ಮನಸೆಳೆದ ಭರತನಾಟ್ಯ ಪ್ರದರ್ಶನ

ಸುಮಾರು 30ಕ್ಕೂ ಹೆಚ್ಚು ನೃತ್ಯ ಕಲಾವಿದರು ಪಾಲ್ಗೊಂಡಿದ್ದ ಉತ್ಸವದಲ್ಲಿ ವಿದ್ವತ್ಪೂರ್ಣ ಭರತನಾಟ್ಯ ಪ್ರದರ್ಶನಗಳು ಕಲಾ ರಸಿಕರನ್ನು ರಂಜಿಸಿದವು. ಕಲೆಮನೆ ಸಭಾಂಗಣ ಕಲಾಭಿಮಾನಿಗಳಿಂದ ತುಂಬಿ ತುಳುಕಿತ್ತು.

ಸಿಂಗಾಪುರ್ ನಾಟ್ಯಂ ಸಂಸ್ಥೆಯ ಕಲಾ ನಿರ್ದೇಶಕಿ ಮಾಲಿಕ ಪನ್ನೀಕರ್, ಬೆಂಗಳೂರಿನ ನಾಟ್ಯ ರಂಜಿತಂ ಸ್ಕೂಲ್ ಆಫ್ ಡ್ಯಾನ್ಸ್‌ನ ಕಲಾತ್ಮಕ ನಿರ್ದೇಶಕಿ ಎಂ.ಡಿ ಸುನಿತಾ ಮತ್ತು ಅವರ ಶಿಷ್ಯರು, ಕನ್ಯಾಕುಮಾರಿ ಸಲಂ ನಾಟ್ಯಾಲಯದ ಕಲಾತ್ಮಕ ನಿರ್ದೇಶಕಿ ಪ್ರೊ.ಮೆರೀನ ಮಂಜು ಮತ್ತು ಶಿಷ್ಯರಿಂದ ಭರತನಾಟ್ಯ ಪ್ರದರ್ಶನ ನೀಡಿದರು.

ಹಿರಿಯ ಪತ್ರಕರ್ತ ಅಂಶಿ ಪ್ರಸನ್ನಕುಮಾರ್ ಕಾರ್ಯಕ್ರಮಕ್ಕೆ ಚಾಲನೆ ನೀಡಿ ಮಾತನಾಡಿ, ಕಲೆ ಮನುಷ್ಯನ ಜೀವನದಲ್ಲಿ ಉತ್ಸಾಹ, ಸೃಜನಶೀಲತೆ ಹಾಗೂ ಸಕಾರಾತ್ಮಕ ಚಿಂತನೆ ಹೆಚ್ಚಿಸುತ್ತದೆ. ಅದರಲ್ಲೂ ಭರತನಾಟ್ಯವು ನೃತ್ಯ, ಸಂಗೀತ, ಸಾಹಿತ್ಯ ಮತ್ತು ಅಭಿನಯವನ್ನು ಸಮನ್ವಯಗೊಳಿಸುವ ಸಮೃದ್ಧ ಕಲೆಯಾಗಿದ್ದು, ಭಾರತೀಯ ಸಂಸ್ಕೃತಿ ಹಾಗೂ ಪರಂಪರೆಯನ್ನು ಮುಂದಿನ ಪೀಳಿಗೆಗೆ ಪರಿಚಯಿಸುವಲ್ಲಿ ಮಹತ್ವದ ಪಾತ್ರ ವಹಿಸುತ್ತದೆ ಎಂದರು.

ಭರತನಾಟ್ಯ ಕೇವಲ ಮನರಂಜನೆ ಕಲೆಯಲ್ಲ. ದೇಹ ಮತ್ತು ಮನಸ್ಸಿನ ಸಮತೋಲನಕ್ಕೆ ಸಹಕಾರಿಯಾಗುವುದರ ಜತೆಗೆ ಶಿಸ್ತು, ಏಕಾಗ್ರತೆ ಹಾಗೂ ಆತ್ಮವಿಶ್ವಾಸವನ್ನು ಬೆಳೆಸುತ್ತದೆ. ಕಲಾ ಚಟುವಟಿಕೆಗಳಲ್ಲಿ ತೊಡಗಿಸಿಕೊಳ್ಳುವುದರಿಂದ ಜೀವನೋತ್ಸಾಹ ಹೆಚ್ಚುವುದಲ್ಲದೆ, ಸಮಾಜದಲ್ಲಿ ಸೌಹಾರ್ದ ಮತ್ತು ಸಾಂಸ್ಕೃತಿಕ ಮೌಲ್ಯಗಳು ಗಟ್ಟಿಯಾಗುತ್ತವೆ ಎಂದರು.

ಇದೇ ವೇಳೆ ಹಿರಿಯ ಪತ್ರಕರ್ತರಾದ ಎಂ.ಆರ್. ಸತ್ಯನಾರಾಯಣ, ಸಿ.ಕೆ. ಮಹೇಂದ್ರ ಅವರಿಗೆ ‘ಕಲೆಮನೆ ಕಲಾಶ್ರೀ’ ಪ್ರಶಸ್ತಿ ಪ್ರದಾನ ಮಾಡಲಾಯಿತು. ಪ್ರಮುಖರಾದ ಡಾ.ಕೆ.ಕುಮಾರ್, ಡಾ.ಮಾಲತಿ, ಕೆ.ಎಂ.ಲೇಖಾ, ಕೆ.ಎಂ.ನಿಧಿ, ರಂಗನಾಥ್ ಇತರರು ಇದ್ದರು.