ್ದಾರಿ ವಹಿಸಲು ಜಾಗತಿಕ ಟೆಂಡರ್ ಕರೆಯಲಾಗಿದ್ದು, ಅರ್ಜಿ ಸಲ್ಲಿಸಲು ಸೆ.16ರಂದು ಕೊನೆಯ ದಿನವಾಗಿದೆ. ಆದಾಯಕ್ಕೆ ಅನುಗುಣವಾಗಿ ವಿಶಿಷ್ಟ, ವಿನೂತನ ಕಾರ್ಯಕ್ರಮ ರೂಪಿಸಿ ಪ್ರವಾಸಿಗರನ್ನು ಆಕರ್ಷಿಸಲಾಗುವುದು.

ಮೈಸೂರು