ನಾರಾಯಣಪುರ ಬಲ ಹಾಗೂ ಎಡದಂಡೆ ನಾಲೆಗೆ ನೀರು ಹರಿಸಲು ಜನಸಂಪನ್ಮೂಲ ಸಚಿವ ಡಿ.ಕೆ.ಶಿವಕುಮಾರ ಸೂಚನೆ ಮೇರೆಗೆ ಅಧಿಕಾರಿಗಳು ತೀರ್ಮಾನ ಕೈಗೊಂಡಿದ್ದಾರೆ. ಮೊದಲ ಬೆಳೆಗೆ 120 ದಿನ ನೀರು ಹರಿಸುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ. ಆದರೆ, ವಾರಬಂದಿ ಅನುಸರಿಸುತ್ತಿರುವುದರಿಂದ ಕೃಷಿಗೆ ವಾಸ್ತವದಲ್ಲಿ 80 ದಿನ ನೀರು ಸಿಗಲಿದೆ. ಮುಂಗಾರು ಹಂಗಾಮಿನಲ್ಲಿ ವಾರಬಂದಿ ಹಾಕುತ್ತಿರುವುದು ಬಹುತೇಕ ಇದೇ ಮೊದಲಾಗಿದೆ. ಕೃಷ್ಣಾ ನದಿ ತುಂಬಿ ಹರಿದರೂ ವಾರಬಂದಿ ಯಾಕೆಂಬ ಪ್ರಶ್ನೆ ರೈತರನ್ನು ಕಾಡುತ್ತಿದೆ.
ಬಲದಂಡೆ ನಾಲೆ ವ್ಯಾಪ್ತಿಗೆ ಲಿಂಗಸುಗೂರು, ದೇವದುರ್ಗ ಹಾಗೂ ರಾಯಚೂರು ತಾಲೂಕು ಒಳಪಡುತ್ತಿದ್ದು, ರೈತರು ಭತ್ತ ಸೇರಿ ವಿವಿಧ ಬೆಳೆ ಬೆಳೆಯಲು ಮುಂದಾಗಿದ್ದಾರೆ. ಜು.27ರಿಂದ ನೀರು ಬಿಡುವ ಆದೇಶವಿದ್ದರೂ ಇನ್ನೂ ನಾಲೆಗೆ ನೀರು ಹರಿಸಿಲ್ಲ. ತಾಲೂಕಿನ ರೈತರು ಹೊಲ ಹದ ಮಾಡಿಕೊಂಡಿದ್ದು ನಾಲೆ ನೀರಿಗಾಗಿ ಕಾಯುತ್ತಿದ್ದಾರೆ.
