ಡಿಜಿಟಲ್ ಬಳಕೆಯಿಂದ ಆರೋಗ್ಯದ ಮೇಲೆ ದುಷ್ಪರಿಣಾಮ

ಎಸ್‌ಬಿಆರ್‌ಆರ್ ಮಹಾಜನ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಶನಿವಾರ ಸಂಜೆ ಆಯೋಜಿಸಿದ್ದ 2024-25ನೇ ಶೈಕ್ಷಣಿಕ ಸಾಲಿನ 5ನೇ ಪದವಿ ಪ್ರದಾನ ಸಮಾರಂಭದಲ್ಲಿ ಮಾತನಾಡಿದ ಅವರು, ಸಾಮಾಜಿಕ ಜಾಲತಾಣಗಳು ಸಮಾಜ, ಶಿಕ್ಷಣ ವ್ಯವಸ್ಥೆಯನ್ನು ಜಾಲಾಡುತ್ತಿವೆ ಎಂದು ಹೇಳಿದರು.

ಕೇವಲ ಸರ್ಕಾರಿ ಉದ್ಯೋಗವೇ ಅಂತಿಮ ಗುರಿಯಾಗಬಾರದು, ಹೊಸ ಸ್ಟಾರ್ಟಪ್ ಆರಂಭಿಸುವ ಮೂಲಕ ಸ್ವಾವಲಂಬಿಗಳಾಗಬೇಕು. 

ವಿಶ್ವವಿದ್ಯಾಲಯದ ಪರೀಕ್ಷೆ, ಜೀವನದ ಪರೀಕ್ಷೆ ವಿಭಿನ್ನವಾಗಿರುತ್ತವೆ. ಜೀವನದ ಪರೀಕ್ಷೆಯಲ್ಲಿ ಕಾಪಿ ಮಾಡಲು ಸಾಧ್ಯವಿಲ್ಲ. ಹಾಗೆ ಮಾಡಿದರೆ ಬದುಕನ್ನು ನಿಭಾಯಿಸುವುದು ಅಸಾಧ್ಯ ಎಂದು ವಿದ್ಯಾರ್ಥಿಗಳಿಗೆ ಕಿವಿಮಾತು ಹೇಳಿದರು.

1947ರಲ್ಲಿ ದೇಶದ ಸಾಕ್ಷರತಾ ಪ್ರಮಾಣವು ಕೇವಲ ಶೇ.30ರಷ್ಟಿತ್ತು. ಇದೀಗ ಅದು ಶೇ.80ಕ್ಕೆ ಏರಿಕೆಯಾಗಿದೆ. ಆದರೆ, ಹಿಂದಿನ ಜನರಲ್ಲಿ ಮನೆ ಮಾಡಿದ್ದ ಶೇ.100ರಷ್ಟು ಸಂಸ್ಕಾರ ಮತ್ತು ಮೌಲ್ಯ ಇದೀಗ ಶೇ.30ಕ್ಕೆ ಕುಸಿದಿರುವುದು ಆತಂಕಕಾರಿ ಸಂಗತಿ. ಪ್ರತಿಯೊಬ್ಬ ವಿದ್ಯಾರ್ಥಿಯೂ ಸಹಾಯ ಗುಣ, ಸೇವಾ ಮನೋಭಾವ ಬೆಳೆಸಿಕೊಳ್ಳಬೇಕು ಎಂದು ತಿಳಿಸಿದರು.

ಮಹಿಳೆಯರು ಸಾಕ್ಷರರಾಗಬೇಕು: ಶಿಕ್ಷಣದಲ್ಲಿ ಶೇ.60ರಷ್ಟು ವಿದ್ಯಾರ್ಥಿನಿಯರಿರುವುದು ಪ್ರಗತಿಯ ದೃಷ್ಟಿಯಿಂದ ಉತ್ತಮ ಬೆಳವಣಿಗೆ. ದೇಶ ಸದೃಢವಾಗಬೇಕಾದರೆ ಮಹಿಳೆಯರಿಗೆ ಸಾಕ್ಷರತೆ ಸಿಗುವುದು ಅನಿವಾರ್ಯ. ಲೋಕಸಭೆಯಲ್ಲಿ ಮಹಿಳೆಯರಿಗೆ ಶೇ.33ರಷ್ಟು ಮೀಸಲಾತಿ ನೀಡುವ ಪ್ರಯತ್ನ ನಡೆದಿವೆ. ಮಹಿಳೆಯರೇ ಭಾರತೀಯ ಸಂಸ್ಕೃತಿಯ ನಿಜವಾದ ಪ್ರತಿಬಿಂಬಗಳು. ಜಗತ್ತು ಬದಲಾಗಿಲ್ಲ, ಬದಲಾಗಿ ಜನರ ಅಪೇಕ್ಷೆಗಳು ಬದಲಾಗಿವೆ ಎಂದರು.

ವೃತ್ತಿಪರವಾಗಿ ಬೆಳೆಯಲು ಅನೇಕ ಭಾಷೆ ಕಲಿಯುವುದು ಅವಶ್ಯಕವಾದರೂ, ಕನ್ನಡ ಭಾಷೆಯನ್ನು ಕೇವಲ ಕನ್ನಡಕವಾಗಿ ಅಲ್ಲದೆ, ನಮ್ಮ ಕಣ್ಣಾಗಿ ಬಳಸಬೇಕು. 

ಗೌರವವು ನಮ್ಮ ವ್ಯಕ್ತಿತ್ವದಿಂದ, ಅನುಭವವು ಜೀವನ ಕಲಿಸುವ ಪಾಠದಿಂದ ಮತ್ತು ಅದೃಷ್ಟವು ನಿರಂತರ ಪರಿಶ್ರಮದಿಂದ ಸಿದ್ಧಿಸುತ್ತದೆ. ಡಾ.ಎ.ಪಿ.ಜೆ. ಅಬ್ದುಲ್ ಕಲಾಂ ಅವರೇ ನಮಗೆ ಸ್ಫೂರ್ತಿ. ಅವರ ಯಶಸ್ಸು ಇಂದಿನ ಯುವ ಜನಾಂಗಕ್ಕೆ ಮಾದರಿ ಎಂದರು. 

ಶಿಕ್ಷಣವು ಕೇವಲ ಮಾಹಿತಿ ಕಲಿಸುವಂತಹದ್ದಲ್ಲ, ಸೃಜನಶೀಲತೆಯೇ ಕಲಿಕೆಗೆ ಮುಖ್ಯ. ಪದವಿ ಪಡೆದವರೆಲ್ಲರೂ ಜ್ಞಾನವಂತರಲ್ಲ, ಯಾರು ನಿರಂತರವಾಗಿ ಹೊಸದನ್ನು ಕಲಿಯುತ್ತಾರೋ ಅವರೇ ನಿಜವಾದ ಜ್ಞಾನವಂತರು. ಭಾರತವು ಶೇ.65ರಷ್ಟು ಯುವಶಕ್ತಿ ಹೊಂದಿದ್ದು, ದೇಶಾಭಿವೃದ್ಧಿಯಲ್ಲಿ ಅವರ ಕೊಡುಗೆ ಅಪಾರವಾಗಿದೆ ಎಂದರು.

ಮೈಸೂರು ವಿಶ್ವವಿದ್ಯಾಲಯದ ಕುಲಪತಿ ಪ್ರೊ.ಎನ್.ಕೆ. ಲೋಕನಾಥ್ ಮಾತನಾಡಿ,  ವಿದ್ಯೆ ಎಂಬುದು ಕೇವಲ ಜ್ಞಾನವಲ್ಲ. ಒಂದು ವಿಷಯದಲ್ಲಿ ಪರಿಣಿತಿ ಪಡೆಯುವುದರ ಜತೆಗೆ ಸಮಯಪ್ರಜ್ಞೆ, ಆತ್ಮವಿಶ್ವಾಸ ಇರಬೇಕು. ಪ್ರತಿದಿನ ನಮ್ಮನ್ನು ನಾವು ಸಮರ್ಥರನ್ನಾಗಿ ಮಾಡಿಕೊಳ್ಳಬೇಕು. ಪ್ರತಿಯೊಬ್ಬರಲ್ಲೂ ಧನಾತ್ಮಕ ಚಿಂತನೆ, ವ್ಯಕ್ತಿತ್ವ ಮುಖ್ಯ ಎಂದು ತಿಳಿಸಿದರು. 

ಯುವಜನಾಂಗಕ್ಕೆ ಕೆಲಸ ಮಾಡುವ ಹಂಬಲವಿದ್ದರೆ, ನಿರಂತರವಾಗಿ ಕೆಲಸ ಸಿಗುತ್ತಲೇ ಹೋಗುತ್ತದೆ. ಕೈಗೆ ಸ್ಮಾರ್ಟ್‌ಫೋನ್ ಬಂದಾಗಿನಿಂದ ಅಲೋಚನಾ ಶಕ್ತಿ ಕಡಿಮೆಯಾಗಿದೆ ಎಂದು ಕಳವಳ ವ್ಯಕ್ತಪಡಿಸಿದರು.

ಮಹಾಜನ ವಿದ್ಯಾಸಂಸ್ಥೆಯ ಅಧ್ಯಕ್ಷ ಟಿ.ಮುರಳೀಧರ್ ಭಾಗವತ್, ಗೌರವ ಕಾರ್ಯದರ್ಶಿ ಡಾ.ಟಿ.ವಿಜಯಲಕ್ಷ್ಮೀ ಮುರಳೀಧರ್ ಮಾತನಾಡಿದರು. ಸ್ನಾತಕೋತ್ತರ ಕೇಂದ್ರದ ನಿರ್ದೇಶಕ ಡಾ. ಸಿ.ಕೆ. ರೇಣುಕಾರ್ಯ, ಮಹಾಜನ ವಿದ್ಯಾಸಂಸ್ಥೆಯ ಉಪಾಧ್ಯಕ್ಷ ಬಿ.ಎಸ್.ರವಿಕುಮಾರ್ , ಖಜಾಂಚಿ ಎಸ್.ಕೆ.ಸಂಜಯ್, ಆಡಳಿತಾಧಿಕಾರಿ ಪ್ರೊ.ಪಿ.ಸರೋಜಮ್ಮ, ಕಾರ್ಯನಿರ್ವಹಣಾಧಿಕಾರಿ ಡಾ.ಎಸ್.ಆರ್. ರಮೇಶ್, ಕಾರ್ಯಕ್ರಮದ ಸಂಚಾಲಕ ಡಾ. ಎಚ್.ಆರ್.ತಿಮ್ಮೇಗೌಡ, ಪ್ರಾಂಶುಪಾಲೆ ಡಾ. ಬಿ.ಆರ್. ಜಯಕುಮಾರಿ, ಶೈಕ್ಷಣಿಕ ಡೀನ್ ಡಾ.ಎಚ್.ಶ್ರೀಧರ್ ಇತರರಿದ್ದರು.

2024-25ನೇ ಶೈಕ್ಷಣಿಕ ವರ್ಷದ ಸ್ನಾತಕ ಪದವಿ ವಿಭಾಗದ ಬಿ.ಎ, ಬಿ.ಕಾಂ, ಬಿಬಿಎ, ಬಿಸಿಎ, ಬಿಎಸ್ಸಿ ಸೇರಿದಂತೆ ವಿವಿಧ ಕೋರ್ಸ್‌ಗಳ 323 ವಿದ್ಯಾರ್ಥಿಗಳಿಗೆ ಪದವಿ, 26 ಜನರಿಗೆ ಪದಕದೊಂದಿಗೆ ನಗದು ಬಹುಮಾನ ಪ್ರದಾನ ಮಾಡಲಾಯಿತು. ಸ್ನಾತಕೋತ್ತರ ಪದವಿ ವಿಭಾಗದಲ್ಲಿ 9 ಕೋರ್ಸ್‌ಗಳ 409 ವಿದ್ಯಾರ್ಥಿಗಳಿಗೆ ಪದವಿ, 20 ವಿದ್ಯಾರ್ಥಿಗಳಿಗೆ ಪದಕದೊಂದಿಗೆ ನಗದು ಬಹುಮಾನ, 4 ವಿದ್ಯಾರ್ಥಿಗಳಿಗೆ ದತ್ತಿ ನಗದು ಬಹುಮಾನ ಪಡೆದರು.