ಬಾಡಿಗೆ ಕಟ್ಟಡದಲ್ಲಿ ಸೊರಗಿದ ಅಂಗನವಾಡಿಗಳು

ಅಂಗನವಾಡಿ ಕಟ್ಟಡ

Published on:

01 Sep 2026, 11:44 am

ಪ್ರಮುಖ ಮುಖ್ಯಾಂಶಗಳು

731 ಕೇಂದ್ರಗಳಿಗೆ ಸ್ವಂತ ಸೂರಿಲ್ಲ
ಉತ್ತಮ ಕಲಿಕಾ ವಾತಾವರಣ ಕಲ್ಪಿಸಲು ಹಿನ್ನಡೆ

ಮಂಜುನಾಥ ತಿಮ್ಮಯ್ಯ ಭೋವಿ ಮೈಸೂರು

ಮಗುವಿನ ಆರೋಗ್ಯಕರ ಬಾಲ್ಯಕ್ಕೆ ಭದ್ರ ಅಡಿಪಾಯ ಮತ್ತು ಉತ್ತಮ ಭವಿಷ್ಯಕ್ಕೆ ಮೊದಲ ಹೆಜ್ಜೆಯಾಗಿರುವ ಅಂಗನವಾಡಿ ಕೇಂದ್ರಗಳು ಬಾಡಿಗೆ ಕಟ್ಟಡದಲ್ಲಿ ನರಳುತ್ತಿವೆ. ಇದು ಚಿಣ್ಣರಿಗೆ ಸುರಕ್ಷಿತ, ಸ್ವಚ್ಛ, ಆಟಕ್ಕೆ ಅನುಕೂಲಕರವಾದ ಪರಿಸರ ಕಲ್ಪಿಸಿಕೊಡಲು ಹಿನ್ನೆಡೆಯಾಗುತ್ತಿದೆ.

ಜಿಲ್ಲೆಯಲ್ಲಿ ಈಗಲೂ ಬಹಳಷ್ಟು ಅಂಗನವಾಡಿ ಕೇಂದ್ರ ಬಾಡಿಕೆ ಕಟ್ಟಡಗಳಲ್ಲೇ ಕಾರ್ಯನಿರ್ವಹಿಸುತ್ತಿವೆ. ಇದು ಮಕ್ಕಳಿಗೆ ಪೌಷ್ಟಿಕ ಆಹಾರ, ಪೂರ್ವ ಪ್ರಾಥಮಿಕ ಶಿಕ್ಷಣವನ್ನು ಪರಿಣಾಮಕಾರಿ ನೀಡಲು ತೊಡಕಾಗಿದೆ.

ಸ್ವಂತ ಸೂರಿಲ್ಲದ ಅಂಗನವಾಡಿಗಳು ಶಾಲೆ, ಸಮುದಾಯ ಭವನ, ಗ್ರಾಮ ಪಂಚಾಯಿತಿ ಕಟ್ಟಡಗಳು, ದೇವಸ್ಥಾನದ ಆವರಣಗಳಲ್ಲಿ ನಡೆಯುತ್ತಿವೆ. ಇಂತಹ ಕಡೆಗಳಲ್ಲಿ ಚಿಣ್ಣರು ಕುಣಿದು ಕುಪ್ಪಳಿಸಲು ಜಾಗ, ಸಮರ್ಪಕ ಗಾಳಿ, ನೀರು, ಬೆಳಕು, ಶೌಚಗೃಹ ವ್ಯವಸ್ಥೆಯೂ ಇಲ್ಲ. ಇದರಿಂದ ಅಂಗನವಾಡಿ ಮಕ್ಕಳು ಬಾಡಿದಂತಾಗಿವೆ.

ವಿವಿಧ ಕಟ್ಟಡಗಳೇ ಗತಿ:

ಜಿಲ್ಲೆಯಲ್ಲಿ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ವ್ಯಾಪ್ತಿಯಲ್ಲಿ 2,935 ಅಂಗನವಾಡಿ ಕೇಂದ್ರಗಳಿವೆ. ಇಲ್ಲಿ ಸಾವಿರಾರು ಮಕ್ಕಳು ಬಾಲ್ಯ ಕಳೆಯುತ್ತಿದ್ದಾರೆ.

ಇದರಲ್ಲಿ 2,204 ಅಂಗನವಾಡಿಗಳಿಗೆ ಮಾತ್ರ ಸ್ವಂತ ಕಟ್ಟಡಗಳಿವೆ. 264 ಅಂಗನವಾಡಿ ಕೇಂದ್ರಗಳಿಗೆ ಸ್ವಂತ ಕಟ್ಟಡಗಳೇ ಇಲ್ಲ. ಉಳಿದಂತೆ ಸರ್ಕಾರಿ ಶಾಲಾ ಕಟ್ಟಡಗಳಲ್ಲಿ 181, ಪಂಚಾಯಿತಿ ಕಟ್ಟಡಗಳಲ್ಲಿ 89, ಸಮುದಾಯ ಭವನದಲ್ಲಿ 77 ಮತ್ತು ಇನ್ನಿತರ ಕಟ್ಟಡಗಳಲ್ಲಿ 120 ಅಂಗನವಾಡಿಗಳು ನಡೆಯುತ್ತಿವೆ.

ಇಕ್ಕಟ್ಟಿನ ಜಾಗದಲ್ಲೇ ಎಲ್ಲ:

ಬಾಡಿಗೆ ಕಟ್ಟಡ ಇಲ್ಲವೇ ಇತರ ಲಭ್ಯ ಜಾಗದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಅಂಗನವಾಡಿ ಕೇಂದ್ರಗಳ ಸ್ಥಿತಿ ಅಯೋಮಯವಾಗಿದೆ. ಇರುವ ಚಿಕ್ಕ ಜಾಗದಲ್ಲೇ ಚಿಣ್ಣರಿಗೆ ಪಾಠ ಹೇಳಿಕೊಡಬೇಕಿದೆ. ಜತೆಗೆ ಸರ್ಕಾರ ಅನುಷ್ಠಾನಕ್ಕೆ ತಂದಿರುವ ಅನೇಕ ಯೋಜನೆಗಳನ್ನು ಫಲಾನುಭವಿಗಳಿಗೆ ತಲುಪಿಸುವ ಕೆಲಸವನ್ನು ಅಂಗನವಾಡಿ ಕಾರ್ಯಕರ್ತೆಯರು ಮಾಡಬೇಕು. ಇಕ್ಕಟ್ಟಿನ ಜಾಗದಲ್ಲೇ ಮಕ್ಕಳ ಕಲಿಕೆ, ನಿದ್ರೆ, ಆಟ, ಪೌಷ್ಟಿಕ ಆಹಾರವನ್ನು ತಯಾರಿಸಿ ನೀಡಬೇಕಿರುವ ಸಂಕಷ್ಟಕರ ಪರಿಸ್ಥಿತಿಯೂ ಇದೆ.

ಮಾಸಿಕ ಬಾಡಿಗೆ ಹೊರೆ:

ನಿವೇಶನ ಕೊರತೆಯಿಂದ ಅಂಗನವಾಡಿಗಳಿಗೆ ಶಾಶ್ವತ ಕಟ್ಟಡ ಕಲ್ಪಿಸುವುದು ಕಷ್ಟಕರವಾಗಿದೆ. ಇದರಿಂದ ನರಗದ ಪ್ರದೇಶದಲ್ಲಿ 5 ಸಾವಿರ ರೂ., ಗ್ರಾಮಾಂತರ ಪ್ರದೇಶದಲ್ಲಿ ಸಾವಿರ ರೂ. ಬಾಡಿಗೆಯನ್ನು ಪ್ರತಿ ತಿಂಗಳು ನೀಡಬೇಕಿದೆ. ಇಷ್ಟು ಕಡಿಮೆ ಬಾಡಿಗೆಗೆ ಕಟ್ಟಡಗಳೂ ದೊರೆಯುತ್ತಿಲ್ಲ.

ಅಗತ್ಯ ನಿವೇಶನ ಬೇಕಾಗಿದೆ:

ಅಂಗನವಾಡಿಗಳಿಗೆ ಬೇಕಾದ ನಿವೇಶನ, ಕಟ್ಟಡ ಹಾಗೂ ಮೂಲಸೌಕರ್ಯ ಒದಗಿಸುವುದು ಸರ್ಕಾರದ ಜತೆಗೆ ಸ್ಥಳೀಯ ಆಡಳಿತ ಸಂಸ್ಥೆಗಳ ಆಸಕ್ತಿ ತೋರಬೇಕಿದೆ. ಇದರಿಂದ ಬಾಲ್ಯದಲ್ಲೇ ಮಕ್ಕಳು ಉತ್ತಮ ವಾತಾವರಣದಲ್ಲಿ ಕಲಿಕೆಯಲು ಸಹಕಾರಿಯಾಗಲಿದೆ. ಈ ನಿಟ್ಟಿನಲ್ಲಿ ಜಿಲ್ಲಾಡಳಿತ ಮತ್ತು ಜಿಲ್ಲಾ ಪಂಚಾಯತಿಗಳು ಅಗತ್ಯ ನಿವೇಶನ ನೀಡುವ ಜತೆಗೆ ಪ್ರತಿ ಅಂಗನವಾಡಿ ಸ್ವಂತ ಕಟ್ಟಡದಲ್ಲಿ ಕಾರ್ಯನಿರ್ವಹಿಸುವಂತೆ ಕ್ರಮ ವಹಿಸಬೇಕಿದೆ.

ಸಮಸ್ಯೆಗಳ ಸರಮಾಲೆ ಸೃಷ್ಟಿ:

ಬಾಡಿಗೆ ಕಟ್ಟಡದಲ್ಲಿರುವ ಅಂಗನವಾಡಿ ಕೇಂದ್ರಗಳು ಅನೇಕ ಸಮಸ್ಯೆಗಳನ್ನು ನಿತ್ಯ ಎದುರಿಸಬೇಕಿದೆ. ಈ ಪೈಕಿ ಮಕ್ಕಳಿಗೆ ಸಾಕಷ್ಟು ಸ್ಥಳಾವಕಾಶ ದೊರೆಯುತ್ತಿಲ್ಲ. ಸುರಕ್ಷಿತ ಆಟದ ಮೈದಾನ, ಆಟೋಪಕರಣಗಳ ಕೊರತೆಯೂ ಇದೆ. ಶೌಚಗೃಹ, ಶುದ್ಧ ಕುಡಿಯುವ ನೀರಿನ ಸೌಲಭ್ಯ ಸಮರ್ಪಕವಾಗಿಲ್ಲ. ಬಾಡಿಗೆ ಕಟ್ಟಡಗಳು ಮಕ್ಕಳ ಸುರಕ್ಷತಾ ಮಾನದಂಡಗಳಿಗೆ ಅನುಗುಣವಾಗಿಯೂ ಇಲ್ಲ.

ಪ್ರತಿವರ್ಷ ಅಥವಾ ಸಮಯಾನುಸಾರ ಕಟ್ಟಡ ಬದಲಾಯಿಸುವ ಪರಿಸ್ಥಿತಿಯಿಂದ ಮಕ್ಕಳ ಹಾಗೂ ಪಾಲಕರಿಗೆ ತೊಂದರೆಯಾಗುತತಿದೆ. ಬಾಡಿಗೆ ವೆಚ್ಚವು ಸರ್ಕಾರದ ಮೇಲೆ ಹೆಚ್ಚುವರಿ ಆರ್ಥಿಕ ಹೊರೆಯಾಗಿದೆ. ಪೌಷ್ಟಿಕ ಆಹಾರ ಸಂಗ್ರಹಣೆ, ವಿತರಣೆಗೂ ಸೂಕ್ತ ವ್ಯವಸ್ಥೆ ಇಲ್ಲವಾಗಿದೆ. ಆದ್ದರಿಂದ ಬಾಡಿಗೆ ಕಟ್ಟಡದಲ್ಲಿರುವ ಎಲ್ಲ ಅಂಗನವಾಡಿಗಳಿಗೆ ಹಂತ ಹಂತವಾಗಿ ಸ್ವಂತ ಕಟ್ಟಡ ನಿರ್ಮಿಸಬೇಕಾಗಿದೆ. ಸ್ಥಳೀಯ ಸಂಸ್ಥೆಗಳು ಸೂಕ್ತ ಜಾಗ ಒದಗಿಸಿ, ಮಕ್ಕಳಿಗೆ ಸುರಕ್ಷಿತ, ಸ್ವಚ್ಛ ಮತ್ತು ಆಟಕ್ಕೆ ಅನುಕೂಲಕರವಾದ ಪರಿಸರ ಒದಗಿಸಬೇಕಿದೆ.

ಯೋಜನೆಗಳ ಜಾರಿಗೂ ಅಡೆತಡೆ:

ಶಾಲಾ ಪೂರ್ವ ಶಿಕ್ಷಣ ಕಲಿಕೆ, ಪೂರಕ ಪೌಷ್ಟಿಕ ಆಹಾರ ವಿತರಣೆ, ರೋಗ ನಿರೋಧಕ ಲಸಿಕೆ ನೀಡುವ ತಾಣವಾಗಿರುವ ಅಂಗನವಾಡಿ ಕೇಂದ್ರಗಳು ಸ್ವಂತ ಕಟ್ಟಡವಿಲ್ಲದೇ ಅಪೌಷ್ಟಿಕತೆಯಂತೆ ಬಳಲುತ್ತಿವೆ.

ಪುಟ್ಟಹೆಜ್ಜೆಗಳನ್ನಿಟ್ಟು ಇಲ್ಲಿಗೆ ಬರುವ ಮಕ್ಕಳಿಗೆ ಅಕ್ಷರದ ಅರಿವು ಮೂಡಿಸುವುದರೊಂದಿಗೆ ಅವರಿಗೆ ಬೇಕಿರುವ ಪೌಷ್ಟಿಕ ಆಹಾರ ನೀಡುತ್ತಿವೆ. ಗರ್ಭಿಣಿ, ಬಾಣಂತಿಯರಿಗೆ ಪೂರಕ ಪೌಷ್ಟಿಕ ಆಹಾರ ನೀಡುತ್ತಿದೆ. ಆರೋಗ್ಯದ ಬಗ್ಗೆ ತಾಯಂದಿರರಿಗೆ ಅರಿವು ಮೂಡಿಸುವುದು, ರೋಗ ನಿರೋಧಕ ಲಸಿಕೆ ನೀಡುವುದು ಸೇರಿದಂತೆ ಮಾಹಿತಿ ಸೇವೆಗಳನ್ನೂ ಒದಗಿಸುತ್ತದೆ. ಆದರೆ, ಬಾಡಿಗೆ ಕಟ್ಟಡದ ಸಮಸ್ಯೆಯಿಂದಾಗಿ ವಿವಿಧ ಸರ್ಕಾರಿ ಯೋಜನೆಗಳ ಅನುಷ್ಠಾನಕ್ಕೂ ಅಡ್ಡಿಯಾಗುತ್ತಿದೆ.

ಸಹಾಯಕಿಯರ ಕೊರತೆ:

ಮಕ್ಕಳ ಸಮಗ್ರ ಬೆಳವಣಿಗೆ ಮತ್ತು ತಾಯಿ-ಮಗುವಿನ ಆರೋಗ್ಯ ರಕ್ಷಣೆಯಲ್ಲಿ ಅತ್ಯಂತ ಮಹತ್ವದ ಪಾತ್ರ ವಹಿಸುವ ಅಂಗನವಾಡಿ ಕೇಂದ್ರಗಳು ಸಿಬ್ಬಂದಿ ಕೊರತೆಯಿಂದಲೂ ಸೊರಗುತ್ತಿವೆ. ಜಿಲ್ಲೆಯಲ್ಲಿ 26 ಅಂಗನವಾಡಿ ಕಾರ್ಯಕರ್ತೆಯರು, 215 ಸಹಾಯಕಿಯರ ಹುದ್ದೆಗಳು ಖಾಲಿ ಹೊಡೆಯುತ್ತಿವೆ. ಇದು ಮಕ್ಕಳ ನಿರ್ವಹಣೆ, ಆರೈಕೆಗೂ ಸಮಸ್ಯೆಯಾಗುತ್ತಿದೆ.

1.34 ಲಕ್ಷ ಮಕ್ಕಳಿಗೆ ಆಶ್ರಯ:

ಜಿಲ್ಲೆಯ ಅಂಗನವಾಡಿ ಕೇಂದ್ರಗಳಲ್ಲಿ ನೋಂದಾಯಿತ ನವಜಾತ ಶಿಶುಗಳ(0-6 ತಿಂಗಳು) ಸಂಖ್ಯೆ 10,734ರಷ್ಟಿದೆ. 6 ತಿಂಗಳಿಂದ 3 ವರ್ಷದೊಳಗಿನ 75,536 ಮಕ್ಕಳು, 3ರಿಂದ 6 ವರ್ಷದೊಳಗಿನ 47,796 ಮಕ್ಕಳಿದ್ದಾರೆ. ಪ್ರತ್ಯಕ್ಷವಾಗಿ ಮತ್ತು ಪರೋಕ್ಷವಾಗಿ ಅಂದಾಜು 1.34 ಲಕ್ಷ ಮಕ್ಕಳು ಅಂಗನವಾಡಿ ಕೇಂದ್ರಗಳನ್ನು ಅವಲಂಬಿಸಿದ್ದಾರೆ.

ಜಿಲ್ಲೆಯಲ್ಲಿ ಕೆಲ ಅಂಗನವಾಡಿ ಕೇಂದ್ರಗಳು ಬಾಡಿಕೆ ಕಟ್ಟಡಗಳಲ್ಲಿ ಕಾರ್ಯನಿರ್ವಹಿಸುತ್ತಿವೆ. ಸ್ವಂತ ಕಟ್ಟಡ ನಿರ್ಮಾಣದ ಕುರಿತು ಅಗತ್ಯ ಕ್ರಮ ವಹಿಸಲಾಗಿದೆ. ಜಿಲ್ಲಾಡಳಿತವು ಸಹ ಅಗತ್ಯತೆಗೆ ಅನುಗುಣವಾಗಿ ಜಾಗವನ್ನು ಮಂಜೂರು ಮಾಡಿಕೊಡುತ್ತಿದೆ. ಹಂತ ಹಂತವಾಗಿ ಶಾಶ್ವತ ಸೂರು ಕಲ್ಪಿಸಿಕೊಡಲಾಗುತ್ತಿದೆ.

ಮಕ್ಕಳು