ಚಿಕ್ಕಬಳ್ಳಾಪುರ: ಸಮಾಜದ ಹಿತದೃಷ್ಟಿಯಿಂದ ಎಲ್ಲ ಧರ್ಮೀಯರು ಒಗ್ಗೂಡಿ ಕೆಲಸ ಮಾಡಬೇಕು. ಆಗ ಮಾತ್ರ ಧಾರ್ಮಿಕ ಸ್ವಾತಂತ್ರ್ಯ ಮತ್ತು ಸಹಬಾಳ್ವೆಯನ್ನು ಸಾಧಿಸಬಹುದು ಎಂದು ಮಂಗೋಲಿಯಾದ ಉಲಾನ್ ಬಾತರ್ನಲ್ಲಿರುವ ದಶಿಚೋಲಿಂಗ್ ಧಾರ್ಮಿಕ ಪಾಠಶಾಲೆಯ ಮುಖ್ಯಸ್ಥ ಖಂಬಾ ಲಾಮಾ ಅಭಿಪ್ರಾಯಪಟ್ಟರು.
ಚಿಕ್ಕಬಳ್ಳಾಪುರ ತಾಲೂಕಿನ ಮುದ್ದೇನಹಳ್ಳಿಯಲ್ಲಿ ಕೈಗೊಂಡಿದ್ದ 'ಜಾಗತಿಕ ಸಾಂಸ್ಕೃತಿಕ ಉತ್ಸವದ ಸಾನಿಧ್ಯ ವಹಿಸಿ ಮಾತನಾಡಿದರು.
ಅಧ್ಯಾತ್ಮಿಕ ವಿಚಾರದಲ್ಲಿ ಭಾರತ ಮತ್ತು ಮಂಗೋಲಿಯಾ ಜನರು ಒಡ ಹುಟ್ಟಿದವರಂತೆ ಇದ್ದು ಬೌದ್ಧ ಧರ್ಮದ ಕಾರಣದಿಂದ ಐತಿಹಾಸಿಕ ಸಂಬಂಧ ಹೊಂದಿವೆ. ಸಂಸ್ಕೃತಿ ಹಾಗೂ ಬೆಳವಣಿಗೆಗೆ ವಿಶಿಷ್ಟ ಕೊಡುಗೆ ನೀಡಿವೆ ಎಂದು ಸ್ಮರಿಸಿದರು.
ಮಂಗೋಲಿಯಾದ ರಾಯಭಾರಿ ಎಚ್.ಇ. ಗ್ಯಾನ್ ಬೋಲ್ಡ್ ಡಂಬಜಾವ್ ಮಾತನಾಡಿ, 1955 ರಲ್ಲಿ ಭಾರತ ಮತ್ತು ಮಂಗೋಲಿಯಾದ ರಾಜತಾಂತ್ರಿಕ ಸಂಬಂಧಗಳು ಶುರುವಾಗಿದ್ದು ರಾಜಕೀಯ, ಆರ್ಥಿಕತೆ, ರಕ್ಷಣೆ ಸೇರಿದಂತೆ ಎಲ್ಲ ಕ್ಷೇತ್ರಗಳಲ್ಲಿಯೂ ಪಾಲುದಾರಿಕೆ ಮುಂದುವರಿದಿದೆ ಎಂದರು.
ಶಿಕ್ಷಣ ಕ್ಷೇತ್ರದಲ್ಲಿನ ಸಾಧನೆಗಾಗಿ ಮಂಗೋಲಿಯಾದ ಡಾ ಬಯಾರಾ ಡಾಂಜಿನ್ ಹಾಗೂ ಡುಗರ್ ಜಾವ್ ತ್ಸೆಟ್ಸೆಗ್ಮಾಗೆ 'ಒಂದು ಜಗತ್ತು ಒಂದು ಕುಟುಂಬ ಜಾಗತಿಕ ಮಾನವೀಯ ಪುರಸ್ಕಾರ ಹಾಗೂ ಎಎಸ್ಎಂ ಟೆಕ್ನಾಲಜಿ ಕಂಪನಿಯ ಅಧ್ಯಕ್ಷೆ ಪ್ರೀತಿ ರವೀಂದ್ರಾ ಹಾಗೂ ಕಾರ್ಯದರ್ಶಿ ವಾಣಿಶ್ರೀ ಪ್ರಶಸ್ತಿಗೆ ಸಿಎಸ್ಆರ್ ಸರ್ಕಲ್ ಆಫ್ ಹಾನರ್ 2025 ಪುರಸ್ಕಾರವನ್ನು ನೀಡಲಾಯಿತು.
