ಪಟ್ಟಣದ ಮೂರುಕಟ್ಟೆಯಲ್ಲಿ ಮಹಡಿ ಮೇಲಿರುವ ಪುರಸಭೆಯ ಕಾರ್ಯಾಲಯಕ್ಕೆ ಸಮರ್ಪಕ ವಾಹನ ನಿಲುಗಡೆ ಜಾಗವಿಲ್ಲ. ಅಧ್ಯಕ್ಷ, ಉಪಾಧ್ಯಕ್ಷ, ಸಭಾನಾಯಕ, ಮುಖ್ಯಾಧಿಕಾರಿ ಸಹಿತ ಎಲ್ಲ ಅಧಿಕಾರಿ, ಸಿಬ್ಬಂದಿ ಕೆಲಸಕ್ಕೂ, ಸಾರ್ವಜನಿಕರು ಬಂದು ಹೋಗುವುದಕ್ಕೂ ತೀರಾ ಇಕ್ಕಟ್ಟಾಗಿದೆ. ಸದ್ಯದ ಕಟ್ಟಡವೂ ಹಳೆಯದಾಗಿದ್ದು ಅಸುರಕ್ಷಿತ ಎಂಬ ಸ್ಥಿತಿಗೆ ತಲುಪಿದೆ. ಹೀಗಾಗಿ ದಶಕಗಳಿಂದಲೂ ಸುವ್ಯವಸ್ಥಿತ, ಅಗತ್ಯಕ್ಕೆ ತಕ್ಕಷ್ಟು ದೊಡ್ಡದಾದ ಪುರಸಭೆ ಕಾರ್ಯಾಲಯದ ಕಟ್ಟಡಕ್ಕಾಗಿ ಬೇಡಿಕೆಯಿದ್ದರೂ ಈಡೇರಿರಲಿಲ್ಲ. ವರ್ಷದ ಹಿಂದೆ ಮೂರೂರು ರಸ್ತೆಯಲ್ಲಿ ತಾಲೂಕು ಸೌಧ ಸಿದ್ಧಗೊಂಡು ತಹಸೀಲ್ದಾರ್ ಕಚೇರಿಯ ಬಹುತೇಕ ವಿಭಾಗಗಳು ಅಲ್ಲಿಗೆ ಸ್ಥಳಾಂತರಗೊಂಡಿವೆ. ಹೀಗಾಗಿ ತಹಸೀಲ್ದಾರ ಕಚೇರಿಯ ಶತಮಾನದ ಹಳೆಯ ಕಟ್ಟಡವನ್ನೇ ಅನಿವಾರ್ಯವಾಗಿ ದುರಸ್ತಿಗೊಳಿಸಿ ಪುರಸಭೆ ಕಾರ್ಯಾಲಯವನ್ನು ಅಲ್ಲಿಗೆ ಸ್ಥಳಾಂತರಿಸುವತ್ತ ಶಾಸಕ ದಿನಕರ ಶೆಟ್ಟಿ ಮುತುವರ್ಜಿ ವಹಿಸಿದ್ದಾರೆ. ಇದರಿಂದ ಸಾರ್ವಜನಿಕರಿಗೆ ಮತ್ತು ಪುರಸಭೆಯ ಕಾರ್ಯಚಟುವಟಿಕೆಗಳಿಗೂ ಹೆಚ್ಚಿನ ಅನುಕೂಲವಾಗಲಿದೆ. ಆದರೆ, ತಹಸೀಲ್ದಾರ ಕಚೇರಿಯ ದುರಸ್ತಿ ಕಾರ್ಯ ಇದೇ ರೀತಿ ಆಮೆಗತಿಯಲ್ಲಿ ನಡೆದರೆ ಈ ಮಳೆಗಾಲದೊಳಗೆ ಪುರಸಭೆ ಕಾರ್ಯಾಲಯ ಸ್ಥಳಾಂತರ ಕಷ್ಟವಾಗಬಹುದು ಎಂಬ ಕಾರಣಕ್ಕೆ ಶಾಸಕ ಶೆಟ್ಟಿ ಅಧಿಕಾರಿಗಳಿಗೆ ಚುರುಕಾಗಿ ಕೆಲಸ ಮುಗಿಸುವಂತೆ ಕಟ್ಟುನಿಟ್ಟಾಗಿ ಸೂಚಿಸಿದ್ದಾರೆ.
