ಈ ವ್ಯಸನಗಳಿಗೆ ತುತ್ತಾಗಿರುವವರಲ್ಲಿ ಕೂಲಿ ಕಾರ್ಮಿಕರೇ ಹೆಚ್ಚು. ದಿನವಿಡೀ ದುಡಿದ ಹಣ ದಂಧೆಯ ಪಾಲಾಗುತ್ತಿದ್ದು, ಇದಕ್ಕೆ ಕಡಿವಾಣ ಹಾಕಲು ಈವರೆಗೆ ಸಾಧ್ಯವಾಗಿಲ್ಲ. ಸಾಮಾಜಿಕ ಪಿಡುಗಾಗಿರುವ ಮಟ್ಕಾ, ಜೂಜಾಟ ವಿರುದ್ಧ ಸ್ತ್ರೀ ಶಕ್ತಿ ಸಂಘದ ಮಹಿಳೆಯರು ಬೀದಿಗಿಳಿದು ಹೋರಾಟ ಮಾಡಿದರೂ ಕಡಿವಾಣ ಬಿದ್ದಿಲ್ಲ. ಪಾವಗಡದ ದಂಧೆಕೋರರು ಜಾಲವನ್ನು ಆಂಧ್ರಪ್ರದೇಶಕ್ಕೂ ವಿಸ್ತರಿಸಿದ್ದಾರೆ. ಸೀಮಾಂಧ್ರದ ಮಡಕಶಿರಾ, ರೊದ್ದಂ, ಕಂಬದೂರು, ಪೆನುಕೊಂಡ, ಅಮರಾಪುರ, ಹಿಂದೂಪುರ, ಕಲ್ಯಾಣದುರ್ಗದ ಪೊಲೀಸ್ ತಂಡ ಪಾವಗಡ ಪಟ್ಟಣದಲ್ಲಿನ ಮಟ್ಕಾ ದಂಧೆಕೋರರ ಮನೆಗಳ ಮೇಲೆ ದಾಳಿಗಳನ್ನೂ ಮಾಡಿದೆ. ಪ್ರಭಾವಿಗಳ ಹಾಗೂ ಕೆಲವು ಪೊಲೀಸರ ಕೃಪಾಕಟಾಕ್ಷ ದಂಧೆಕೋರರ ಮೇಲಿದೆ.
