'ಮೋದಿ ಫಾರಿನ್ ಟ್ರಿಪ್ಪು' ಪುಸ್ತಕ ಲೋಕಾರ್ಪಣೆ

ಮಂಗಳೂರು: ಪ್ರಧಾನಿ ನರೇಂದ್ರ ಮೋದಿ, ಇಂದು ಜಾಗತಿಕ ನಾಯಕರಾಗಿ ಬೆಳೆದಿದ್ದಾರೆ. ಅವರ ವಿದೇಶಾಂಗ ನೀತಿ ಶೇ.77ರಷ್ಟು ರೇಟಿಂಗ್ ಪಡೆಯುವ ಮೂಲಕ ಅಗ್ರಮಾನ್ಯರೆನಿಸಿದ್ದಾರೆ ಎಂದು ವಿಜಯವಾಣಿ ಅಂಕಣಕಾರ ಚಕ್ರವರ್ತಿ ಸೂಲಿಬೆಲೆ ಅಭಿಪ್ರಾಯಪಟ್ಟಿದ್ದಾರೆ.

ನಮೋ ಬ್ರಿಗೇಡ್ ಮಂಗಳೂರು ಡೊಂಗರಕೇರಿಯ ಭುವನೇಂದ್ರ ಸಭಾಂಗಣದಲ್ಲಿ ಭಾನುವಾರ ಆಯೋಜಿಸಿದ್ದ ಮೋದಿ ಫಾರಿನ್ ಟ್ರಿಪ್ಪು ಪುಸ್ತಕ ಲೋಕಾರ್ಪಣೆ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ಹಿಂದಿನ ಸರ್ಕಾರಗಳೆಲ್ಲ ಪಾಕ್ ಜತೆ ಯುದ್ಧ ಆದಾಗ ಸುಮ್ಮನಿರುತ್ತಿದ್ದವು. ಮೊದಲ ಬಾರಿಗೆ, ದಾಳಿ ಮಾಡಿದರೆ ಸರ್ಜಿಕಲ್ ಸ್ಟ್ರೈಕ್ ಮಾದರಿಯ ದಾಳಿ ಮಾಡುತ್ತೇವೆ ಎಂದು ತೋರಿಸಿಕೊಟ್ಟದ್ದು ಮೋದಿ. ಇದು ನಿಜವಾದ ಫಾರಿನ್ ಪಾಲಿಸಿ. ಮೋದಿ ಸರ್ಜಿಕಲ್ ಸ್ಟ್ರೈಕ್ ಮಾಡಿದಾಗ ಯಾವ ರಾಷ್ಟ್ರವೂ ಭಾರತದ ವಿರುದ್ಧ ಧ್ವನಿ ಎತ್ತಿಲ್ಲ. ಯಾರೂ ಮಾತಾಡಲಾಗದಂತಹ ಬಾಂಧವ್ಯವನ್ನು ಭಾರತ ಬೆಳೆಸಿಕೊಂಡದ್ದರಿಂದ ಇದು ಸಾಧ್ಯವಾಯಿತು ಎಂದರು.

ಕೃತಿ ಬಿಡುಗಡೆ ಮಾಡಿದ ಕೃಷಿಕ, ಲೇಖಕ ವಿಶ್ವೇಶ್ವರ ಭಟ್ ಬಂಗಾರಡ್ಕ, ನರೇಂದ್ರ ಮೋದಿ ಪ್ರಧಾನಿಯಾದ ಬಳಿಕ ಜಾಗತಿಕವಾಗಿ ಭಾರತ ಏನು ಹೇಳುತ್ತದೆ? ಎಂಬುದನ್ನು ವಿಶ್ವವೇ ಕುತೂಹಲ ಕೇಳುತ್ತಿದೆ. ಯಶಸ್ವಿ ಆಡಳಿತ, ಕೃಷಿ, ಆರ್ಥಿಕ ನೀತಿ ಸಹಿತ ಪ್ರಮುಖ 16 ಕ್ಷೇತ್ರಗಳಲ್ಲಿ ಪ್ರಧಾನಿ ನರೇಂದ್ರ ಮೋದಿ ಮಹತ್ವದ ಸಾಧನೆ ಮಾಡಿದ್ದಾರೆ ಎಂದರು.