ಯುವಕರ ಭವಿಷ್ಯಕ್ಕಾಗಿ ಮದ್ಯಪಾನ ನಿಷೇಧಿಸಲೇಬೇಕು:ರಾಜ್ಯ ಮಹಿಳಾ ಆಯೋಗದ ಅಧ್ಯಕ್ಷೆ ನಾಗಲಕ್ಷ್ಮೀ ಚೌಧರಿ ಅಭಿಮತ

ಕರ್ನಾಟಕ ರಾಜ್ಯ ಒಕ್ಕಲಿಗರ ವಿಕಾಸ ವೇದಿಕೆಯಿಂದ ನಗರದ ನಂಜರಾಜ ಬಹದ್ದೂರ್ ಛತ್ರದಲ್ಲಿ ಆಯೋಜಿಸಿದ್ದ 15ನೇ ವಾರ್ಷಿಕೋತ್ಸವ ಹಾಗೂ ರಾಜರ್ಷಿ ನಾಲ್ವಡಿ ಕೃಷ್ಣರಾಜ ಒಡೆಯರ್ ಮಾಡಿದ ಮೀಸಲಾತಿ 107ರ ಸಂಭ್ರಮಾಚರಣೆ ಕಾರ್ಯಕ್ರಮ ಉದ್ಘಾಟಿಸಿ ಅವರು ಮಾತನಾಡಿದರು.

ದಿನದಿಂದ ದಿನಕ್ಕೆ ಮದ್ಯಪಾನಿಗಳು ಹೆಚ್ಚಾಗುತ್ತಿದ್ದಾರೆ. ಇದರಿಂದ ಕುಟುಂಬ, ಸಮಾಜದಲ್ಲಿಯೂ ಅಶಾಂತಿ ಉಂಟಾಗುತ್ತಿದೆ. ಶಾಲಾ ಮಕ್ಕಳು, ಕಾಲೇಜು ವಿದ್ಯಾರ್ಥಿಗಳು ಮದ್ಯ ವ್ಯಸನಿಗಳಾಗುತ್ತಿದ್ದಾರೆ ಎಂದು ಬೇಸರ ವ್ಯಕ್ತಪಡಿಸಿದರು.

ನಗರ ಪ್ರದೇಶದಲ್ಲಿ ಹೆಚ್ಚು ಮಾರಾಟವಾಗುತ್ತಿದ್ದ ಮದ್ಯದ ಹಾವಳಿ ಇಲಾಖೆ ನೀಡಿರುವ ಗುರಿ ಸಾಧನೆಯ ನೆಪದಲ್ಲಿ ಗ್ರಾಮಾಂತರ ಪ್ರದೇಶದ ಪೆಟ್ಟಿಗೆ ಅಂಗಡಿಗಳಿಗೂ ಲಗ್ಗೆ ಇಟ್ಟಿದೆ. ಪುಸ್ತಕ, ಪೆನ್ನು ಹಿಡಿಯಬೇಕಾದ ಮಕ್ಕಳು ಇಂದು ಮದ್ಯ ಮಾರಾಟ ಮಾಡುವಂತಾಗಿದೆ. ಉತ್ತರ ಕರ್ನಾಟಕದಲ್ಲಿ ಮದ್ಯ ಮಾರಾಟದ ಟಾರ್ಗೆಟ್ ರೀಚ್ ಮಾಡಿಸುವ ಸಲುವಾಗಿ ಅಂಗಡಿ ಮಾಲೀಕ, ಮದುವೆ ಸಮಾರಂಭದಲ್ಲಿಯೂ 9ನೇ ತರಗತಿಯ ವಿದ್ಯಾರ್ಥಿಗಳ ಕೈಯಲ್ಲಿ ಪಾಲಕರಿಗೆ ತಿಳಿಸದೆ ಮದ್ಯ ಮಾರಾಟ ಮಾಡಿಸಿದ್ದರು ಎಂದರು.

ಆದರೆ ಆ ನಾಲ್ಕು ವಿದ್ಯಾರ್ಥಿಗಳಲ್ಲಿ ಒಬ್ಬ ವಿದ್ಯಾರ್ಥಿ ತಂದೆ, ತಾಯಿಗೆ ಸಿಕ್ಕಿ ಬೀಳುತ್ತೇನೆ ಎಂಬ ಭಯದಲ್ಲಿ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ. ಮದ್ಯಮಾರಾಟ ಮಾಡಬೇಕು ಎಂದು ಗುರಿ ನೀಡಿದ್ದರಿಂದ ಒಬ್ಬ ವಿದ್ಯಾರ್ಥಿ ಜೀವನವೇ ಬಲಿಯಾಗಿದೆ ಎಂದು ಹೇಳಿದರು.

ಮಾಜಿ ಮುಖ್ಯಮಂತ್ರಿ ಎಸ್. ನಿಜಲಿಂಗಪ್ಪ ಅವರ ಅವಧಿಯಲ್ಲಿ ಮದ್ಯ ಕುಡಿದು ಅನೇಕರು ಸಾವೀಗಿಡಾಗಿದ್ದರು. ಅಂದು ಸಚಿವರಾಗಿದ್ದ ಮೈಸೂರಿನ ಯಶೋಧರಮ್ಮ ದಾಸಪ್ಪ ರಾಜ್ಯದಲ್ಲಿ ಮಧ್ಯಪಾನ ನೀಷೇಧ ಮಾಡುವಂತೆ ಒತ್ತಾಯಿಸಿ ರಾಜೀನಾಮೆ ನೀಡಿದ್ದರು ಎಂದು ನೆನಪು ಮಾಡಿಕೊಂಡರು.

ಮಹಿಳೆಯರಿಗೆ ಮೀಸಲಾತಿ ಇಲ್ಲದ ದಿನಗಳಲ್ಲಿ ಮೈಸೂರು ರಾಜರಾಗಿದ್ದ ನಾಲ್ವಡಿ ಕೃಷ್ಣರಾಜ ಒಡೆಯರ್ ಅವರು ಮಹಿಳೆಯರಿಗಾಗಿ ಪ್ರತ್ಯೇಕವಾಗಿ ಶಾಲಾ ಕಾಲೇಜು, ಆಸ್ಪತ್ರೆಗಳನ್ನು ಕಟ್ಟಿಸಿದ್ದರು. ಅಂತಹ ಹಾದಿಯನ್ನು ಯಶೋಧರಮ್ಮ ದಾಸಪ್ಪ ಸಾಗಿ ಬಂದ ಆದರ್ಶ ಮಹಿಳೆ ಎಂದು ಬಣ್ಣಿಸಿದರು.

ವಿವಿಧ ಕ್ಷೇತ್ರದಲ್ಲಿ ಸೇವೆ ಸಲ್ಲಿಸಿದ ಸುಶೀಲಾ ನಂಜಪ್ಪ(ಸಹಕಾರ ಕ್ಷೇತ್ರ), ಡಾ.ಸೋನಿಯಾ ಮಂದಣ್ಣ(ವೈದ್ಯಕೀಯ), ಡಾ.ಲಕ್ಷ್ಮೀದೇವಿ(ವೈದ್ಯಕೀಯ), ಸುಧಾಮಣಿ (ಉದ್ಯಮಿ), ಕವಿತಾ ಶ್ರೀನಿವಾಸ (ಶಿಕ್ಷಕಿ), ಚೂಡಾರತ್ನಮ್ಮ (ಸಂಕಲ್ಪಯಾತ್ರಿ), ಪಾರ್ವತಮ್ಮ (ಕ್ರೀಡಾಪಟು), ಡಿ.ಸಿ.ವಿಜಯಲಕ್ಷ್ಮೀ(ಗಾಯಕಿ) ಅವರಿಗೆ ಪದ್ಮಭೂಷಣ ಯಶೋಧರಮ್ಮ ದಾಸಪ್ಪ ಪ್ರಶಸ್ತಿ ನೀಡಿ ಗೌರವಿಸಲಾಯಿತು.

ನಾಗರಾಜ ವಿ.ಭೈರಿ, ಎಂ.ರಾಮಕೃಷ್ಣ, ಕೆ.ಬೋ.ರಾಧಾಕೃಷ್ಣ, ಪಾರ್ವತೀಶ ಬಿಳಿದಾಳೆ ಸೇರಿದಂತೆ ಇತರರಿಗೆ ರಾಜರ್ಷಿ ನಾಲ್ವಡಿ ಕೃಷ್ಣರಾಜ ಒಡೆಯರ್ ಪ್ರಶಸ್ತಿ ಪ್ರದಾನ ಮಾಡಲಾಯಿತು.

ಕರ್ನಾಟಕ ರಾಜ್ಯ ಒಕ್ಕಲಿಗರ ವಿಕಾಸ ವೇದಿಕೆಯ ಅಧ್ಯಕ್ಷ ಎಚ್.ಎಲ್.ಯಮುನಾ, ಗೌರವಾಧ್ಯಕ್ಷ ಎಚ್.ಕೆ.ರಾಮು, ಕನ್ನಡ ಸಾಹಿತ್ಯ ಪರಿಷತ್ತಿನ ಜಿಲ್ಲಾಧ್ಯಕ್ಷ ಮಡ್ಡೀಕೆರೆ ಗೋಪಾಲ್, ಕೃಷಿ ವಿಜ್ಞಾನಿಗಳಾದ ಡಾ.ವಸಂತಕುಮಾರ್ ತಿಮಕಾಪುರ, ವೇಣುಗೋಪಾಲ್ ಇತರರು ಇದ್ದರು.