ಮೂಲ್ಕಿಯಲ್ಲಿ ಮತ್ತೆ ಸರಣಿ ಕಳವು

ಮೂಲ್ಕಿ: ಚರಂತಿಪೇಟೆಯ ಜುವೆಲ್ಲರಿಯೊಂದರ ಗೋಡೆಯ ಎಕ್ಸಾಸ್ಟ್ ಫ್ಯಾನ್ ಒಡೆದು ಕಬ್ಬಿಣದ ಏಣಿ ಮೂಲಕ ಒಳ ಪ್ರವೇಶಿಸಿದ ಕಳ್ಳರು ಸುಮಾರು 80 ಸಾವಿರ ರೂ. ಮೌಲ್ಯದ ಚಿನ್ನ ಹಾಗೂ ಬೆಳ್ಳಿ ಸಾಮಗ್ರಿ ಕಳವು ಮಾಡಿದ್ದಾರೆ.

ಇದಕ್ಕೂ ಮೊದಲು ಕಳ್ಳರು ಪಕ್ಕದಲ್ಲಿದ್ದ ಸತೀಶ್ ಎಂಬುವರ ಮನೆ ಬಾಗಿಲು ಮುರಿದು ಒಳನುಗ್ಗಿ ಸೊತ್ತುಗಳನ್ನು ಜಾಲಾಡಿದ್ದಾರೆ. ಸತೀಶ್ ಅವರ ಮನೆಗೆ ಕೆಲದಿನಗಳ ಹಿಂದೆ ಸುರಿದ ಭಾರಿ ಮಳೆಯಿಂದ ಹಾನಿಯಾಗಿದ್ದು, ಅವರು ಬೆಳ್ಳಾಯೂರಿನ ಬಾಡಿಗೆ ಮನೆಯಲ್ಲಿ ವಾಸಿಸುತ್ತಿದ್ದು ಹಗಲಿನಲ್ಲಿ ಬಂದುಹೋಗುತ್ತಿದ್ದರು.

ಚರಂತಿಪೇಟೆ ಬಳಿಯಿರುವ ಸಿಸಿ ಕ್ಯಾಮರಾವನ್ನು ಪೊಲೀಸರು ಪರಿಶೀಲಿಸುತ್ತಿದ್ದಾರೆ. ಶನಿವಾರ ರಾತ್ರಿ ಕಾರ್ನಾಡು ನಾರಾಯಣ ಗುರು ಆಸ್ಪತ್ರೆ ಬಳಿ ಫ್ಲ್ಯಾಟ್ ಕೆಳಗಡೆ ನಿಲ್ಲಿಸಿದ ಸ್ಕೂಟರ್ ಕೂಡ ಕಳವಾಗಿದೆ.

ಮೂಲ್ಕಿ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಕೆಲ ತಿಂಗಳಿನಿಂದ ದೇವಸ್ಥಾನ, ಅಂಗಡಿ, ಮನೆಗಳಲ್ಲಿ ಸರಣಿ ಕಳ್ಳತನ ನಡೆಯುತ್ತಿದೆ.