ಹತ್ತಾರು ವರ್ಷದಿಂದ ಕುಟುಂಬಗಳು ಇಲ್ಲಿಯೇ ನೆಲೆ ಕಂಡುಕೊಂಡಿದ್ದು ಇತ್ತೀಚೆಗಷ್ಟೇ ಮತದಾರರ ಚೀಟಿ, ಪಡಿತರ ಚೀಟಿ ಹಾಗೂ ಆಧಾರ್ ಸಂಖ್ಯೆ ಪಡೆದು ಒಂದು ಕಡೆ ನೆಲೆನಿಲ್ಲುವ ಕಸರತ್ತು ನಡೆಸಿರುವ ನಡುವೆಯೇ ಸರ್ಕಾರದ ಇಲಾಖೆಗಳು ಕ್ರೌರ್ಯ ಮೆರೆದಿರುವುದು ವ್ಯಾಪಕ ಟೀಕೆಗೆ ಗುರಿಯಾಗಿದೆ. ಮಂಗಳವಾರ ರಾತ್ರಿ ಯಾರೂ ಇಲ್ಲದಿರುವುದನ್ನೇ ಗುರಿಯಾಗಿಸಿಕೊಂಡು ಗುಡಿಸಲು ಕಿತ್ತು ಹಾಕಲಾಗಿದ್ದು ಬೀದಿಗೆ ಬಿದ್ದಿರುವ ಕುಟುಂಬ ಸೂಕ್ತ ನೆಲೆ ಒದಗಿಸಬೇಕು ಎಂದು ಸರ್ಕಾರಕ್ಕೆ ಬೇಡಿಕೆ ಇಟ್ಟಿವೆ. ಅಲೆಮಾರಿ ಜೀವನ ಬಿಟ್ಟು ಮಕ್ಕಳಿಗೆ ವಿದ್ಯಾಭ್ಯಾಸ ಕೊಡಿಸುವ ಸಲುವಾಗಿ ಕಾಡಿಬೇಡಿ ಖಾಸಗಿಯವರ ಜಮೀನಿನಲ್ಲಿ ಗುಡಾರ ಹಾಕಿಕೊಂಡಿದ್ದೆವು, ಪೆಟ್ರೋಲ್ ಬ್ಯಾಂಕ್ ಹಿಂಭಾಗ ಖಾಲಿ ಇದ್ದ ಜಾಗದಲ್ಲಿ ನಿವೇಶನ ಕೊಡುವ ಭರವಸೆಯಿಂದ ಗುಡಿಸಲು ಹಾಕಿಕೊಂಡಿದ್ದರೆ ಅಲ್ಲಿಯೂ ಒಕ್ಕಲೆಬ್ಬಿಸಿದ್ದಾರೆ ಎಂದು ಅಲೆಮಾರಿ ಗೋವಿಂದಪ್ಪ ಅಳಲು ತೋಡಿಕೊಂಡರು.
