ಚಿಕ್ಕಬಳ್ಳಾಪುರ: ಶಸ್ತ್ರ ಚಿಕಿತ್ಸೆ ವೇಳೆ ನೀಡಿದ ರಕ್ತದ ಗುಂಪು ಅದಲು ಬದಲಾದ ಕಾರಣ ಬಾಣಂತಿ ಸಾವನ್ನಪ್ಪಿದ ಹಿನ್ನೆಲೆಯಲ್ಲಿ ಕುಟುಂಬಸ್ಥರು ಗೌರಿಬಿದನೂರು ಸಾರ್ವಜನಿಕ ಆಸ್ಪತ್ರೆಯ ಮುಂಭಾಗಲ್ಲಿ ಶವವಿರಿಸಿ ಪ್ರತಿಭಟಿಸಿದರು.
ಗೌರಿಬಿದನೂತು ತಾಲ್ಲೂಕಿನ ಪುಲಗಾನಹಳ್ಳಿ ಗ್ರಾಮದ ಭಾಗ್ಯಮ್ಮ(30) ಮೃತ ದುರ್ದೈವಿ. ಹೆರಿಗೆ ನೋವು ಕಾಣಿಸಿಕೊಂಡ ಹಿನ್ನಲೆಯಲ್ಲಿ ಆಕೆಯನ್ನು ಸಮೀಪದ ಅಲಿಪುರ ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ಕರೆದೊಯ್ಯಲಾಗಿದೆ. ಅಲ್ಲಿನ ವೈದ್ಯರು ಚಿಕಿತ್ಸೆ ನೀಡಿ, ಹೆಚ್ಚಿನ ಚಿಕಿತ್ಸೆಗಾಗಿ ನಗರದ ತಾಯಿ ಮತ್ತು ಮಕ್ಕಳ ಆಸ್ಪತ್ರೆಗೆ ಕಳುಹಿಸಿದ್ದಾರೆ. ಮಹಿಳೆ ವಿಪರೀತ ಕೆಮ್ಮು, ಜ್ವರ ಹಾಗೂ ನೆಗಡಿಯಿಂದ ಮಹಿಳೆ ಬಳಲುತ್ತಿದ್ದಳು. ಸೋಮವಾರ ನೋವು ಹೆಚ್ಚಾದ ಹಿನ್ನಲೆಯಲ್ಲಿ ಮಧ್ಯರಾತ್ರಿ 1 ಗಂಟೆ ನಂತರ ಸಿಜೇರಿಯನ್ ಮೂಲಕ ಹೆರಿಗೆ ಮಾಡಿಸಲಾಗಿದೆ.
ಈ ಮೊದಲು ಅಲಿಪುರ ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ತೆರಳಿದ್ದಾಗ ಆಕೆಯ ರಕ್ತದ ಗುಂಪು B+ ಎಂದು ದಾಖಲಿಸಲಾಗಿತ್ತು. ಆದರೆ ಇಲ್ಲಿ ಸಿಸೇರಿಯನ್ ಮಾಡಿದ ಬಳಿಕ ರಕ್ತ ಸ್ರಾವ ಹೆಚ್ಚಾದಾಗ ಮತ್ತೆ ಆಕೆಯ ರಕ್ತ ಮರುಪರೀಕ್ಷೆ ಮಾಡಿದಾಗ ಆಕೆಯ ರಕ್ತದ ಗುಂಪುರ B- ಎಂದು ಕಂಡು ಬಂದಿದೆ. 0- ಹೊಂದಾಣಿಕೆಯಾಗಲಿದೆ ಎಂದು ರಕ್ತವನ್ನು ನೀಡಿದ್ದಾರೆ. ಮುನ್ನೆಚ್ಚರಿಕೆ ಕ್ರಮವಾಗಿ ಬಿ ನೆಗೆಟೀವ್ ರಕ್ತ ದಾಸ್ತಾನು ಇಲ್ಲದ ಕಾರಣ ಕ್ರಾಸ್ ಮ್ಯಾಚ್ ಮಾಡಿ O- ರಕ್ತವನ್ನು ನೀಡಲಾಗಿದೆ. ಬಳಿಕ ಹೆಚ್ಚಿನ ಚಿಕಿತ್ಸೆಗಾಗಿ ಬೆಂಗಳೂರಿನ ವಾಣಿ ವಿಲಾಸ ಆಸ್ಪತ್ರೆಗೆ ಆಕೆಯನ್ನು ರವಾನಿಸಲಾಗಿದೆ. ಅಲ್ಲಿಯೂ ಸಹ ರಕ್ತ ಪರೀಕ್ಷೆಯಲ್ಲಿ B- ರಕ್ತ ನೀಡಿ ಚಿಕಿತ್ಸೆ ಮುಂದುವರಿಸಿದರೂ ಚಿಕಿತ್ಸೆ ಫಲಕಾರಿಯಾಗದೆ ಮಹಿಳೆ ಮೃತ ಪಟ್ಟಿದ್ದಾರೆ.
