ತೋಟಗಳಲ್ಲಿ ಮಂಗಗಳ ದಾಂಧಲೆ

ನರೇಂದ್ರ ಎಸ್.ಮರಸಣಿಗೆ ಹೆಬ್ರಿ

ಹಳ್ಳಿಯ ತೋಟಗಳಲ್ಲಿ ಮಂಗಗಳದ್ದೆ ಕಾರುಬಾರು. ನೂರಾರು ಬೊಂಡಗಳು, ಬಾಳೆ ಕಾಯಿ, ತರಕಾರಿ, ಹಣ್ಣು ಹಂಪಲುಗಳು ನಾಶ. ಒಂದು ತೋಟದಿಂದ ಮತ್ತೊಂದು ತೋಟಕ್ಕೆ ಲಗ್ಗೆ ಇಡುವುದು ಗ್ರಾಮಾಂತರ ಪ್ರದೇಶದಲ್ಲಿ ಕಂಡು ಬರುವ ನಿತ್ಯದ ಚಿತ್ರಣ. ಪೇಟೆಯಲ್ಲಿ ಅಂಗಡಿ, ಹೋಟೆಲ್, ಮನೆಗಳಿಗೆ ನುಗ್ಗಿ ತಿಂಡಿ, ಸಾಮಗ್ರಿ ದೋಚುತ್ತಿರುವ ದೃಶ್ಯ ಸಾಮಾನ್ಯ.

ದೂರದೂರುಗಳಿಂದ ಮಂಗಗಳನ್ನು ಹಿಡಿದು ಆಗುಂಬೆ ತಟದಲ್ಲಿ ಬಿಡುತ್ತಿದ್ದು, ಹೆಬ್ರಿ ನಾಡ್ಪಾಲು, ಸೀತಾನದಿ, ಮಡಾಮಕ್ಕಿ ಪರಿಸರದಲ್ಲಿ ಮಂಗಗಳ ಕಾಟ ತಾರಕ್ಕೇರಿತ್ತು. ಸ್ಥಳೀಯರ ಆಕ್ಷೇಪದಿಂದ ಮಂಗಗಳನ್ನು ತಂದು ಬಿಡುವುದು ನಿಲ್ಲಿಸಿದರು.

ಹೋರಾಟ ಸಮಿತಿ ರಚನೆ

ಪೆರ್ಡೂರಿನಲ್ಲಿ ಕೇಂದ್ರ ಸ್ಥಾನ ಹೊಂದಿಕೊಂಡಂತೆ ಕಾಡು ಪ್ರಾಣಿಗಳ ಉಪಟಳದ ವಿರುದ್ಧ ಹೋರಾಟಕ್ಕೆ ಹೊಸ ಹೋರಾಟ ಸಮಿತಿ ಅಸ್ತಿತ್ವಕ್ಕೆ ಬಂದು ವಿವಿಧ ಹೋರಾಟ, ಮನವಿ ಸಲ್ಲಿಕೆ, ಜಾಗೃತಿ ಅಭಿಯಾನ ಜತೆಗೆ ಮಂತ್ರಿಗಳು, ಜನಪ್ರತಿನಿಧಿಗಳು, ಜಿಲ್ಲಾಧಿಕಾರಿಗಳು, ಅರಣ್ಯ ಇಲಾಖೆ ಉನ್ನತಾಧಿಕಾರಿಗಳ ಕೂಡುವಿಕೆಯಲ್ಲಿ ಪೆರ್ಡೂರಿನಲ್ಲಿ ಸಮಸ್ಯೆ ಬಗೆಹರಿಸಲು ಸಮಾಲೋಚನೆ ಹಾಗೂ ಮಂಗಗಳ ಹಾವಳಿ ತಪ್ಪಿಸಲು ಯೋಚನೆ, ಯೋಜನೆ ಕುರಿತು ಬೃಹತ್ ಸಭೆ ನಡೆದಿತ್ತು.

ಮಂಕಿ ಪಾರ್ಕ್ ವಿಚಾರ ಪ್ರಸ್ತಾಪ

ಕೆಲ ವರ್ಷಗಳ ಹಿಂದೆ ಮಂಗಗಳ ಕಾಟಕ್ಕೆ ಕಡಿವಾಣ ಹಾಕಲು ಜಿಲ್ಲೆಯಲ್ಲೊಂದು ಬೃಹತ್ ಮಂಕಿ ಪಾರ್ಕ್ ಸ್ಥಾಪನೆ, ಮಂಗಗಳ ಸಂತಾನಹರಣ ಸೇರಿ ವಿವಿಧ ಗಂಭೀರ ವಿಚಾರ ಚರ್ಚೆಗೆ ಬಂದಿದ್ದು ಅದು ಚರ್ಚೆಯಲ್ಲೇ ಉಳಿದು ಮಂಗಗಳ ಕಾಟ ಮಾತ್ರ ತಪ್ಪಿಲ್ಲ. ಜನರ ಆಕ್ರೋಶಕ್ಕೆ ಉತ್ತರಿಸಿದ ಅರಣ್ಯ ಇಲಾಖೆ ಅಧಿಕಾರಿಗಳು ಸಮಸ್ಯೆ ಪರಿಹಾರಕ್ಕೆ ಕಾಡಿನಲ್ಲೇ ಹಣ್ಣಿನ ಗಿಡ ಬೆಳೆಸಲು ಕ್ರಮಕೈಗೊಳ್ಳುವುದಾಗಿ ತಿಳಿಸಿದ್ದರು.

ಎಳನೀರು ಟಾರ್ಗೆಟ್

ಬಹುತೇಕ ಕಡೆ ತೆಂಗಿನ ತೋಟದಲ್ಲಿ ಸೀಯಾಳವನ್ನು ಕಿತ್ತು ಹಾಕುತ್ತಿದ್ದು, ಕೃಷಿಕರಿಗೆ ಮುಂದೆ ತೆಂಗಿನಕಾಯಿ ಕೊರತೆ ಉಂಟಾಗುವ ಸಾಧ್ಯತೆಗಳಿವೆ. ಕೆಲವೆಡೆ ಬೃಹತ್ ಪ್ರಮಾಣದಲ್ಲಿ ಹಾನಿಯಾಗಿದೆ.

ಉರುವಲು ಮಿಶ್ರಿತ ಗಿಡ ನಾಟಿ

ಅಂದಿನ ಸಭೆಯಲ್ಲಿ ಹಣ್ಣಿನ ಗಿಡ ನೆಡುವ ವಿಚಾರ ಪ್ರಸ್ತಾಪಿಸಿದ್ದು ಬಿಟ್ಟರೆ ಗಿಡ ನೆಡಲು ಕ್ರಮ ಕೈಗೊಂಡಿಲ್ಲ. ಈ ಭಾರಿ ಅರಣ್ಯ ಇಲಾಖೆ ನೆಟ್ಟ ಗಿಡಗಳಲ್ಲಿ ಉರುವಲು ಮಿಶ್ರಿತ ಬೋಗಿ, ಗುಗ್ಗುಳ, ದೂಪ ಮತ್ತಿತರ ಗಿಡಗಳನ್ನು ಹೆಚ್ಚು ನೆಟ್ಟಿದ್ದು ನೇರಳೆ ಗಿಡ ಹೊರತು ಹಣ್ಣಿನ ಗಿಡಗಳನ್ನೇ ನೆಟ್ಟಿಲ್ಲ. ನಮಗೆ ಇಲಾಖೆ ಮತ್ತು ಉನ್ನತಾಧಿಕಾರಿಗಳ ನಿರ್ದೇಶನದಂತೆ ಅರಣ್ಯ ನೆಡುತೋಪುಗಳಿಗೆ ಗಿಡಗಳ ಸರಬರಾಜು ಆಗುತ್ತಿದೆ. ಹಣ್ಣಿನ ಗಿಡ ನೆಡಲು ನಿರ್ದೇಶನ ಬಂದಿಲ್ಲ ಎಂದು ಇಲಾಖೆ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.