ನಕಲಿ ಉತ್ಪನ್ನ ಮಾರಾಟದ ವಿರುದ್ಧ ದೂರು

ಆ್ಯಪಲ್ ಕಂಪನಿಯು ಐ ಫೋನ್, ಐಪ್ಯಾಡ್ ಸೇರಿದಂತೆ ಹಲವು ಉತ್ಪನ್ನಗಳನ್ನು ಉತ್ಪಾದಿಸುತ್ತಿದ್ದು, ಕಂಪನಿಯು ಗುಣಮಟ್ಟಕ್ಕೆ ಹೆಚ್ಚಿನ ಆದ್ಯತೆ ನೀಡುತ್ತಿದೆ. ಆದರೆ, ಕೆ.ಟಿ. ಸ್ಟ್ರೀಟ್‌ನಲ್ಲಿರುವ ನರೇಶ್ ಟೆಲ್ಕಾಂ, ಶ್ರೀ ಕೃಷ್ಣ ಟೆಲ್ಕಾಂ, ರಾಜ್ ಟೆಲ್ಕಾಂ, ಮಹೇಶ್ ಟೆಲ್ಕಾಂ, ಮದನ್ ಟೆಲ್ಕಾಂ, ನೇಮಿನಾಥ್ ಟೆಲ್ಕಾಂ, ಲಲಿತ್ ಟೆಲ್ಕಾಂ, ಕೃಷ್ಣ ಟೆಲ್ಕಾಂ, ಹನುಮಾನ್ ಟೆಲ್ಕಾಂನವರು ಕಂಪನಿಯ ನಕಲಿ ಹಾಗೂ ಮೋಸದ ಉತ್ಪನ್ನಗಳನ್ನು ಅನಧಿಕೃತ ಮತ್ತು ಕಾನೂನು ಬಾಹಿರವಾಗಿ ಮಾರಾಟ ಮಾಡುತ್ತಿದ್ದಾರೆ.

ಕಂಪನಿಯ ಉತ್ಪನ್ನಗಳ ಪ್ಯಾಕೇಜಿಂಗ್‌ನ ಕಲಾತ್ಮಕ ವಿನ್ಯಾಸವನ್ನು ಬಹುಮಟ್ಟಿಗೆ ನಕಲು ಮಾಡಲಾಗಿದ್ದು, ಇದರಿಂದ ಕಂಪನಿಯ ಬೌದ್ಧಿಕ ಸ್ವತ್ತಿನ ಹಕ್ಕುಗಳಿಗೆ ಧಕ್ಕೆ ಉಂಟಾಗಿದೆ. ಸೋಮವಾರ ಪರಿಶೀಲನೆ ವೇಳೆಯಲ್ಲಿ ಈ ಅಂಶ ಕಂಡು ಬಂದಿದೆ. ಕಂಪನಿಯ ನಕಲಿ ಉತ್ಪನ್ನಗಳ ಅನಧಿಕೃತ ಮಾರಾಟ ಮತ್ತು ವಿತರಣೆಯಲ್ಲಿ ಸಕ್ರಿಯವಾಗಿ ತೊಡಗಿರುವವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಕಂಪನಿಯ ಪ್ರತಿನಿಧಿ ಮೊಹಮ್ಮದ್ ತೌಕೀರ್ ಮಂಗಳವಾರ ನೀಡಿರುವ ದೂರಿನಲ್ಲಿ ತಿಳಿಸಿದ್ದಾರೆ.