ಬೆಂಗಳೂರು: ಸನಾತನ ಧರ್ಮ, ಪರಂಪರೆಗೆ ಮೂಲಾಧಾರವಾಗಿರುವ ವೇದ ಉಳಿಯಬೇಕಾದರೆ ವೈದಿಕರು ಉಳಿಯಬೇಕು. ವೈದಿಕರು ಉಳಿದರೆ ಭಾರತೀಯ ಆಸ್ತಿಕತೆ ಉಳಿಯುತ್ತದೆ ಎಂದು ಸುರಭಾರತಿ ಧರ್ಮಕರ್ತರಾದ ವಿದ್ವಾನ್ ಕೆ.ಎಲ್.ಶ್ರೀನಿವಾಸ್ ಹೇಳಿದ್ದಾರೆ.
ಹವ್ಯಕ ಸಮ್ಮೇಳನದ ಪ್ರಧಾನ ವೇದಿಕೆಯಲ್ಲಿ ಶನಿವಾರ ಹಮ್ಮಿಕೊಂಡಿದ್ದ 81 ವೈದಿಕರಿಗೆ ‘ಹವ್ಯಕ ವೇದರತ್ನ’ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ದಿಕ್ಸೂಚಿ ಭಾಷಣ ಮಾಡಿದರು.
ವೇದ ಸಂಸ್ಕೃತಿಯನ್ನು ಸಂರಕ್ಷಿಸುವುದಕ್ಕೆ ಶ್ರಮಿಸುತ್ತಿರುವ ವೈದಿಕರ ಕೊಡುಗೆ ಅಪಾರ. ಸಮಾಜ, ನಾಡು, ದೇಶದ ಹಿತಕ್ಕಾಗಿ ಸದಾ ದೇವರಲ್ಲಿ ಪ್ರಾರ್ಥನೆ ಸಲ್ಲಿಸಲು ನಮ್ಮೆಲ್ಲರ ಪ್ರತಿನಿಧಿಗಳಂತೆ ಕಾರ್ಯ ನಿರ್ವಹಿಸುತ್ತಿರುವ ವೈದಿಕರನ್ನು ಸನ್ಮಾನಿಸುವುದೆಂದರೆ ಸಾಕ್ಷಾತ್ ಭಗವಂತನನ್ನೇ ಗೌರವಿಸಿದಂತೆ. ಎಲ್ಲಿ ವೇದ ಪಂಡಿತರ ಉಪಸ್ಥಿತಿ ಇರುತ್ತದೆಯೋ ಅಲ್ಲಿ ಭಗವಂತನ ಸಾನಿಧ್ಯವಿರುತ್ತದೆ. ಇಷ್ಟು ದೊಡ್ಡ ಸಂಖ್ಯೆಯ ವೈದಿಕರನ್ನು ಒಂದೇ ವೇದಿಕೆಯಲ್ಲಿ ಸನ್ಮಾನಿಸುವ ಮೂಲಕ ಹವ್ಯಕ ಮಹಾಸಭೆ ಹೊಸ ದಾಖಲೆ ಮಾಡಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.
ಸಮಾರಂಭದಲ್ಲಿ ವಿವಿಧ ಕ್ಷೇತ್ರಗಳಲ್ಲಿ ಸೇವೆ ಸಲ್ಲಿಸುತ್ತಿರುವ 81 ವೈದಿಕರನ್ನು ವಿದ್ವಾಂಸರಾದ ಡಾ.ಅರಳುಮಲ್ಲಿಗೆ ಪಾರ್ಥಸಾರಥಿ, ವೇ.ಮೂ.ಶ್ರೀಧರ ಅಡಿಗ, ದೈವಜ್ಞ ಸಚ್ಚಿದಾನಂದ ಬಾಬು, ವೇ.ಮೂ.ಬಾಲಚಂದ್ರ ಭಟ್ ಮತ್ತು ಡಾ.ಕೆ.ಎಲ್.ಶಂಕರನಾರಾಯಣ ಜೋಯಿಸರು ಸನ್ಮಾನಿಸಿದರು. ಈ ವೇಳೆ ಎಲ್ಲ ವೈದಿಕರು ಮಾಡಿದ ವೇದೋಷ ಸಭಾಂಗಣದಲ್ಲಿ ಮೊಳಗಿತು.
ಸಂಜೆ ನಡೆದ ಸಮಾರಂಭದಲ್ಲಿ 81ಶಿಕ್ಷಕರಿಗೆ ಪ್ರಶಸ್ತಿ ನೀಡಿ ಸನ್ಮಾನಿಸಲಾಯಿತು. ಹೃದ್ರೋಗ ತಜ್ಞೆ ಡಾ.ವಿಜಯಲಕ್ಷ್ಮಿ ಬಾಳೇಕುಂದ್ರಿ ದಿಕ್ಸೂಚಿ ಭಾಷಣ ಮಾಡಿದರು. ಡಾ.ಮಲ್ಲೇಪುರಂ ವೆಂಕಟೇಶ, ಡಾ.ನಿರಂಜನ ವಾನಳ್ಳಿ, ಡಾ.ಎಸ್.ವಿದ್ಯಾಶಂಕರ್, ಡಾ.ಅಹಲ್ಯಾ ಶರ್ಮ, ಕೊರ್ಗಿ ಶಂಕರನಾರಾಯಣ ಉಪಾಧ್ಯಾಯ, ಡಾ.ಕೆ.ಪಿ. ಪುತ್ತೂರಾಯ, ಪಂ.ವಿನಾಯಕ ತೊರವಿ, ಮುರಳೀಧರ ಪ್ರಭು ಮತ್ತಿತರರು ಪಾಲ್ಗೊಂಡಿದ್ದರು.
81 ಪ್ರತಿಭಾನ್ವಿತ ವಿದ್ಯಾರ್ಥಿಗಳಿಗೆ ಪ್ರಶಸ್ತಿ ನೀಡಿ ಸನ್ಮಾನಿಸಲಾಯಿತು. ಸಂಸದ ತೇಜಸ್ವಿ ಸೂರ್ಯ ದಿಕ್ಸೂಚಿ ಭಾಷಣ ಮಾಡಿದರು. ಡಾ. ಮೋಹನ ಆಳ್ವ, ಎಂ.ಕೆ.ಭಟ್, ಮಿಮಿಕ್ರಿ ದಯಾನಂದ್, ದತ್ತಾತ್ರೇಯ ವೇಲಂಕರ್ ಮತ್ತಿತರರು ಪಾಲ್ಗೊಂಡಿದ್ದರು.
