ಜಾತ್ರೆಯ ಹಿನ್ನೆಲೆ: ಪ್ರತಿ ಮೂರು ವರ್ಷಕ್ಕೊಮ್ಮೆ ಜರುಗುವ ಇತಿಹಾಸ ಪ್ರಸಿದ್ಧ ನುಂಕೆಮಲೆ ಸಿದ್ದೇಶ್ವರಸ್ವಾಮಿ ಜಾತ್ರೆಗೂ ಮುನ್ನ ಗ್ರಾಮ ದೇವತೆ ಮಾರಮ್ಮದೇವಿ ಪರಿಷೆ ನಡೆಸುವ ವಾಡಿಕೆ ಹಿಂದಿನಿಂದಲೂ ನಡೆದಿದೆ. ಇದಕ್ಕಾಗಿ ಕಾಡು ಮರವನ್ನು ಕಡಿದು ತಂದು ನಗರದ ಜಿನಗಾರ ಮನೆಯಲ್ಲಿಡಲಾಗುತ್ತದೆ. ಇದರಿಂದ ಅರ್ಚಕರು ದೇವಿ ಮತ್ತು ಇಬ್ಬರು ಮಕ್ಕಳ ಪ್ರತಿಮೆ ತಯಾರಿಸಿ ಅವುಗಳಿಗೆ ದೈವ ಸ್ವರೂಪ ನೀಡುತ್ತಾರೆ. ಮಂಗಳವಾರ ಸಂಜೆ ಜಿನಗಾರ ವಂಶಸ್ಥರಿಂದ ದೇವಿಗೆ ಸೀರೆ, ಬಳೆ, ಕುಂಕುಮ, ಹೂ, ಅಕ್ಕಿ-ಬೆಲ್ಲವನ್ನು ಶಾಸ್ತ್ರೋಕ್ತವಾಗಿ ಮಡಿಲು ತುಂಬಿದ ಬಳಿಕ ಉತ್ಸವ ಮೂರ್ತಿಗಳಿಗೆ ವಿಶೇಷ ಅಲಂಕಾರ ಮಾಡಿ ರಥದಲ್ಲಿ ಕೂರಿಸಿ ಉತ್ಸವ ನಡೆಸಲಾಗುತ್ತದೆ.
